Oshimhungu shomapulo
◼ Oinima ilipi ovalikongi va pumbwa okukundafana novakulunhuongalo ngeenge ova hala okulongifa Olupale lOuhamba shi na sha nehombolo lavo?
Omahombolo oo haa unganekwa metwokumwe nomafinamhango Ombibeli ohaa fimanekifa Jehova. Osho osha fimana unene tuu ngeenge ehombolo otali ka ningilwa mOlupale lOuhamba, molwaashi ohashi kumu etaleko lovanhu moshitukulwa li na sha nehangano laJehova. Opo oinima ‘aishe i ningwe paenghedi nopashikulafano,’ oshiwa okukundafana novakulunhuongalo, ngeenge omwa hala okulongifa Olupale lOuhamba shi na sha nehombolo leni. — 1 Kor. 14:40.
Ngeenge ovalikongi ova hala okulongifa Olupale lOuhamba shi na sha nehombolo lavo, ove na okushanga omukanda weindilo ndele tave u yandje kokomitiye yoilonga yeongalo olo hali ongalele moulupale olo. Omukanda oo ou na okuyandwa kuyele lela nokupopya kutya ova hala okulongifa olupale naini nefimbo peni. Ovalikongi ove na okudimbuluka kutya ovakulunhuongalo itava ka lundulula omafimbo okwoongala opo ngeno va yapukile ehombolo. Kakele kaasho, ovalikongi va tya ngaho ove na okukala ve na edina liwa meongalo, sha hala kutya, ove na okukala hava kala metwokumwe nomafinamhango Ombibeli nosho yo nomifikamhango daJehova douyuki.
Opo ehombolo olo li ningwe monghedi oyo tai fimanekifa Kalunga ketu oo a tumbala, ovalikongi ove na okukundafana omalongekido avo ehombolo nokomitiye yoilonga fimbo inava ninga omatokolo axuuninwa. Ovakulunhuongalo kave na okufindila ovalikongi omataleko avo opaumwene. Ndele ngeenge ope na oshinima shonhumba osho sha pumbwa okuyukifwa, ove na oku shi lombwela ovalikongi, opo va ninge po omalunduluko apa sha pumbiwa. MOlupale lOuhamba omu na ashike okudanwa omusika oyo tai hangwa moungalo vomaimbilo ehangano lEendombwedi daJehova ile okwiimbwa omaimbilo oo taa hangwa momambo etu omaimbilo. Ovalikongi ove na okupula epitikilo kovalunhuongalo ngeenge ova hala okufeweka olupale monghedi yonhumba ile va hala okuunganeka oipundi monghedi yonhumba. Ovafaneki kave na okupiyaaneka ovapwilikini mokukala tava endaenda unene. Ovakulunhuongalo otashi dulika va pitike ovalikongi ve liendife po mOlupale lOuhamba, shimha ashike itashi nyono po omalongekido makwao eongalo. Oukalata vokushiva eehango kave na okutulwa kekafa lomashiivifo eongalo. Ashike otaku dulu okuningwa eshiivifo li li pauxupi mOkwoongala kwoPailonga opo eongalo li kale li shii kutya Olupale lOuhamba otali ka longifwa mefiku lonhumba shi na sha nehombolo.
Nonande inaku teelelwa ngeno ovanhu aveshe ovo tava ningi oinghumbi va kale va ninginifwa, itashi ka kala sha wapala okuninga ovanhu oinghumbi ovo eenghedi davo dokukalamwenyo dihe li nandenande metwokumwe nomafinamhango Ombibeli ile ovo elihumbato lavo tali ka limbililika ovakalipo. Oshipopiwa shehombolo oshi na okuyandjwa komukulunhuongalo oo va hoolola, ngeenge ope na. Ovakulunhuongalo ove li ovahongi vEendjovo daKalunga va pyokoka. Onghee hano, ova wana filufilu okuyandja oshipopiwa osho tashi divilike omafinamhango Ombibeli pomhito oyo ya fimana. — 1 Tim. 3:2.
Omukulunhuongalo oo e li omuhombolifi naye okwa pumbwa okushiivifilwa kuyele kombinga yomalongekido ehombolo. Oku na okupula ovalikongi kombinga yelihumbato lavo fimbo va li tava endelafana. Ovalikongi nava popye va manguluka, tava popi oinima i li paushili. Ngeenge umwe womuvo okwa li a hombola nale ile a li a hombolwa, na yandje oumbangi wa yela oo tau ulike kutya paife okwa manguluka pamishangwa nopaveta okuhombolulula ile okuhombolululwa. (Mat. 19:9) Osho osha kwatela mo okuulikila omukulunhuongalo oo okopi yodjapo yeteyohombo.
Ngeenge ovalikongi ova kundafana novakulunhuongalo tava popi va manguluka nokulongela kumwe navo, ehombolo lavo otali ka kala omhito ihafifa kwaaveshe. — Omayel. 15:22; Heb. 13:17.