Mbela ito dulu okukala ho udifa keenguloshi?
1. Omuhongwanhu umwe okwa ti kutya omuyapostoli Paulus okwa li ha udifa eumbo neumbo efimbo peni?
1 Embo Daily Life in Bible Times ola ti kutya omuyapostoli Paulus luhapu okwa li ha udifa eumbo neumbo “okudja po 4 yokomatango fiyo omokati koufiku.” Katu shii lela ngeenge Paulus osho a li ha ningi ngaho efiku keshe, ndele otu na oushili kutya okwa li e na ehalo ‘lokuninga aishe omolwevangeli.’ (1 Kor. 9:19-23) Osho osha kwatela mo okuliunganeka nawa opo a dule oku ka udifa eumbo neumbo peemhito odo a li ta dulu okupopya novanhu vahapu.
2. Omolwashike okuudifa keenguloshi ku li omhito iwa yokuudifa?
2 Ovaudifi vomoitukulwa ihapu ove na onghedindjikilile yokuudifa eumbo neumbo ongula mokati koshivike. Ndele mbela natango efimbo olo otali wapalele ngoo moshitukulwa sheni? Omukokolindjila umwe okwa popya shi na sha noshitukulwa shavo a ti: “Hanoupu to hange mo ovanhu momaumbo omutenya. Ashike ovanhu vahapu omo hava kala keenguloshi.” Okuudifa keenguloshi otaku dulu okukala omhito iwa yokuudifila unene tuu ovalumenhu onghundana iwa. Luhapu keenguloshi ovanhu ohava kala va manguluka nove na ehalo lokukundafana. Ngeenge omu wete kutya otashi ka kala shiwa okuudifa keenguloshi, ovakulunhuongalo ove na okuunganeka pa kale hapa ningwa elongekido loilonga yomomapya.
3. Ongahelipi hatu dulu okulongifa eendunge dokuyoolola ngeenge hatu udifa konguloshi?
3 Longifa eendunge dokuyoolola: Osha fimana okulongifa eendunge dokuyoolola ngeenge to udifa konguloshi. Pashihopaenenwa, ngeenge owa mono kutya efimbo olo wa ya peumbo lonhumba itali wapalele omuneumbo, ngaashi nande owa hanga ta li ouvalelo, oshiwa oku mu lombwela kutya oto ka aluka nale. Ngeenge okwa laula, kala ofika opo omuneumbo ta dulu oku ku mona, nokutumbula diva edina loye nosho yo osho wa endela. Otashi ka kala yo shiwa okukala tamu longo oovavali, ile mu li ongudu nokukala momapandavanda omo mu na omindilo da tema nawa. Inamu kala hamu udifa kwa toka unene opo muha imbe ovaneumbo va ka kofe kuyele. (2 Kor. 6:3) Ngeenge pomudingonoko wonhumba opa nyika oshiponga konguloshi, indeni po fimbo inaku toka. — Omayel. 22:3.
4. Omanangeko noupuna elipi hatu ka mona ngeenge otwa kala hatu udifa keenguloshi?
4 Omanangeko noupuna: Oukalele ohau kala u hafifa ngeenge otwa yandje oundombwedi. Apa ngoo pe fike okuyandja kwetu oundombwedi, opo ngoo ta pa ka kala pe fike okumona eemhito dokukwafela vamwe va ka “xupifwe nova fike meshiivo loshili.” (1 Tim. 2:3, 4) Mbela ito dulu okuliunganeka nawa opo u kale ho udifa keenguloshi?