Oto lilongekidile ngoo Edimbuluko?

Osha li omafiku 13 Nisan 33 O.P. Jesus okwa li e shii kutya oku na ko ashike oufiku waxuuninwa okukala pamwe nookaume kaye kopofingo fimbo ina dipawa. Okwa li ta ka dana Opaasa yaxuuninwa pamwe navo nokonima okwa li ta ka tota po edano lipe, Ouvalelo wOmwene. Opo va ka dane oshiningwanima osho sha fimana, opa li pe na okuningwa omalongekido. Onghee hano, okwa li a tuma Petrus naJohannes va ka longekide oinima. (Luk. 22:7-13) Okudja opo, omudo keshe Ovakriste ovo va halelela okudana Edimbuluko ohave lilongekidile oshiningwanima osho. (Luk. 22:19) Oinima ilipi tu na okuninga opo tu lilongekidile Edimbuluko olo tali ka kala ko mo 3 Aprili?

Osho ovakulunhuongalo ve na okulongekida:

Ove na okuninga omalongekido e na sha nokulongifa Olupale lOuhamba ile onhele imwe tai wapalele. Onhele oyo oi na okukala i na oipundi ya wana, eelamba da yela nawa nomhepo ya wana. Ove na okuninga omalongekido opo onhele oyo i wapalekwe nawa komesho yefimbo.
Ove na okuhoolola omupopi a pyokoka, omunashipundi nosho yo ovamwatate ovo tava ka ilikana shi na sha nomadidiliko.
Ngeenge onhele oyo otai ka longifwa komaongalo e dulife pulimwe, ove na okuunganeka nawa efimbo nomalongekido e na sha nanghee ovanhu tave ke uya mo nokupita mo metungo nosho yo meepaakinga.
Ove na okuhoolola nokuunganeka ovayakuli naavo tava ka yandja omadidiliko.
Ove na okulongekida omungome tau wapalele nosho yo omaviinyu, ouyasha nouhalasha vomaviinyu, oshitaafula nelapi lokoshitaafula tali wapalele.

Osho ovaudifi ve na okulilongekida:

Ove na okuliunganeka opo va ka kufe ombinga pauyadi moshikonga shokushiva ovanhu kEdimbuluko.
Otava dulu okuninga omusholondodo womadina aavo tava ka shiva ngaashi ovakonakonimbibeli, ovapambele, ovanafikola vakwao, ovalongi pamwe navo novashiivikile.
Ove na okulesha nokudilonga kelesho lOmbibeli lEdimbuluko.
Ove na okuuya pEdimbuluko ve lilongekida okutambula ko ovaenda.