Oshili kombinga yonakwiiwa
Mbela owe lipulile ngoo nande onale kutya onakwiiwa oye tu tuvikilila shike? Ombiibeli otai ulike kutya oinima ididilikwedi oyo i li poku ka ningwa otai dulu okukuma ovanhu aveshe kombada yedu.
Jesus okwa yelifa nghee hatu ka shiiva kutya “Ouhamba waKalunga ou li popepi.” (Lukas 21:31) Okwa xunganeka kutya otapa ka holoka oita inene, omakakamo edu, ondjala nomikifi dolutapo; oinima oyo tu wete keshe pamwe kunena. — Lukas 21:10-17.
Ombiibeli oya tumbula yo kutya ovanhu itave ke lihumbata vali paenghedi “momafiku axuuninwa” okupangela kwovanhu. Oto dulu okulesha kombinga yaasho mu 2 Timoteus 3:1-5. Ngeenge owa didilike oikala nelihumbato la tya ngaho kunena, kape na omalimbililo kutya oto ka twa kumwe nexunganeko lOmbiibeli li na sha noinima ya tya ngaho.
Osho osha hala okutya ngahelipi? Ouhamba waKalunga ou li pokweeta omalunduluko manene oo taa ka xwepopaleka onghalamwenyo kombada yedu. (Lukas 21:36) Kalunga okwa xunganeka mOmbiibeli oinima iwa oyo tai ka hafelwa kovanhu ovo tava ka kala kombada yedu. Natu ka tale koihopaenenwa imwe yomuyo.
OMUPANGELI MUWA
“Ye [Jesus] okwa pewa eenghono nefimano noshilongo. Noiwana aishe omaludi nomalaka tae mu longele. Eenghonopangelo daye odo eenghonopangelo daalushe, kadi na apa tadi xulu po. Ndele oshilongo shaye osho oshilongo itashi ka teywa po.” — DANIEL 7:14.
Sha hala okutya: Oto dulu okutyapula onghalamwenyo koshi yOuhamba oo wa dikwa po kuKalunga, nOmona waYe oye Ohamba yao.
OUKOLELE MUWA
“Ndele onakukalamo nande umwe ta ti: ‘Aame oshingone.’” — JESAJA 33:24.
Sha hala okutya: Ito ka vela vali ile u lemane; oto ka kala nomwenyo fiyo alushe.
OMBILI YASHILI
Ota “xulifa po oita fiyo okeengaba dedu.” — EPSALME 46:9.
Sha hala okutya: Itapa ka kala vali omatilifo oita nosho yo oixuna oyo hai etifwa koita.
KEDU OTAKU KA KALA ASHIKE OVANAMBILI
“Omuhenakalunga ita kala po vali. . . . Ndelenee ovananheni vo otava ka fyuulula edu.” — EPSALME 37:10, 11.
Sha hala okutya: Itapa ka kala vali ovanhu ovakolokoshi, ndele otapa ka kala ashike ovo va halelela okudulika kuKalunga.
EDU ALISHE OTALI KA KALA OPARADISA
Ovanhu “otava ka dika omaumbo ndele tava kala mo, ndele tava twike oikokola yomiviinyu, ndele tava li oiimati yayo.” — JESAJA 65:21, 22.
Sha hala okutya: Edu alishe otali ka kala onhele ya wapala noya amenwa. Kalunga ota ka nyamukula eilikano letu olo kutya ehalo laye nali wanifwe “kombada yedu.” — Mateus 6:10.