Okutwaalela vamwe oifo pandjikilile ohaku tu kwafele tu hovele omakonakonombibeli
1. Omolwashike ehangano laJehova la kala nokuladipika ovaudifi va kale hava twaalele ovanhu oifo pandjikilile?
1 Ovanhu vahapu ihava kala va hala okukonakona Ombibeli nafye, ashike ohava hafele okulesha oifo yetu. Onghee hano, ehangano laJehova ola kala tali ladipike ovaudifi va kale hava twaalele ovanhu oifo pandjikilile. Eshi ovanhu tava lesha oifo yetu pandjikilile, luhapu ohava hovele okukala va hokwa Eendjovo daKalunga. (1 Pet. 2:2) Mokweendela ko kwefimbo, otashi dulika va leshe oshinima shonhumba osho shihokwifa kuvo, notashi va ningifa va tambule ko ekonakonombibeli.
2. Ongahelipi hatu dulu okukulika ohokwe yovanhu ovo hatu twaalele oifo pandjikilile?
2 “Tekela” eembuto doshili: Ponhele yokuyandja ashike oifo komuneumbo ndele to i, ninga eenghundafana nokukendabala okupanga oukaume naye. Osho otashi ke ku kwafela u shiive eenghalo daye, osho e na ohokwe musho naasho a itavela, nokungaho, oto ka dula okupopya naye pandunge. (Omayel. 16:23) Kala ho lilongekidile etalelepo keshe. Ngeenge otashi shiiva, yelifa pauxupi oshitwa osho shi li moifo nomushangwa oo we shi pamba, opo u tekele eembuto keshe doshili odo di li momutima waye. (1 Kor. 3:6) Didilika efiku keshe olo wa talela po omunhu, oshileshomwa osho we mu fiila nosho yo oikundafanwa nomishangwa odo mwa li mwa kundafana.
3. Olungapi tu na okushuna kovanhu ovo hatu twaalele oileshomwa yetu pandjikilile?
3 Olungapi u na okuninga omalishuneko? Ou na okushuna ko lumwe momwedi opo u twaalele ovo ho talele po oifo oyo opo ya piti. Ashike oto dulu okushuna ko lwoikando she likolelela keenghalo doye nokohokwe yomunhu. Pashihopaenenwa, konima yoshivike shimwe ile ivali okudja eshi wa fiya po oifo, oto dulu okushuna ko, to ti, “Onde uya po ashike ndi ku yelifile pauxupi oshinima shimwe osho shi li moifo oyo nda li nde ku fiila.” Osho otashi ke mu kwafela a kale a hala okulesha oshitukulwa shonhumba. Ngeenge okwe shi lesha nale, oto dulu oku mu pula kutya ota ti ngahelipi kombinga yoshitukulwa osho noku shi kundafana naye pauxupi. Ile ngeenge omunhu oha hafele okulesha oileshomwa yetu, oto dulu okushuna ko noku mu ulikila okafo, okambo ile embo olo tali yandjwa omwedi oo.
4. Omafimbo nomafimbo, oshike tu na okuninga opo tu mone ngeenge ovo hatu twaalele oifo pandjikilile ove na ohokwe yokukonakona Ombibeli?
4 Ino teelela omuneumbo oye e ku pule ekonakonombibeli, ndele oove u na okuninga eenghendabala u mu pule. Nonande okwa li a anya okukonakona Ombibeli nale, efimbo nefimbo oto dulu oku mu ulikila oshitukulwa shomOshungonangelo, “Omapulo opaMbibeli a nyamukulwa,” nokutala ngeenge okwa hala mu shi kundafane naye. Oto dulu okuhovela ekonakonombibeli loposhivelo sheumbo. Ashike, ngeenge ito dulu okuhovela ekonakonombibeli, oto dulu okutwikila okukala ho mu twaalele oifo opo u kulike ohokwe yaye.