Eendjovo daKalunga odi shii okuhonga

1. Oshipalanyole shoshoongalele shoshikandjo shomudo woilonga 2014 otashi ti ngahelipi, nepulo lilipi tali ka nyamukulwa poshoongalele osho?

¹ ‘Omuhongi wetu Munenenene,’ Jehova, oku li omuhongi a denga mbada meshito alishe. (Jes. 30:20, 21, NW) Ongahelipi Jehova he tu hongo? Okwa yandja embo olo li dule omambo aeshe makwao, Eendjovo daye danwefwa mo, Ombibeli. Ongahelipi hatu dulu okumona ouwa mehongo lopakalunga palutu, pamadiladilo, pamaliudo nosho yo pamhepo? Enyamukulo lepulo olo ohatu ke li mona poshoongalele shoshikandjo shomudo woilonga 2014. Oshoongalele osho otashi ka kala shi na oshipalanyole, “Eendjovo daKalunga odi shii okuhonga,” sha kanghamena ku 2 Timoteus 3:16.

2. Oitwa ya fimanenena yoshoongalele otai ka divilikwa komanyamukulo omapulo elipi?

² Didilika oitwa ei ya fimanenena: Oitwa ya fimanenena yoshoongalele otai ka divilikwa komanyamukulo omapulo aa taa landula:

• Ongahelipi ehongo lopakalunga la kuma onghalamwenyo yetu? (Jes. 48:17, 18)

• Oshike osho Jehova e tu udanekela ngeenge otwa ningi omalunduluko monghalamwenyo yetu opo tu mu longele efimbo li yadi? (Mal. 3:10)

• Ohatu ke linyenga ngahelipi ngeenge otwa shakeneke ‘omalongo e lili naku lili tuhe a shii’? (Heb. 13:9)

• Ongahelipi hatu dulu okuhopaenena onghedi yaJesus ‘yokuhonga’? (Mat. 7:28, 29)

• Omolwashike ovahongi meongalo ve na okulihonga vo vene? (Rom. 2:21)

• Eendjovo daKalunga odi shii okuninga shike? (2 Tim. 3:16)

• Ongahelipi ovanhu va kumwa ‘kekakamo’ loiwana? (Hag. 2:6, 7)

• Jehova oku na elineekelo kutya ohatu dulu okuninga shike? (Ef. 5:1)

• Omolwashike tu na okulonga noudiinini opo tu kale mehongo laJehova? (Luk. 13:24)

3. Omolwashike sha fimana kufye opo tu ka kale poshoongalele osho shi li pefimbo nokuyandja elitulemo filufilu?

³ Fimbo Paulus ina popya eendjovo odo di li mu 2 Timoteus etukulwa 3, oko kwe likolelela oshipalanyole shoshoongalele, okwa li a hokolola omafimbo madjuu oo taa ka didilikifa mo omafiku axuuninwa. Okwa ti: “Ovanhu vaii novakengeleledi otava ka ehena komesho mowii nokupukifa nokupuka.” (2 Tim. 3:13) Inashi fimana tuu kufye okukala hatu pwilikine nokutula moilonga ehongo lopakalunga opo tuha pukifwe! Onghee hano, natu kaleni twa tokola toko opo tu ka kale poshoongalele osho shi li pefimbo nokuyandja elitulemo filufilu.