Okushiva ovanhu koshoongalele
1. Oshikonga shokushiva ovanhu koshoongalele otashi ka hovela naini?
1 Natu tye nee ngeno oto diladila okulongekida eendja odo tadi ku pula efimbo nosho yo oimaliwa ihapu opo mu ka lye pamwe nookaume ile novapambele voye. Mbela ito ka kala wa tunhukwa eshi to va shivi? Sha faafana, osha pula oilonga ihapu okulongekida oitendele yopamhepo oyo tai ka kala poshoongalele shoshitukulwa osho twa taalela. Fimbo ku na oivike itatu oshoongalele shi fike, Jehova okwe tu pa oufembanghenda wokushiva ovanhu va ka kale poshoongalele. Oshike tashi ke tu kwafela opo tu ka shive ovanhu nexwamo?
2. Oshike tashi ke tu linyengifa opo tu kufe ombinga pauyadi moshikonga?
2 Ngeenge otwa dilonga nolupandu kouwa oo hatu mono pauhandimwe moitendele yopamhepo oyo Jehova hetu pe poyoongalele, otashi ke tu linyengifa tu kufe ombinga pauyadi moshikonga. (Jes. 65:13, 14) Otu na yo okudimbuluka kutya oikonga oyo hatu ningi omudo keshe ohai eta oidjemo iwa. (Tala oshimhungu “Oshikonga ohashi eta oidjemo iwa.”) Ovanhu vamwe ovo hatu ka shiva otava ka kala poshoongalele pamwe nafye, ofimbo vamwe itave ke uya. Kashi na nee mbudi kutya vangapi tave ke uya, ngeenge otwa ningi eenghendabala da mana mo otashi ka fimanekifa Jehova notashi ka ulika kutya oha yandje nehalo liwa. — Eps. 145:3, 7; Eh. 22:17.
3. Okafo keshivo otaka ka yandjwa ngahelipi?
3 Olutu lovakulunhuongalo keshe oli na okutokola nghee eongalo tali ka longa oshitukulwa shalo, mwa kwatelwa ngeenge ovaudifi otava ka fiya po okafo pomaumbo oo ehe na ovanhu ile ngeenge otaka ka yandjwa peenhele daaveshe moshitukulwa. Eshi hatu yandje oifo momaxuliloshivike ohatu dulu okuyandja yo okafo keshivo apa tashi wapalele. Shimha oshikonga shapu, itatu ka kala tuu twa hafa eshi tu shii kutya otwa kufa ombinga nouladi notwa shiva ovanhu vahapu ngaashi tashi dulika opo ve tu waimine koitendele yopamhepo oyo Jehova a longekida!