Kala nomutima wa hafa eshi to lilongekidile Edimbuluko
1. Efimbo lEdimbuluko oli li efimbo le likalekelwa lokuninga shike?
1 Edimbuluko olo tali ka kala ko mEtivali, 26 Marsa, otali ke tu pa omhito ya denga mbada opo tu ulike kutya otwa hafa omolwexupifo olo Kalunga e tu longekidila. (Jes. 61:10) Nokuli nofimbo Edimbuluko inali fika, okukala twa hafa otaku ke tu kwafela tu lilongekide nawa. Osho ohatu ka dula oku shi ninga ngahelipi?
2. Oshike hashi tu linyengifa opo tu ninge omalongekido e na sha nEdimbuluko?
2 Okulilongekidila Edimbuluko: Ouvalelo wOmwene ou li oshinima sha fimana nonande ohashi ningwa paunafangwa. Ashike ohashi pula okuninga omalongekido komesho yefimbo opo omauyelele a fimana aha dimbiwe po. (Omayel. 21:5) Hoololeni efimbo nosho yo onhele tai wapalele. Omu na okukonga omadidiliko a yukila ko. Onhele omo tamu ningilwa Edimbuluko oi na okukala ya wapalekwa nawa. Omuyandji woshipopiwa oku na okulilongekida nawa, novayakuli ove na okupewa omalombwelo a yela. Kape na omalimbililo, omalongekido mahapu okwa ningwa nale. Olupandu li na sha neenghono dokuxupifa dekulilo olo hali tu linyengifa tu lilongekidile nawa oshiningwanima osho shiyapuki. — 1 Pet. 1:8, 9.
3. Ongahelipi hatu dulu okulongekida omitima detu omolwouvalelo wOmwene?
3 Longekida omutima woye: Otwa pumbwa yo okulongekida omitima detu opo tu ude ko pauyadi efimano lEdimbuluko. (Esra 7:10) Otu na okulongifa efimbo opo tu leshe eleshelo lOmbibeli le likalekelwa lEdimbuluko nokudiladila moule shi na sha nomafiku axuuninwa onghalamwenyo yaJesus yokombada yedu. Okudilonga komhepo yaJesus yeliyambo otaku tu linyengifa tu mu hopaenene. — Gal. 2:20.
4. Ouwa wekuliloyambo ulipi we kweetela ehafo linene?
4 Efyo laKristus ola yukipalifa ounamapangelo waJehova. Otali mangulula ovanhu moulunde nefyo. (1 Joh. 2:2) Ole tu yeululila omhito tu kale tu na ekwatafano liwa naKalunga notu ka mone omwenyo waalushe. (Kol. 1:21, 22) Otali tu kwafele yo tu pameke etokolotoko letu lokukala metwokumwe neliyapulo letu notu twikile okukala ovahongwa vaKristus ovadiinini. (Mat. 16:24) Kala wa hafa eshi to lilongekida naashi to ka kala pEdimbuluko olo tali uya.