MuNovemba otaku ka yandjwa okafo Onghundana yOuhamba onomola 38
1. Omapulo elipi ovanhu hava pula kombinga yoonakufya, notaa ka nyamukulwa ngahelipi pefimbo loshikonga shomuNovemba?
1 Efyo oli li omutondi wovanhu aveshe, kashi na nee mbudi kutya oveitavelo lilipi. (1 Kor. 15:26) Ovanhu vahapu ohave lipula kutya oonakufya ove li peni nonokutya ohatu ke va mona ngoo vali. Onghee hano, omaongalo Eendombwedi daJehova mounyuni aushe otaa ka kufa ombinga moshikonga shoule womwedi shokuyandja okafo Onghundana yOuhamba onomola 38, ke na oshipalanyole, “Oonakufya otava dulu ngoo shili okukala vali nomwenyo?” Oshikonga osho she likalekelwa otashi ka hovela mu 1 Novemba. Konima ngeenge oshikonga osho osha xulu, okafo oko otaka dulu okulongifwa moukalele ngaashi oufo vakwao.
2. Okafo Onghundana yOuhamba onomola 38 oka unganekwa ngahelipi?
2 Nghee okafo oko ka unganekwa: Okafo Onghundana yOuhamba onomola 38 oka dutwa haka dulu okutonywa nawa opo epulo lako loshipalanyole likumwifi li kale li liwetikile, olo tali ti: “Oto ti ngahelipi . . . heeno? ahowe? shiimba ngoo?” Ngeenge omuleshi okwa pandje okafo meni, ota ka mona enyamukulo lopaMbibeli kepulo olo loshipalanyole, nonokutya ouwa ulipi ta ka mona ngeenge okwa shiiva osho Ombibeli ya udaneka. Ota ka mona yo omatomheno kutya omolwashike ta dulu okwiitavela osho Ombibeli tai ti. Konima yokafo oku na epulo lihokwifa olo tali diladilifa moule omuleshi nota ladipikwa yo opo e lihonge shihapu.
3. Okafo Onghundana yOuhamba onomola 38 otaka ka yandjwa ngahelipi?
3 Nghee taka ka yandjwa: Oshikonga osho osha faafana ashike noikonga ikwao, ngaashi yokushiva ovanhu kEdimbuluko nosho yo koshoongalele shoshitukulwa. Ovakulunhuongalo otava ka shiivifila eongalo kutya otali ka longa ngahelipi oshitukulwa shalo, tava landula omalombwelo oo e li monhumwafo ye 1 Aprili 2013. Omaongalo oo ehe na oshitukulwa sha kula, otaa dulu okupula a ka kwafele omaongalo opoushiinda a mane ko oitukulwa yao. Natu dimbulukeni kutya omuudifi keshe oku na okukala ashike ha kufa oufo va henena okulongifa momukokomoko woshivike. Pefimbo loshikonga, ngeenge ovaudifi va mane okulonga eumbo neumbo, otava dulu yo okuyandja oufo ovo peemhito dikwao. Ngeenge oufo aveshe ova pupo filufilu mokati komwedi, ovaudifi otava dulu okutwikila okuyandja oileshomwa oyo i na okuyandjwa omwedi oo. Ponhele yokuhovela omakonakonombibeli mOlomakaya lotete lomwedi woshikonga, ohatu ka yandja elitulemo kokuyandja okafo. Ashike momaxuliloshivike, otu na okuyandja okafo oko pamwe noifo, ngeenge omhito otai shi pitike. Mbela owa hovela ngoo okuninga omalongekido opo u ka kufe ombinga pauyadi moshikonga osho she likalekelwa?