Oitukulwa ya pambafana oyo tai tu kwafele moukalele
1. Omalalakano opavali oitukulwa ya pambafana i na oshipalanyole, “Eenghundafana nomuneumbo” oelipi?
1 Omafimbo nomafimbo, mOshungonangelo yomoukalele ohamu kala oitukulwa ya pambafana i na oshipalanyole, “Eenghundafana nomuneumbo.” Oitukulwa oyo oi na omalalakano opavali, okuhonga Ombibeli monghedi tai pendula ohokwe noku tu ulikila nghee hatu dulu okukundafana novanhu oikundafanwa yonhumba, hatu tomhafana navo nelungi. (1 Pet. 3:15) Ongahelipi hatu dulu okulongifa nawa oitukulwa oyo?
2. Ongahelipi hatu dulu okulongifa oitukulwa ya pambafana oyo hai kala mOshungonangelo ngeenge tu li moukalele?
2 Kala ho i longifa moukalele: Oto dulu okukala ho tuvikile oifo yOshungonangelo omo mu na oitukulwa oyo ya pambafana. Ngeenge omuneumbo ile omunhu oo e na ohokwe ile omukonakonimbibeli okwe ku pula epulo ile te ku pataneke shi na sha noshinima shonhumba osho sha kundafanwa moitukulwa oyo, mu pa oshifo omo mu na oshikundafanwa osho ndele tamu shi kundafana naye. Ngeenge ku na oshifo omo mu na oshikundafanwa osho, oto dulu oku shi tapa ko-jw.org.
3. Ongahelipi hatu dulu okukundafana nomuneumbo oshitukulwa shimwe shomoitukulwa ya pambafana?
3 Ongahelipi to dulu okukundafana naumwe oshitukulwa shimwe shomoitukulwa oyo? Ovaudifi vamwe ohava pula omunhu a leshe mokule eendjovo domuneumbo, ofimbo vo tava lesha edi dOndombwedi. Onghedi ei yeenghundafana otai dulu okupondola molwaashi ohai kwafele omunhu e lipule shi na sha noinima oyo a itavela nopehe na okukala e udite ina manguluka. — Deut. 32:2.
4. Ongahelipi hatu dulu okulongifa oitukulwa ya pambafana opo tu lideule fye vene?
4 Lideula ove mwene nosho yo vamwe: Eshi to lesha oitukulwa oyo, yandja elitulemo komishangwa, komafaneko nosho yo konghedi yokutomhafana oyo ya longifwa mo. Tala yo onghedi omo ouyelele wa unganekwa. Opo nee, kendabala okuninga sha faafana eshi to i moukalele. (Omayel. 1:5; 9:9) Omumwameme umwe okwa ti: “Ngeenge to lesha oitukulwa oyo owa fa ashike to longo pamwe nomukokolindjila a pyokoka, oo e shii alushe oinima i li mondjila oyo e na okupopya.”
5. Ongahelipi hatu dulu okukwafela ovakonakonimbibeli ve lilongekidile oukalele?
5 Oto dulu yo okulongifa oihopaenenwa oyo i li moifo opo u kwafele ovakonakonimbibeli ve lilongekidile oukalele. Lesheni ouyelele oo pamwe, to pe omukonakonimbibeli omhito oye a dane onghandangala yomuudifi. Mokuninga ngaho, ovakonakonimbibeli otava ka shiiva nghee ve na okupopila eitavelo lavo nelungi. (Kol. 4:6) Oitukulwa oyo oi li shili onghedi imwe yomeenghedi dihapu omo Jehova he tu kwafele tu ‘wanife po nawa’ oukalele wetu. — 2 Tim. 4:5.