Oshikonga osho hashi eta oidjemo iwa
Fimbo ku na oivike itatu oshoongalele shi hovele, omaongalo ohaa kufa ombinga mokuninga oikonga opo a dule okushiva ovanhu moitukulwa ovo ve na ohokwe. Ope na omatomheno mawa okukufa ombinga moshikonga shokomudo. Ovo hava tambula ko eshivo letu ndele tave uya koshoongalele, luhapu ohava kala va tunhukwa koipopiwa yopamishangwa, nghee oinima aishe ya unganekwa nawa kovaliyambi, kelihumbato liwa nosho yo oukumwe oo hatu ulike. (Eps. 110:3; 133:1; Jes. 65:13, 14) Kakele kaasho, mbela ohatu mono oidjemo iwa moikonga yetu, unene tuu moitukulwa omo vamwe ovo ve na ohokwe ve na okweenda oinano ile opo ve uye koshoongalele?
Konima yoshoongalele shoshitukulwa shomo 2011, oshitaimbelewa osha li sha yakula onhumwafo ya dja komukainhu umwe oo a hanga okafo keshivo koshi yomuvelo waye. Okwa kala alushe ha hondama ngeenge Eendombwedi daJehova tadi konghola pomuvelo waye. Okwa shanga a ti: “Ondi na eumbo liwa, omushamane e li nawa, nonda li ndi wete ndi na keshe shimwe osho tashi hafifa nge. Shinyikifa oluhodi, natango kanda li nda hafa, nonghalamwenyo yange kaya li i na elalakano. Onda li nda tokola okushinga oshinano sheekilometa 320 opo ndi ka kale poshoongalele mOlomakaya.” Okwa li a hafela oshoongalele neenghono nokwa li a dengela omushamane waye e mu lombwele kutya ota nangala opo a dule okukala poshoongalele nomOshoondaxa. “Onda li nda pwilikina oipopiwa aishe, nda shakeneka Eendombwedi daJehova dihapu, nokanda li nda hala oshoongalele shi pwe.” Konima eshi e uya keumbo, okwa hovela ekonakonombibeli nokonima yeemwedi nhee okwa ninga omuudifi ina ninginifwa. “Onda hafa unene eshi nda hanga okafo keshivo koshi yomuvelo wange molwaashi paife onghalamwenyo yange oi na elalakano!”
Ovanhu vamwe ovo hava mono okafo keshivo oha ve uya koshoongalele. Onghee hano, natu kaleni tu na ouladi wokukufa ombinga moshikonga osho sha fimana. Etelela oufo ovo va xupa po koshoongalele, opo u va longife okuyandja oundombwedi wohangelela.
[Oshimhungu shi li pepandja 5]
Ongahelipi hatu dulu okuyandja okafo keshivo?
Opo tu shive ovanhu vahapu moshitukulwa shetu, otwa pumbwa okuninga etwalemo li li pauxupi. Ohatu dulu okutya: “Mwa lele po! Ohatu kufa ombinga moshikonga shokushiva ovanhu koshoongalele osho tashi ka danwa mounyuni aushe. Okafo koye oko aka. Ouyelele muhapu u na sha noshoongalele osho owa yelifwa mokafo oko.” Popya nexwamo. Ngeenge to yandje okafo oko momaxuliloshivike, oto dulu yo okuyandja oifo opo tashi wapalele.