Kwafela ovanhu va pwilikine kuKalunga
1. Okambo kelipi ka li ka pita poshoongalele shoshitukulwa ‘Ouhamba waKalunga nau uye’! noshike she ka ningifa ka kale oshilongifo shiwa?
1 Poshoongalele shoshitukulwa ‘Ouhamba waKalunga nau uye’! opa li pa pita okambo kape kedina Kala ho pwilikine kuKalunga opo u ka kale nomwenyo fiyo alushe. Molwaashi okambo oko oke na eendjovo dixupi, otaka dulu okutolokwa noupu nomeendelelo. Olutuwiliki ola li la yandja epitikilo opo okambo oko ka tolokwe momalaka 431.
2. Oolyelye tava ka mona ouwa mokambo oko?
2 Oolyelye unene tava ka mona ouwa mokambo oko? Natu ka taleni keenghalo tadi landula odo hadi holoka po luhapu mounyuni aushe:
• Omuudifi ota ningi eenghundafana nomuneumbo, tashi dulika petalelepo lotete ile pelishuneko, nokwa didilika kutya omuneumbo ke shii okulesha ile iha lesha lela nawa.
• Omuudifi ta udifile ovanhu ovo hava popi omalaka omo mwa tolokwa ashike oishangomwa inini ile inamu tolokwa sha nandenande. Ile ovanhu vahapu moshitukulwa kave shii okulesha elaka olo hava popi nawa.
• Omuudifi ta udifile eembolo moshitukulwa shavo ta popi elaka lokuudika.
• Omudali oo a hala okulonga okaana kaye oshili oko kehe shii natango okulesha.
3. Okambo Kala ho pwilikine kuKalunga opo u ka kale nomwenyo fiyo alushe oka unganekwa ngahelipi?
3 Nghee oitukulwa yokambo oko ya unganekwa: Okambo Kala ho pwilikine kuKalunga opo u ka kale nomwenyo fiyo alushe oka nuninwa okukonakona novanhu ovo vehe shii nawa okulesha ile tave lihongo okulesha. Oshileshwa keshe osha hovela nepulo li li kolumosho pombada, olo la nyamukulwa pomapandja avali a landulafana. Pefano keshe ope na eshangelo nosho yo omishangwa da etwa po ndele inadi tofwa mo. Pedu lwopexulilo lomapandja amwe ope na oshimhungu sha mbapekwa pe na oitwa imwe ya wedwa po nomishangwa odo tadi dulu okukundafanwa, she likolelela kokudula kwomukonakoni.
4. Onaini nongahelipi hatu dulu okuyandja okambo oko?
4 Nghee tu na oku ka longifa: Oto dulu okuyandja okambo oko moilonga yeumbo neumbo ngeenge ou wete sha pumbiwa, nokuli nonande oumbo havo tava yandjwa omwedi oo. (Tala oshimhungu “Nghee taka dulu okuyandjwa.”) Oto dulu oku ka yandja ngeenge to ningi elishuneko mokulombwela omuneumbo oo e na ohokwe kutya ou na sha osho wa hala oku mu ulikila ndele to mu pe okambo. Otamu dulu okulesha pamwe eshangelo lefano nomishangwa eshi tamu kundafana efano keshe.
5. Ongahelipi hatu dulu okukwafela ovakonakonimbibeli vetu va ninge exumokomesho?
5 Kwafela omukonakoni a ninge exumokomesho: Otwe lineekela kutya eenghundafana deni otadi ka ningifa omukonakoni a kale e na ehalo okulesha nokukonakona opo a mone eshiivo lokushiiva Jehova kuye mwene. (Eps. 1:1-3; Joh. 17:3) Ashike omukonakoni ita ka kala a wana okuninginifwa ngeenge okwa mane ko okambo oko. Omu na okukonakona embo Ombibeli otai hongo ile oshishangomwa shimwe tashi wapalele osho tashi mu kwafele a mone eshiivo lihapu lOmbibeli.
6. Omolwashike tu na okukala nolupandu omolwoshilongifo shipe shomoukalele?
6 Ovanhu ove na okupwilikina kOmunamapangelo weshito alishe ngeenge ova hala oku ka kala nomwenyo fiyo aushe. (Jes. 55:3) Jehova okwa hala “ovanhu aveshe,” mwa kwatelwa ovo vehe shii okulesha, ve lihonge nghee ve na okupwilikina kuye. (1 Tim. 2:3, 4) Inatu pandula tuu eshi tu na oshilongifo shipe osho hatu dulu okulongifa mokuhonga ovanhu nghee ve na okupwilikina kuKalunga!
[Box on page 3]
Nghee taka dulu okuyandjwa
Ulikila omuneumbo pepandja 2-3, ndele to ti: “Mbela ino hala oku ka kala mounyuni wa tya ngaha? [Teelela omunhu a nyamukule.] Omishangwa oda udaneka [ile u tye, embo eli liyapuki ola udaneka] kutya Kalunga mafiku ota ka ninga ounyuni ou u kale tau monika nawa, mu kale ombili noitamu ka kala eehepele ile omikifi. Natu ka tale kutya oshike osho tu na okuninga opo tu ka kale mo. [Lesha Jesaja 55:3, oo a etwa pepandja 3 pombada.] Ovelishe oyo otai tu lombwele tu “ehene” kuKalunga ‘nokupwilikina’ kuye. Ndele mbela ohatu pwilikine ngahelipi kuKalunga?” Pandja pepandja 4-5 nokukundafana enyamukulo naye. Ngeenge ke na efimbo, mu fiila okambo nokuninga elongekido u aluke mu uye mu kundafane enyamukulo.