Oitukulwa ya pambafana i na sha nokuhovela omakonakonombibeli
1. Oitukulwa ya pambafana ilipi tai ka kala mOshungonangelo, nelalakano layo olashike?
1 Okudja momudo tau uya, mOshungonangelo otamu ka kala tamu holoka oitukulwa oyo ya nuninwa oku tu kwafela tu hovele omakonakonombibeli. Oitukulwa oyo otai ka kala i na oshipalanyole, “Konakona Eendjovo daKalunga.” Oitukulwa oyo oya nyanyangidwa nelalakano lokukundafana novaneumbo, nonande ovanhu vamwe moshitukulwa shetu otava ka hafela oku i lesha.
2. Oinima imwe ilipi ya kwatelwa moshikalimo shoitukulwa oyo ipe?
2 Oshikalimo shoitukulwa oyo: Oipalanyole nosho yo oupalanyole vanini oi li molupe lomapulo oo tu na okupula omuneumbo eshi hatu kundafana naye. Omishangwa odo da tongomana oda etwa mo ndele inadi tofwa mo, sha ningwa nelalakano opo omuneumbo e di konge odikilila mEendjovo daKalunga. Outendo ova ningwa vaxupi opo tu dule oku va kundafana nomuneumbo poshivelo ashike sheumbo. Moshitukulwa keshe omwa popiwa kutya ngeenge owa hala ouyelele wa wedwa po tala embo Ombibeli otai hongo, naasho otashi ke tu kwafela tu twikile ekonakonombibeli hatu longifa embo olo.
3. Ongahelipi to dulu okulongifa oitukulwa ipe oyo i li mOshungonangelo opo u hovele ekonakonombibeli nomuneumbo poshivelo sheumbo?
3 Nghee hatu dulu okulongifa oitukulwa oyo: Ngeenge to yandje oifo, oto dulu okupula epulo olo tali pendula ohokwe yomunhu le likolelela kwaasho sha kundafanwa unene moshitukulwa shonhumba. Pashihopaenenwa, Oshungonangelo ye 1 Januali yOshiingilisha ile 1 Februali yOshiwambo oya kundafana kombinga yefimano lOmbibeli. Oto dulu okupula omuneumbo to ti: “Mbela oho tale ko Ombibeli i li Eendjovo daKalunga ile embo ashike liwa? [Teelela omunhu a nyamukule.] Ondi na po oshitukulwa shihokwifa apa tashi popi kombinga yoshikundafanwa osho.” Tete lesha epulo lotete, opo nee, lesha okatendo kotete, ndele to kongo omushangwa oo wa etwa mo ndele inau tofwa mo. Ngeenge wa mana okulesha omushangwa, pula vali omuneumbo epulo lokatendo oko, ndele to mu pula a nyamukule. Kundafaneni naye outendo vahapu ngaashi tashi dulika, to longifa omapulo outendo. Ofimbo ino ya, pula epulo la shikula ko, ndele tamu ningi eudafano kutya oto ka aluka naini mu uye mu li kundafane. Ninga omalishuneko komunhu oo oshivike keshe nokukundafana naye ouyelele muhapu oo u li moitukulwa oyo fiyo osheshi we mu etela oshifo sha landula ko. Onghedi imwe vali, oto dulu okupopya nomunhu sha yukilila ndele to mu pula mu konakone naye Ombibeli. Opo nee, longifa oshitukulwa osho shi li mOshungonangelo ndele to mu ulikile nghee ekonakonombibeli hali ningwa.
4. Ongahelipi hatu dulu okulongifa oitukulwa oyo ipe ngeenge hatu ningi omalishuneko?
4 Oto dulu yo okulongifa oitukulwa oyo ipe nomupondo ngeenge to ka talela po ovo ho twaalele oifo ile ngeenge to ningi omalishuneko. Oto dulu okutya: “MOshungonangelo ei omu na oshitukulwa shipe nonda hala oku ku ulikila nghee hashi konakonwa.” Otwa halelela oitukulwa oyo ya pambafana i ka kwafele ovanhu vahapu va “fike meshiivo loshili.” — 1 Tim. 2:4.