Xwepopaleka ounghulungu woye moukalele, mokudika po ekanghameno opo u dule okuninga elishuneko

Omolwashike sha fimana: Ngeenge twa mona umwe tau ulike ohokwe, ohatu kala twa hala okwaaluka opo tu dule okutekela eembuto doshili odo twa kuna. (1 Kor. 3:6) Ohatu diki po ekanghameno lokuninga elishuneko mokutala kutya onaini hatu dulu okwaaluka, naasho otwa pumbwa oku shi ninga alushe fimbo inatu ya. Ohashi kala yo shiwa tu fiile omunhu epulo olo hatu ka kundafana oshikando tashi uya eshi hatu ke mu talela po. Osho ohashi ningifa omuneumbo a kale a teelela nodjuulufi etalelepo, nokuli nongeenge epulo ola nyamukulwa moshishangomwa osho twe mu fiila, ota ka kala a halelela unene oku shi lesha. Okudika po ekanghameno laasho tamu ka kundafana moshikando tashi landula nasho ohashi shi ningifa shipu twaaluke molwaashi otwa hoolola nale oshikundafanwa, nomuneumbo ota ka kala a teelela okuuda kombinga yasho. Eshi hatu ningi elishuneko, ohatu dulu oku mu yelifila kutya otwa aluka tu nyamukule epulo olo twa li twa pula oshikando sha dja ko opo nee hatu twikile.

Nghee to dulu oku shi ninga:

Eshi to lilongekida etwalemo leumbo neumbo, lilongekida yo epulo olo to ka nyamukula eshi to ningi elishuneko. Otali dulu li kale la kanghamena koshikundafanwa osho shili moshileshomwa osho wa ya dja efiku olo, ile epulo olo la nyamukulwa mushimwe shomoishangomwa yetu yokukonakonwa, osho to dulu oku mu etela eshi to ka aluka.
Eshi to xulifa eenghundafana deni nomunhu oo a ulika ohokwe, mu lombwela kutya owa hala mu uye mu twikile eenghundafana, opo nee to pula epulo olo wa longekida olo to ka nyamukula eshi to ningi elishuneko. Moitukulwa imwe ovanhu ove lipyakidila neenghono notashi dulika va ongaonge okuninga oshilaye opo u va talele po. Meenghalo da tya ngaho, oto dulu okutya: “Mbela efimbo lilipi unene ho kala meumbo? [Teelela a nyamukule.] Ongahelipi ngeenge onda piti po moshivike tashi uya ndi nyamukule epulo eli . . ? Ngeenge onda hange we lipyakidila unene, oto dulu ashike okushiivifila nge.”
Ngeenge owa lombwele omuneumbo kutya oto ke uya pefimbo lokondadalunde, diinina eudaneko loye. (Mat. 5:37) Pexulilo leenghundafana delishuneko, tumbula epulo loshikando tashi landula.

Kendabala okuninga ngaha momukokomoko womwedi:

Eshi to lilongekida etwalemo leumbo neumbo, lilongekida yo epulo olo to ka nyamukula eshi to ningi elishuneko. Kundafana epulo olo novaudifi vakweni ovo tamu longo navo.