Nghee to dulu okudeula ovaudifi vape va shiive okuudifa
1. Owa li udite ngahelipi eshi wa li to kufa ombinga moukalele oshikando shotete?
1 Oto dimbuluka oshikando shotete wa kufa ombinga moukalele weumbo neumbo? Otashi dulika wa li wa tila neenghono. Ngeenge owa li to longo naao ha konakona naave Ombibeli ile nomuudifi umwe e lili, nopehe na omalimbililo otashi dulika wa li wa hafa eshi te ku kwafele. Ndele paife eshi u li omuudifi e na owino, oto dulu okudeula ovaudifi vape nghee ve na okuudifa.
2. Ovaudifi vape ova pumbwa okulihonga shike?
2 Ovaudifi vape ova pumbwa okulihonga nghee ve na okuhovela eenghundafana nomuneumbo, okulongifa Ombibeli eshi tava popi nomunhu, okuninga omalishuneko nosho yo nghee ve na okuhovela nokuninga omakonakonombibeli. Ove na yo okulihonga nghee ve na okuudifa meenghedi di lili noku lili, ngaashi momapandavanda nosho yo meenhele domalandifilo. Oto dulu oku va kwafela va xwepopaleke oukalele wavo meenhele da tya ngaho to shi ningi okupitila moshihopaenenwa shoye nosho yo momaetepo oye.
3. Ongahelipi hatu dulu okukwafela ovaudifi vakwetu okupitila moihopaenenwa yetu?
3 Va honga okupitila moshihopaenenwa shoye: Jesus okwa li a ulikila ovahongwa vaye nghee ve na okuudifa. (Luk. 8:1; 1 Pet. 2:21) Ngeenge owa ninga elongekido u ka longe pamwe nomuudifi mupe, lilongekida etwalemo li li paunafangwa olo omuudifi oo ta dulu okuhopaenenwa, tashi dulika u longife omatwalemo oo e li moishangomwa yetu. Opo nee mu lombwela kutya oto ka ninga eumbo lotete ile omaumbo avali otete opo a pwilikine eshi to popi. Fimbo inamu ya keumbo likwao oto dulu okupula omuudifi ngeenge etwalemo olo wa longifa ola enda ngoo nawa. Okuninga ngaho otashi ke mu kwafela a mone kutya osha fimana okulonga novaudifi vakwao moukalele notashi ka kala shipu kuye okutambula ko omaetepo oo to ke mu pa konima ngeenge okwa ningi etwalemo laye.
4. Ongahelipi hatu dulu okukwafela omuudifi mupe konima ngeenge otwa pwilikine etwalemo laye?
4 Mu pa omaetepo: Jesus okwa li yo a lombwela ovahongwa vaye nghee ve na okuudifa. (Mat. 10:5-14) Naave oto dulu okukwafela omuudifi mupe monghedi ya faafana. Ngeenge oye e na olufo lokupopya, kala to pwilikine nawa eshi ta popi. Opo nee eshi mwa dja po peumbo olo, mu pandula to popi oinima yokondadalunde noi li paushili, noku li nonande owa mona kutya okwa pumbwa okuxwepopaleka etwalemo laye moinima yonhumba. Ofimbo ino ninga eetepo loye, tala ngeenge okwa xwepopala moshinima osho peumbo etivali, molwaashi otashi dulika peumbo lotete a li ashike a tila. Kaleka yo momadiladilo kutya ovaudifi ove na okudula kwa yoolokafana, naluhapu ope na yo eenghedi di lili noku lili dokuninga oshinima shonhumba mondjila. — 1 Kor. 12:4-7.
5. Oshike hatu dulu okutya eshi hatu pe omuudifi mupe omaetepo ngeenge ine tu pula ye mwene?
5 Omafimbo amwe omuudifi mupe otashi dulika e ku pule u mu pe omaetepo onhumba. Ndele ngeenge ine ku pula, katuka onghatu u mu kwafele. Osho oto dulu oku shi ninga ngahelipi nelungi? Ovaudifi vamwe va pyokoka ohava pula ovaudifi vape tava ti: “Nandi ku pe eetepo?” Ile “Osha enda ngahelipi?” Oto dulu yo okutya: “Eshi nda li omuudifi mupe, onda li handi mono shi li eshongo oku . . . , ndele onda mona kutya ohashi kwafele oku. . . .” Omafimbo amwe otashi ka kala shiwa okutala omaetepo membo Reasoning pamwe nomuudifi oo. Ninga omaetepo e na sha ashike nombinga imwe yetwalemo laye opo uhe mu ndubile ouyelele muhapu.
6. ‘Oshivela ohashi upike’ ngahelipi oshivela shikwao ngeenge tashi uya poukalele?
6 Oshivela ohashi upike oshivela shikwao: Timoteus, oo a li omuudifi a pyokoka, okwa li a ladipikwa kuPaulus a twikile okukala ta hongo nokuninga exumokomesho. (1 Tim. 4:13, 15) Nonande otashi dulika wa kala to kufa ombinga moukalele oule womido okudja eshi wa hovela oshikando shotete, twikila natango okuxwepopaleka ounghulungu woye. Lihonga komatwalemo ovaudifi ovo ho longo pamwe navo moukalele nokuli naavo vehe na lela owino. Tala kutya openi to dulu okukwafela vamwe to shi ningi nolune, naunene tuu ovo vape, opo va dule okuninga ovaudifi vonghundana iwa va pyokoka. — Omayel. 27:17.