Amena omadiladilo oye
1. Oshoongalele shoshikandjo shomudo woilonga 2013 oshi na oshipalanyole shilipi, nosha nuninwa oku tu kwafela monghedi ilipi?
1 Jesus okwa honga ovahongwa vaye va kale ve hole Jehova nomutima aushe, nomwenyo aushe neendunge davo adishe, ile tu tye nomadiladilo avo aeshe. (Mat. 22:37, 38) Oyoongalele oyo hatu ka dana meemwedi di li komesho oya nuninwa oku tu kwafela tu pameke ounhu wetu womeni. Ngaashi to dimbuluka, oshoongalele shoshitukulwa sho 2012 oshi na oshipalanyole ‘Amena omutima woye!’ Oshoongalele shefiku le likalekelwa shomomudo woilonga 2013 otashi ka kala shi na oshipalanyole “Amena eliudo loye,” ofimbo shoshikandjo tashi ka kala shi na oshipalanyole “Amena omadiladilo oye,” sha kanghamena kuMateus 22:37. Oshoongalele shoshikandjo osha nuninwa okukwafela keshe umwe womufye a konakone nawa omadiladilo aye opo a kale a wapalela Jehova.
2. Ohatu ka konga omanyamukulo omapulo elipi poshoongalele?
2 Osho tashi ka kundafanwa po: Eshi hatu ka pwilikina poshoongalele shoshikandjo, natu ka kongeni omanyamukulo omapulo taa landula, oo a kwatela mo oitwa ya fimana:
• Oshike tashi tu kwafele tuha kale tu na ‘etaleko lopanhu’?
• Ongahelipi hatu dulu okutwikulula omadiladilo aavo vehe na eitavelo?
• Oikala yopamadiladilo ilipi twa hala okukala tu na?
• Ouwa ulipi hau di mokudilonga monghedi ya yuka?
• Ongahelipi hatu dulu okweefa Jehova a vyule omadiladilo etu?
• Ongahelipi ovashamane, ovakulukadi, ovadali nosho yo ovanyasha tava dulu okukwafela omaukwaneumbo avo a kale a hafa?
• Ongahelipi hatu dulu okulilongekidila efiku laJehova?
• Okulongekidila omadiladilo etu oilonga otashi ti shike?
• Ovo hava tula moilonga osho ve lihonga ohava mono ouwa ulipi?
3. Omolwashike sha fimana okukala poshoongalele omafiku aeshe, okuyandja elitulemo filufilu nosho yo okutula moilonga osho we lihonga?
3 Satana ota kondjo opo a nyateke omadiladilo etu. (2 Kor. 11:3) Onghee hano, otu na okwaamena omadiladilo etu noku a pangela. Otu na okutwikila okuulika oikala yopamadiladilo ya fa yaKristus nokulwifa enwefemo lounyuni ou uhe na omhango. (1 Kor. 2:16) Ninga omalongekido opo u ka kale po omafiku aeshe poshoongalele shoshikandjo. Ka yandje elitulemo filufilu. Tula moilonga ouyelele wa fimanenena oo tau ka yandjwa po opo u ke ku kwafele u mange oshiya shomadiladilo oye, ile tu tye u kale wa tokola toko okulonga nouladi moilonga yOuhamba. — 1 Pet. 1:13.