Nghee to dulu okumona ouwa mongudu yeni yoilonga yomomapya
1. Ouwa ulipi twa li hatu mono mEkonakono lEmbo lEongalo oo hatu mono natango meengudu doilonga yomomapya?
1 Mbela ino djuulukwa oinima yonhumba oyo ya li oshitukulwa shEkonakono lEmbo lEongalo? Eengudu dEkonakono lEmbo oda li hadi kala dinini nokwa li hatu kala twa manguluka. Osho osha li hashi shi ningi shipu okupanga oukaume oo hau tu kwafele tu kale tu na eitavelo la kola. (Omayel. 18:24) Omukwatelikomesho wekonakono lembo okwa li ha kala e shii eenghalo dakeshe umwe womongudu yavo nohe mu tu omukumo pauhandimwe. (Omayel. 27:23; 1 Pet. 5:2, 3) Ouwa oo ohatu u mono natango okupitila meengudu doilonga yomomapya.
2. Ongahelipi hatu dulu okukatuka eenghatu opo tu pange oukaume navamwe mongudu yetu yoilonga yomomapya, osho shi li odjo yetwomukumo lopamhepo?
2 Katuka eenghatu: Omuvalu wovanhu ovo hava kala meengudu doilonga yomomapya konyala ohau kala u fike pwaao waavo va li hava kala meengudu dekonakono lembo. Eshi hatu longo navakwetu moukalele tu ‘li omuko umwe,’ ohatu ka kala tu na oukaume wopofingo. (Fil. 1:27) Owa longa novanhu vangapi vomongudu yeni? Mbela ito dulu ‘okumbwalangadja’ ngeenge tashi uya poshinima osho? (2 Kor. 6:13) Kakele kaasho, ohatu dulu okushiva vamwe vomongudu yetu omafimbo amwe ve uye kElongelokalunga lOukwaneumbo wetu ile tu lye pamwe navo. Momaongalo amwe, eengudu doilonga yomomapya ohadi ningi omalufo okushiva komusha ovapopi ovatalelipo. Moshivike osho ongudu yonhumba i na olufo lokushiva omutalelipo komusha, ohai ongala i lye pamwe opo i twaafane omukumo, nokuli nonande omupopi oo ita dulu okukala po.
3. Opeemhito dilipi hatu dulu okumona omatalelepo oufita mongudu yetu yoilonga yomomapya?
3 Nonande omaongalo paife ohaa ongala ashike luvali moshivike, osho inashi hala okutya ovaudifi kave na vali okumona omatalelepo oufita a wana. Mongudu keshe omu na omupashukili wongudu oo a nangekwa po a kale ta tu omukumo ovaudifi pauhandimwe noku va deulila oilonga yokuudifa. Ngeenge omupashukili wongudu yeni ina ninga nande onale elongekido a ka longe pamwe naave moukalele, omolwashike ito mu pula mu ka longe pamwe naye? Kakele kaasho, omupashukili woilonga oha talele po ongudu imwe omwedi keshe. Momaongalo omo mu na ovaudifi vanini, omupashukili woilonga ota dulu okuninga omalongekido opo a kale ha talele po ongudu keshe luvali komudo. Mbela oho ningi ngoo omalongekido kuyele opo u dule okuya moukalele fiku omupashukili woilonga te ya okutalela po ongudu yeni?
4. (a) Elongekido loilonga yomomapya ohali unganekwa ngahelipi? (b) Omolwashike tu na okutala ngeenge ohatu dulu okuyandja eumbo letu mu kale hamu ningilwa elongekido loilonga yomomapya?
4 Luhapu ohashi kala shiwa ngeenge ongudu keshe oya kala hai ningi elongekido layo loilonga yomomapya momaxuliloshivike. Ngeenge ongudu keshe oya kala i na onhele yayo opo hai ningile elongekido loilonga yomomapya pefimbo hanga limwe, otashi ka kala shipu kovaudifi okuya kokwoongala kwoilonga yomomapya ile koshitukulwa. Ovaudifi ove na okutukulwa diva nokuya koshitukulwa nopehe na okwoongaonga. Otashi ka kala yo shipu komupashukili wongudu okuyandja filufilu elitulemo kwaavo ve li mongudu yaye. Ndele efimbo limwe otashi dulika eengudu mbali ile dihapu di limbwange mumwe omolweenghalo donhumba. Ngeenge eongalo alishe ohali ningi elongekido loilonga yomomapya pamwe mOlomakaya lotete lomwedi ile konima yEkonakono lOshungonangelo, luhapu ohashi kala shiwa opo ongudu keshe i ongale pamwe nomupashukili wayo oule wominute dinini opo e i unganeke fimbo okwoongala kwoilonga yomomapya inaku xulifwa neilikano. — Tala oshimhungu “Mbela meumbo loye itamu dulu okukala hamu ningilwa elongekido loilonga yomomapya?”
5. Nonande kape na vali Ekonakono lEmbo lEongalo, ohatu dulu okukala nelineekelo lilipi?
5 Nonande kape na vali Ekonakono lEmbo lEongalo, Jehova ota twikile oku tu pa keshe osho twa pumbwa opo tu longe ehalo laye. (Heb. 13:20, 21) Inatu pumbwa sha molwaashi Jehova ohe tu file oshisho. (Eps. 23:1) Ohatu mono omanangeko noupuna mahapu okupitila meengudu doilonga yomomapya. Ngeenge otwa katuka eenghatu ‘nokukuna nepuniko,’ ohatu ka “teya yo nepuniko.” — 2 Kor. 9:6.
[Box on page 6]
Mbela meumbo loye itamu dulu okukala hamu ningilwa elongekido loilonga yomomapya?
Momaongalo amwe, eengudu doilonga yomomapya ohadi limbwange mumwe mexuliloshivike omolwomhumbwe yomaumbo okuningila elongekido. Okwoongala kwoilonga yomomapya oku li oshitukulwa shelongekido leongalo, onghee hano, okuyandja omaumbo etu mu ningilwe okwoongala oko oshi li oufembanghenda munene. Mbela ito dulu okuyandja eumbo loye mu kale hamu ningilwa elongekido loilonga yomomapya? Ino fya ounye molwaashi eumbo loye oli li paunafangwa. Ovakulunhuongalo otava ka tala onhele opo pe na eumbo loye nosho yo oinima ikwao ya faafana naayo ya li hai talika ngeenge taku hoololwa onhele yokuningila ekonakono lembo. Ngeenge owa hala meumbo loye mu kale hamu ningilwa elongekido loilonga yomomapya, alikana shiivifila omupashukili wongudu yeni.