Xwepopaleka ounghulungu woye moukalele, mokudeula ovo vape

Omolwashike sha fimana: Ovahongwa vape vaJesus ove na okulihonga “aishe” oyo e va lombwela, mwa kwatela okuhonga vamwe oshili. (Mat. 28:19, 20) Vahapu ovo vape ova wana okuya mOfikola yOkudeula Ovaudifi nohava yandje oundombwedi wohangelele kovapambele ile kookaume. Ashike, eshi tava ende tava kulike olupandu lavo laasho tave lihongo nokushiiva kutya Jehova okwa hala ovanhu aveshe va ude onghundana iwa, otashi dulika shi ve linyengife va kale va halelela oku shi lombwela vamwe moukalele. (Rom. 10:13, 14) Shimha ovo vape va ningi ovaudifi inava ninginifwa, otava ka pumbwa edeulo liwa opo va kale ve na ondjungu eshi tava katuka onghatu ei ya fimanenena mokukula pamhepo. — Luk. 6:40.

Nghee to dulu oku shi ninga:

Kwafela omuudifi mupe a kufe oishangomwa oyo a pumbwa opo a udife nokuhonga. Mu ulikila nghee ho unganeke ondjato yoye yomoukalele noku mu yelifila elalakano loshishangomwa keshe osho wa humbata.
Hoololeni oshihopaenenwa shomatwalemo osho shi li mOukalele Wetu wOuhamba, ndele tamu lideula po naye. Mu ladipika a ninge etwalemo olo ta longifa oitya yaye mwene. Liendifei po peenghalo odo di li membo lOfikola yOukalele woPauteokratika, epandja 82, odo da sha moshitukulwa sheni. Mu ladipikila efimano lokudjala nokuliwapeka monghedi tai wapalele. — 2 Kor. 6:3, 4.
Yandja edeulo tali twikile. Mu ulikila okakalata koshitukulwa noku mu honga nghee ta dulu okuninga omadidilikoshango mokambo ile moshikwaeletronika shaye opo a didilike ovo va ulika ohokwe. Mu honga a kale e shii okulongifa o-jw.org moukalele nosho yo okambo Good News for People of All Nations. Mu kwafela a kulike ohokwe yaavo a mona. — 1 Kor. 3:6.
Kala omulididimiki, noku mu pandula. (Omayel. 25:11) Tula po oshihopaenenwa shiwa. Ouladi woye nokuulika kutya ou na ko nasha navamwe otau ka eta oidjemo iwa monakwiiwa.

Kendabala okuninga ngaha momukokomoko womwedi:

Longa pamwe nomukonakonimbibeli woye eumbo neumbo, nokuya naye komalishuneko nokovakonakonimbibeli voye. Ngeenge ku na omukonakoni, pula omuudifi oo ehe na owino mu ka longe pamwe naye.