Onaini tu na okuninga omalishuneko kovanhu ovo va ulika ohokwe?
1. Oshike sha kwatelwa mokuninga ovanhu ovahongwa?
1 Okuninga ovanhu ovahongwa okwa kwatela mo okuninga omalishuneko kukeshe oo a ulika kutya okwa hala okulihonga kombinga yelongekido laJehova lOuhamba. (Mat. 28:19, 20) Omwa pumbwa okukundafana nomunhu oo a ulika ohokwe kutya efimbo lilipi tali wapalele okushuna ko kuye. Omolwashike tu na okuninga omalishuneko diva konima eshi opo twa shakene nomuneumbo oshikando shotete?
2, 3. Omolwashike tu na okukendabala okuninga omalishuneko diva ngaashi tashi dulika?
2 Omolwashike tu na okuninga omalishuneko diva? Oilonga yokuudifa “evangeli eli louhamba” oi li pokupwa, nexulilo longhalelo ei yoinima ola ehena popepi. (Mat. 24:14; 1 Pet. 4:7) Onghee hano, fimbo pe na natango “efiku lexupifo” laavo ve na ohokwe, natu dulikeni kekumaido olo kutya ‘udifa ondjovo neendelelo,’ naasho osha kwatela mo okuninga omalishuneko diva ngaashi tashi dulika opo tu kulike ohokwe yovanhu ovo va ulika ohokwe. — 2 Kor. 6:1, 2; 2 Tim. 4:2, yelekanifa no-NW.
3 Satana okwa halelela okukufa mo eembuto dOuhamba odo tashi dulika tu kune momitima dovanhu ovo ve na ohokwe. (Mark. 4:14, 15) Luhapu ovanhu ovo va ulika ohokwe ohava shekwa koilyo yomaukwaneumbo avo, kovanailonga pamwe navo nosho yo kovanhu vali vamwe. Onghee hano, okuninga omalishuneko diva otaku ke tu kwafela tu kanghameke eenghundafana detu kwaasho twa kundafanene ofimbo omunhu oo ina kanififwa ohokwe yaye kuvamwe.
4. Ongahelipi hatu dulu okudika po ekanghameno lokuninga elishuneko petalelepo lotete?
4 Ninga omalongekido kutya oto shuna ko naini: Oshiwa okuninga elongekido lokondadalunde petalelepo lotete nomunhu oo a ulika ohokwe kutya oto shuna ko naini. Pula epulo olo to uya okunyamukula moshikando tashi landula. Osha fimana okuninga omadidilikoshango e na sha novaneumbo ovo wa shakeneka oshikando shotete nonokutya oto shuna ko naini. Ngeenge omalipyakidilo oye otae ku pitike, pula omuneumbo ngeenge oto dulu okwaaluka mefiku tali landula ile diva konima yaasho. Ngeenge efiku olo wa talela po omunhu oo a ulika ohokwe osha li exuliloshivike, ndele omunhu oo oha ka longa mokati koshivike, otashi dulika a dimine u aluke mexuliloshivike tali landula. Ndele ngeenge owa ningi elongekido nomunhu wonhumba, wanifa po eudaneko loye. — Mat. 5:37.
5. Ongahelipi okuninga omalishuneko diva taku tu kwafele tu wanife po oshilonga shokuninga ovanhu ovahongwa osho twa pewa kuJesus?
5 Otu na omatomheno mawa okuninga omalishuneko diva ngaashi tashi dulika kovanhu ovo va ulika ohokwe. Onghee hano, natu kaleni hatu ningi omalongekido nokuninga omalishuneko diva, molwaashi “efimbo olo la xupa ko olixupi.” (1 Kor. 7:29, NW) Ngeenge otwa shuna ko diva kovanhu ovo va ulika ohokwe metumwalaka lOuhamba, eenghendabala detu oshi na oupu di pondole.