Okuyandja oundombwedi mepandavanda monghedi tai pondola
1. Omonghedi imwe ilipi hatu dulu okuhopaenenwa Jesus?
1 Eshi Jesus a li ta wanifa po oukalele waye wokombada yedu, ka li ha ongaonga okupopya novanhu ovo a li ha shakeneke momapandavanda nosho yo meenhele dikwao daaveshe. (Luk. 9:57-61; Joh. 4:7) Okwa li e na etumwalaka la fimana olo a li a hala okulombwela ovanhu vahapu ngaashi tashi dulika. Kunena, oilonga yokuudifa mepandavanda oi li onghedi ya denga mbada yokukwafela ovanhu va likole ounongo wopakalunga. (Omayel. 1:20, OB-1986) Ohatu ka pondola shihapu ngeenge otwa kala hatu katuka eenghatu tu popye novanhu nokulongifa eendunge dokuyoolola.
2. Ongahelipi hatu dulu okukatuka eenghatu ngeenge hatu yandje oundombwedi mepandavanda?
2 Kala ho katuka eenghatu: Ohashi kala shiwa okuya kovanhu u ka popye navo ponhele yokukala ashike u li ofika ile omutumba ponhele yonhumba wa teelela ovo ve uye kwoove. Ngeenge to udifile umwe, kala to limemesha, to tale kuye, to popi we liteelela nosho yo nombili. Ngeenge otamu longo muvahapu, luhapu ohashi kala shiwa okweefa omuudifi umwe oye a popye nomunhu wonhumba ponhele yokuya ko amushe. Owa pumbwa yo okukala ho ningi omalishuneko kwaavo va ulika ohokwe. Ngeenge otashi shiiva, pula omunhu ngeenge otamu dulu okukwatafana vali naye konima eshi mwa mana okukundafana. Ovaudifi vamwe ohava longo oilonga yepandavanda ponhele imwe, naasho ohashi va pe omhito yokupopya novanhu va faafana lwoikando nokukulika ohokwe muvo.
3. Ongahelipi to dulu okulongifa eendunge dokuyoolola ngeenge u li moilonga yepandavanda?
3 Longifa eendunge dokuyoolola: Kala ho longifa eendunge dokuyoolola ngeenge tashi uya pokutokola kutya openi u na okufikama mepandavanda nosho yo kutya oolyelye to dulu okupopya navo. Inashi hala okutya ngeenge to longo mepandavanda ou na okuudifila keshe oo ta piti puove. Onghee hano, owa pumbwa okukala to konenene. Pashihopaenenwa, ngeenge omunhu wonhumba okwa endelela, otashi ka kala shiwa okweefa a pite po. Ngeenge to udifile peenhele domalandifilo, lungama uha ningife oovene veefitola odo va kale ve ku limbililwa. Luhapu ohashi kala shiwa okuudifila ovanhu ngeenge tava di meefitola shi dulife eshi tava i mo. Ngeenge to ka popya nomunhu, ino shi ninga monghedi oyo tai mu tilifa ile tai mu halukifa. Kala yo ho longifa eendunge dokuyoolola ngeenge to yandje oileshomwa. Ngeenge omunhu ita ulike lela ohokwe, oto dulu oku mu pa okatraktate ponhele yoku mu pa oshifo.
4. Omolwashike taku dulu okutiwa kutya oilonga yokuudifa mepandavanda oi li onghedi yokuudifa oyo hai pondola noihafifa?
4 Oilonga yokuudifa mepandavanda ohai tu pe omhito yokukuna eembuto dihapu doshili meni lefimbo lixupi. (Omuud. 11:6) Otashi dulika ovanhu ovo hatu shakeneke momapandavanda ovovo ihatu hange mo momaumbo ngeenge hatu longo eumbo neumbo. Onghee hano, omolwashike ito liunganeke u kale ho kufa ombinga moilonga yokuudifa mepandavanda oyo i li onghedi yokuudifa ihafifa nohai pondola?