Efiloshisho lovakalele Ovakriste
1 Mo 1938, ehangano laJehova ola li la tota po elongekido lipe. Omaongalo mahapu okwa li haa shivwa koyoongalele oyo kunena hai ifanwa oyoongalele yoshikandjo. Elalakano ola li lashike mbela? Okafo Informant kaJanuali 1939 (oko kunena haka ifanwa Oukalele Wetu wOuhamba) oka ti: “Oyoongalele oyo oi li oshitukulwa shEhangano laJehova loPauteokratika olo ha longifa mokukwatela komesho oilonga yaye yOuhamba. Ehongo olo hali yandjwa poyoongalele oyo ola fimanenena kukeshe umwe opo a longe nawa oilonga oyo a pewa.” Ngeenge otwa tale kehapupalo lovaudifi vOuhamba ve dule po 7 000 000 olo la ningwa mo 2009 okudja eshi ovaudifi va li ashike 58 000 mo 1938, otashi ulike kutya oyoongalele yoshikandjo otai wanifa po elalakano layo mokukwafela ovakalele “va longe oilonga oyo va pewa.”
2 Oshipalanyole shoshoongalele shomudo woilonga tau uya: Otwa teelela nodjuulufi oyoongalele oyo tai ka hovela muSeptemba nosho yo etwomukumo olo hatu ka mona po. Oshipalanyole shoshoongalele osho osho: ‘Kamu fi oshitukulwa shounyuni,’ sha kufwa muJohannes 15:19, NW. Otapa ka yandjwa oipopiwa oyo tai ka etela ouwa ovakalele Ovakriste. MOlomakaya ohatu ka pwilikina koshipopiwa shi na oshipalanyole: “Oilonga yefimbo li yadi ohai tu amene ngahelipi?” Ohatu ka hafela yo oipopiwa itatu ya pambafana oyo i li koshi yoshipalanyole: “Ino nyatekwa . . . ” “Koshilyani,” “Kombwada inene” nosho yo “Kovashingifi ovaendi.” MOsoondaxa ohatu ka pwilikina koipopiwa ya pambafana oyo i li koshi yoshipalanyole: “Kala u hole Jehova, ndele haunyuni.” Oipopiwa imwe vali ongaashi: “Twikileni okukala ‘ngaashi ovanailongo’ ” nosho yo “Kaleni mwa nyatipala, otamu dulu okufinda ounyuni.”
3 Omumwameme umwe oo a li iha longo vali shihapu moukalele nokwa li poshoongalele shoshikandjo shimwe opo sha di ko, okwa ti kutya oshoongalele osho oshe mu linyengifa a talulule eenghalo daye ndele ta tokola a “kale omuladi moilonga yokuudifa nokweefa po okuninga omalipopilo.” Nopehe na omalimbililo, oshoongalele shoshikandjo shomudo woilonga mupe otashi ke tu kwafela atusheni tu kale tu hole Jehova ponhele yokukala tu hole ounyuni. (1 Joh. 2:15-17) Ninga omalongekido komesho yefimbo opo u ka kale poshoongalele osho noku ka yandja elitulemo opo u mone ouwa pauyadi mefiloshisho olo lopahole lovakalele Ovakriste.
[Omapulo ekonakono]
1. Mo 1938, omwa li mwa hovelwa elongekido lipe lilipi, nonelalakano lashike?
2. Ouyelele ulipi tau ka kundafanwa poshoongalele shoshikandjo shomudo woilonga mupe?
3. Ouwa ulipi hatu ka mona ngeenge otwa i koshoongalele shoshikandjo?