Lilongekidila nawa Edimbuluko
Oshihafifa noshi li oufembanghenda munene kovashikuli vaKristus okulilongekidila nawa Edimbuluko lefyo laJesus Kristus. (Luk. 22:19) Oshike twa pumbwa okuninga opo tu lilongekidile nawa Edimbuluko?
◼ Efimbo nonhele: Keshe umwe oku na okukala e shii nawa kutya Edimbuluko otali ka ningwa pongapi nosho yo onhele opo tali ka ningilwa. Ngeenge ope na omaongalo mahapu oo taa ka longifa Olupale lOuhamba limwe, osha fimana okuhovela pefimbo nosho yo okumana pefimbo opo mu yapukile ovo tava landula ko nopehe na edundakano, molwaashi efimbo olo omaongalo e na okulipitifila po ola ngabekwa. Ope na okuningwa eenghendabala opo ovanhu vaha kale va ndubalala poshivelo, polupanda nosho yo mondjila ile mopaakinga.
◼ Oufo vokushiva ovanhu kEdimbuluko: Mbela ovaudifi aveshe ove na ngoo oufo vokushiva ovanhu kEdimbuluko? Mbela ou shii ngoo oshikalimo shoufo ovo? Owe lideula po ngoo kutya oto ka tya ngahelipi eshi to shivi vamwe nokafo oko? Oolyelye wa diladila oku ka shiva? Otu na okuninga eenghendabala opo tu yandje oufo aveshe kovanhu fiyo va pwa po.
◼ Oyeendifo: Ovanhu vamwe ovo ve na ohokwe nosho yo ovamwatate novamwameme vonhumba otashi dulika va kale va pumbwa oku ka talwa noyeendifo ile va pumbwa okukwafelwa monghedi imwe i lili. Omalongekido elipi a ningwa po opo va kwafelwe?
◼ Omungome nomaviinyu: Omadidiliko oo kae na okulitaambekidwa fimbo etango inali ningina. Ope na okuningwa omalongekido opo ovavaekwa ovo itava dulu okukala pEdimbuluko omolwokuhenoukolele va twaalelwe omungome nomaviinyu opo va dule okukufa ombinga. Ope na okulongekidwa omungome tau wapalele nosho yo omaviinyu, noi na okutulwa poshitaafula kuyele. — Tala Oshungonangelo (yOshiwambo) ye 1 Marsa 2003, epandja 10-11 okatendo 14, 17.
◼ Olupale lOuhamba: Olupale oli na okuwapalekwa nawanawa komesho yefimbo. Ope na okulongekidwa ouyasha nouhalasha vomaviinyu nosho yo oshitaafula nelapi lokoshitaafula tali wapalele, noi na okutulwa peenhele kuyele. Ngeenge eongalo otali ka longifa onhele imwe i lili ihe fi Olupale lOuhamba, omu na okukala omambako a wana opo ovapwilikini va dule okuuda nawa omupopi. Ovayakuli nosho yo ovo tava ka yandja omadidiliko ove na okuhoololwa diva nokulombwelwa komesho yefimbo osho tava ka ninga. Ove na okuninga oinima monghedi ya yuka nove na okudjala nokuliwapeka monghedi i shii okufimanekwa.
Tu li oohandimwe nosho yo eongalo, otwa hala okulilongekidila nawa oshiningwanima osho sha fimanenena, Edimbuluko lefyo laJesus Kristus. Nopehe na omalimbililo, Jehova ota ka nangeka noupuna aveshe ovo tava ulike olupandu lavo tali di komutima shi na sha naasho a ningila ovanhu okupitila mekuliloyambo lOmona waye omuholike, Jesus Kristus.