Xwepopaleka ounghulungu woye moukalele, mokukala ho twaalele vamwe oifo pandjikilile

Omolwashike sha fimana: Ovanhu vahapu ovo hava hafele okulesha oifo yetu ihava kala va hala okukonakona Ombibeli nafye. Otashi dulika ve udite va wanenwa kelongelokalunga lavo ile ve wete vehe nefimbo lokukonakona. Kakele kaasho, eshi tava lesha oifo yetu pandjikilile otashi dulika va kale ve na ohokwe yEendjovo daKalunga. (1 Pet. 2:2) Otashi dulika oshitukulwa shimwe shi kume omitima davo ile eenghalo davo di lunduluke. Ngeenge otwa kala hatu va talele po pauxupi, otashi ke va kwafela va kale ve tu mangulukila nohatu ka shiiva oinima oyo ve na ohokwe muyo naasho tave lipula nasho. Mokweendela ko kwefimbo, otashi dulika va hovele ekonakonombibeli.

Nghee to dulu oku shi ninga:

Omwedi keshe, unganeka efimbo u twaalele oohandimwe oifo ipe yOshungonangelo no-Awake! Oto dulu yo okukala ho mu talele po omafimbo amwe momwedi opo u kulike ohokwe yaye yokulesha oshitukulwa shomoifo oyo we mu fiila ile u mu twaalele oshishangomwa osho tashi yandjwa omwedi oo. Ninga omadidilikoshango. — Tala okafo Oukalele Wetu wOuhamba kaJanuali 2014, ep. 3.
Lilongekidila etalelepo keshe. Ponhele yokuyandja ashike oifo ndele to i, ninga eenghundafana nokukendabala okupanga oukaume naye opo u kulike ohokwe yaye.
Konga eemhito dokuhovela omakonakonombibeli. Ngeenge umwe oo ho twaalele oifo okwe ku pula osho Ombibeli tai hongo moshinima shonhumba, mu etela oshishangomwa osho shi na enyamukulo nokukundafana naye kombinga yasho. Fimbo ino ya, mu fiila epulo olo tamu ka kundafana oshikando tashi uya. Ngeenge ohamu kundafana pandjikilile pauxupi tamu longifa Ombibeli ile shimwe shomoishangomwa yetu, kungaho oto ningi ekonakonombibeli. Mbela owa yandjele ngoo nande onale okambo Onghundana iwa komuneumbo noku mu ulikila pauxupi nghee ekonakonombibeli hali ningwa? Mbela owe mu ulikilile ngoo okavidio Omolwashike u na okukonakona Ombibeli? nosho yo Ekonakonombibeli ohali ningwa ngahelipi? Nonande omunhu kali a tambula ko ekonakonombibeli potete, eenghalo ohadi dulu okulunduluka. Mbela itashi ke ku etela ouwa ngeenge owa kendabala natango?

Kendabala okuninga ngaha momukokomoko womwedi:

Shanga omusholondodo womadina aavo to dulu okutwaalela oifo pandjikilile. Va pa oifo oyo opo ya piti noku va lombwela kutya oto ke va etela oyo tai ka landula ko.