Omalombwelo kwaavo hava ungaunga noitukulwa pOkwoongala kwoPailonga
Okuhovela nokafo aka kOukalele Wetu wOuhamba, omalombwelo e na sha nelandulafano lOkwoongala kwoPailonga otaa ka kala e li paunafangwa. Omalombwelo nomadimbulukifo aa taa landula apa, otaa ka pepaleka nokuyelifa osho sha li sha popiwa moshitukulwa osho tashi hangwa mokafo kOukalele Wetu wOuhamba, kaMei 2009, shi na oshipalanyole, “Nghee hatu dulu okulilongekidila Okwoongala kwoPailonga.”
◼ Oshipopiwa: Oshipopiwa otashi ulike koshitukulwa osho u na okuyandja we likolelela kouyelele oo wa pewa, ndele kashi fi eenghundafana novapwilikini. Omupopi oku na okuyandja elitulemo koinima oyo tai kwafele shili eongalo.
◼ Eenghundafana domapulo nomanyamukulo: Oshitukulwa osho oshi na okukala shi na etwalemo nosho yo exulifo li li pauxupi, nomapulo outendo aveshe oku na okupulwa, tashi ningwa monghedi ya faafana naayo yekonakono lOshungonangelo. Omukwatelikomesho oku na okuhenuka okuninga omatyekosha mahapu unene. Ngeenge efimbo otali shi pitike, omishangwa odo da tongomana moshitukulwa odi na okuleshwa. Outendo kave na okuleshwa, okuninga mwa pewa omalombwelo mu shi ninge.
◼ Eenghundafana novapwilikini: Oshitukulwa osho oshi na okuyandjwa monghedi yoshipopiwa, ashike ovapwilikini navo ove na okukufa ombinga meenghundafana. Oshitukulwa osho kashi fi ashike oshipopiwa, sho kashi fi ashike omapulo nomanyamukulo.
◼ Omauliko nomapulapulo: Ngeenge taku popiwa omauliko otashi ti kutya omumwatate oo a pewa oshipopiwa oye e na oshinakuwanifwa shokukonga ovanhu ovo tava ka ninga euliko; ndele haye e na okuninga euliko olo. Ovanhu ovo ta hoolola nava kale va wana nove li oshihopaenenwa shiwa, noku na oku va shiivifila komesho yefimbo. Nonande ovaudifi vape nosho yo ovo vehe na owino otava dulu okulongifwa ve lile po omuneumbo, kashiwa oku va longifa ve li ovapopi nelalakano ngeno loku va pa omhito yokuya komutune. Ovaudifi ovo tava ningi euliko ove na okufya oshisho va kale va taalela kovapwilikini. Ovo tava ka pulwapulwa ove na okupulwa ve li komutune ndele hamoipundi. Ovaudifi ovo tava ka ninga euliko nosho yo ovo tava ka pulwapulwa ove na okuliendifa po komesho yefimbo pamwe nomumwatate oo ta ka yandja oshipopiwa. Ngeenge efimbo lokwoongala oli li pokupwa ko, omumwatate oku na okuxupipika oshipopiwa shaye, ndele ke na okuteta mo euliko ile omapulapulo. Ovayakuliongalo ove na okupula omayele komuunganeki wolutu lovakulunhuongalo ile komukulunhuongalo wonhumba fimbo inava hoolola ovo tava ka ninga omauliko ile ovo tava ka pulapula.
Ngeenge oshitukulwa shonhumba oshi na omalombwelo e likalekelwa, omupopi oku na okushikula filufilu omalombwelo oo. Ngeenge ovamwatate ova yandje oitukulwa yavo yOkwoongala kwoPailonga monghedi oyo ya ulikwa pombada, otashi ka ningifa okwoongala ku ‘ningwe monghedi iwa nopashikulafano.’ — 1 Kor. 14:40.