Oshikonga shokushiva ovanhu kEdimbuluko otashi ka hovela mo 17 Marsa

1. Oshikonga shilipi tashi ka hovela mo 17 Marsa?

¹ Omudo keshe, Edimbuluko ohali tu pe omhito yokuhepaululila vamwe kombinga yefyo laJesus. (1 Kor. 11:26) Onghee hano, otwa hala vamwe ve uye okudana Edimbuluko pamwe nafye nokuuda shihapu shi na sha noshali yekuliloyambo oyo Jehova e tu pa pahole. (Joh. 3:16) Neudo oshikonga shokushiva ovanhu kEdimbuluko otashi ka hovela mOlomakaya, mo 17 Marsa. Mbela ino teelela nodjuulufi oku ka kufa ombinga pauyadi moshikonga osho?

2. Ongahelipi hatu dulu okuyandja okafo keshivo?

² Osho hatu dulu okutya: Otashi ka kala shiwa okuninga etwalemo li li pauxupi. Oto dulu okutya: “Mwa lele po. Otwa etela oukwaneumbo weni okafo aka, take mu shivi koshiningwanima shokomudo sha fimanenena osho tashi ka danwa mounyuni aushe momafiku 5 Aprili. Poshiningwanima osho otapa ka yandjwa oshipopiwa shopaMbibeli omo tamu ka yelifwa kutya efyo laJesus ola ningifa shike tashi shiiva nonokutya Jesus ota ningi shike paife. Mokafo aka omwa ulikwa efimbo nonhele opo oshiningwanima osho tashi ka ningilwa moshitukulwa shetu.” Eshi tamu yandje okafo momaxuliloshivike, otamu dulu yo okuyandja oifo ngeenge omu wete tashi wapalele.

3. Ongahelipi hatu dulu okushiva ovanhu vahapu kEdimbuluko ngaashi tashi dulika?

³ Natu shiveni ovanhu vahapu: Natu litulile po elalakano lokushiva ovanhu vahapu ngaashi tashi dulika. Shilipaleka kutya owa shiva ovakonakonimbibeli voye, ovanhu ovo ho ningi omalishuneko kuvo, ovapambele voye, ovanailonga vakweni, ovanafikola vakweni, ovashiinda novashiivikile vamwe vali. Ovakulunhuongalo vomeongalo leni otave ke mu shiivifila shi na sha nanghee tamu ka longa oshitukulwa sheni. Oikonga yetu yokomudo yokushiva ovanhu kEdimbuluko ohai etifa alushe oidjemo iwa. Pashihopaenenwa, eshi omukainhu umwe a li e uya monhele imwe omo mwa li mwa ningilwa Edimbuluko omudo wa dja ko, umwe womovayakuli okwa li e mu lombwela kutya ota dulu oku mu kwafela a mone omuudifi oo e mu shiva. Ndele omukainhu oo okwa li e mu lombwela kutya ke shii mo omunhu wonhumba monhele oyo nokwa ti kutya okwa pewa ashike okafo keshivo komunhu umwe oo a li ta ende eumbo neumbo ongula yefiku olo.

4. Otu na omatomheno elipi okukufa ombinga nouladi moshikonga shokushiva ovanhu kEdimbuluko?

⁴ PEdimbuluko otashi dulika pe ke uye umwe womwaavo wa shiva. Ndele kashi na nee mbudi kutya vamwe vomwaavo ove ke uya kEdimbuluko ile hasho, eenghendabala doye da mana mo otadi ka yandja oundombwedi. Oufo veshivo ovo wa yandja otava ka kwafela vamwe va shiive kutya Jesus paife oku li Ohamba inaenghono. Ngeenge owa kufa ombinga nouladi moshikonga osho, ovanhu moshitukulwa sheni, ovaudifi vakweni, naunene tuu Jehova, otava ka mona kutya owa pandula neenghono oshali yekuliloyambo.— Kol. 3:15.