Mbela oto ongaonga okuyadeka okakalata koye ko-DPA?
Ino ongaonga okuyadeka okakalata koye ko-DPA (durable power of attorney). Okakalata oko oka nuninwa Eendombwedi da ninginifwa. Molwaashi ihatu kala tu “nowino waashi tashi ningwa [komongula],” osha fimanenena okutokola komesho yefimbo noku shi ulika pakushanga kutya ohatu ka tambula ko ouhaku nomilandu dopauhaku doludi lilipi ngeenge otwa i monghalo omo itatu dulu okupopya. (Jak. 4:14; Oil. 15:28, 29.) Ope na okavidio Transfusion-Alternative Health Care — Meeting Patient Needs and Rights, oko taka dulu oku tu kwafela tu ninge omahoololo a diladilwa nawa. Oto ladipikwa u tale okavidio oko nokukonga omanyamukulo komapulo oo taa landula. Opo nee dilonga pamwe neilikano kombinga yaasho we lihonga mokavidio oko. — Didilika: Molwaashi mokavidio oko omu na omauliko e na sha nomatando, ovadali ove na okutala ngeenge ounona vavo vanini otava dulu ngoo okutala pamwe navo okavidio oko ile hasho.
(1) Omolwashike eendokotola novashiivinawa vouhaku vamwe tava talulula shi na sha netulwohonde? (2) Yandja oihopaenenwa itatu yomatando a kitakana oo a ningwa nopehe na etulwohonde. (3) Eendokotola novatandi ve fike peni mounyuni aushe va hala okuhakula ile okutanda ovanaudu nopehe na etulwohonde, nomolwashike? (4) Omakonakono oo a ningwa moipangelo mefimbo opo la di ko okwa holola shike shi na sha nelongifo lohonde? (5) Etulwohonde ohali etifa oilanduliko ya nyika oshiponga ilipi? (6) Ovashiivinawa voinima yopaunamiti ova fika pexulifodiladilo lilipi shi na sha nomauwa oo haa di momilandu dopauhaku odo inadi kwatela mo etulwohonde? (7) Oshike hashi etifa o-anemia (okukala uhe na ohonde ya wana molutu)? Omunhu ota dulu okukala no-anemia fiyo oposhitwa shilipi? Ongahelipi omunhu oo e na o-anemia ta dulu okukwafelwa opo onghalo yaye i xwepopale ? (8) Ongahelipi ohonde itilyana tai dulu okuhapupalifwa molutu lomunhu oo e na eesele ditilyana inadi wana? (9) Eenghedi dilipi tadi dulu okulongifwa opo omunhu aha kanife ohonde ihapu pefimbo letando? (10) Mbela ouhaku oo inau kwatela mo etulwohonde otau dulu ngoo okulonga kounona ile kovanhu ovo ve li monghalo ya kwata moiti? (11) Efinamhango la fimanenena lilipi tali dana onghandangala ngeenge tashi uya pefiloshisho liwa lopaunamiti? (12) Omolwashike shi li pandunge kOvakriste okuninga omahoololo avo komesho yefimbo e na sha nouhaku oo inau kwatela mo etulwohonde? Ongahelipi hatu dulu oku shi ninga?
Keshe umwe oku na okuninga etokolo kuye mwene she likolelela keliudo laye la deulwa kOmbibeli kutya ouhaku ulipi oo wa ulikwa mokavidio ta ka tambula ko. Mbela owa ninga nale etokolo kutya ouhaku nomilandu dopauhaku dilipi ove nounona voye tamu ka tambula ko nomwa yadeka oukalata vo-DPA? Opo u mone natango ouyelele muhapu u na sha noinima ei, konakona noukeka etukulwa 7 lembo ‘Ohole yaKalunga’ nosho yo eedjo domauyelele odo da ulikwa mo. Tala yo okawedwapo mokafo Oukalele Wetu wOuhamba kOshiingilisha kaJanuali 2007, ke na oshipalanyole: “Mbela onda tala ko ngahelipi outukulwa vanininini ovo hava kufwa mohonde nosho yo omilandu dopauhaku odo da kwatela mo okulongifwa kwohonde yange mwene?” Opo nee, shilipaleka kutya owa yadeka mondjila omahoololo oo wa ninga mokakalata koye ko-DPA. Ou na okushiivifila ovo wa hoolola va kale ovapopikalelipo voye nosho yo ovapambele voye ovo vehe fi Eendombwedi kombinga yomatokolo oo wa ninga.
[Oshimhungu pepandja 3]
• Mbela owa ninga nale etokolo kutya ouhaku ulipi nosho yo omilandu odo wa hala okutambula ko nosho yo ounona voye?
• Mbela oho ende ngoo nokakalata koye ko-DPA ka yadekwa opo u hangwe u ka kwete ngeenge pa holoka oshiponga?