Xwepopaleka ounghulungu woye moukalele, mokuninga omatwalemo a longekidwa

Omolwashike sha fimana: Ngeenge etwalemo letu itali pendula ohokwe, omuneumbo otashi dulika a kangheke eenghundafana manga inatu mu udifila. Onghee hano, ovaudifi vahapu ohava mono kutya etwalemo lavo ola fimanenena. Nonande mokafo Oukalele Wetu wOuhamba nosho yo membo Reasoning ohamu kala oihopaenenwa yomatwalemo, haalushe hai kala ya kwatela mo ouyelele aushe, opo shi tu pe omhito yokuninga mo omalunduluko apa sha pumbiwa. Nokuli nonande oihopaenenwa yomatwalemo oya kwatela mo ouyelele aushe, ovaudifi otava dulu oku a lundulula ile okulilongekida avo vene. Kungaho, ohatu ka pondola neenghono ngeenge otwe lilongekida nawa etwalemo ponhele yokupopya ashike keshe osho tashi uya momadiladilo shimha omuneumbo e tu pitike. — Omayel. 15:28.

Nghee to dulu oku shi ninga:

Hoolola oshikundafanwa. Oshikundafanwa shoye oshi na okukala sha kanghamena koshileshomwa osho to yandje nokukala tashi hokwifa ovanhu vomoshitukulwa.
Lilongekida nawa etumbulo lotete ile avali oo to ka popya konima eshi wa popifa monghedi oyo ya tambulwa ko moshitukulwa sheni. Oto dulu okuhovela to ti: “Onde uya oku mu talela po molwaashi . . . ,” “Ovanhu vahapu otave lipula shi na sha . . . ,” “Onda hala okuuda kutya ove oto ti ngahelipi . . . ,” nosho tuu. Luhapu etumbulo lixupi noli li paunafangwa ohali pondola. Ovaudifi vamwe ove hole okweendulula momutwe omatwalemo avo.
Duta epulo olo tali ka pendula ohokwe yomuneumbo notali mu linyengifa a kufe ombinga meenghundafana. (Mat. 17:25) Dimbuluka kutya otashi dulika a li ta diladila kombinga yoinima imwe fimbo ino uya, onghee hano ino mu pula epulo lidjuu unene ile olo tali mu fifa ohoni.

Kendabala okuninga ngaha momukokomoko womwedi:

Longifeni efimbo pefimbo lelongelokalunga loukwaneumbo weni opo mu lilongekide nokuliendifa po pomatwalemo eni.
Ngeenge u li moukalele, kundafana novaudifi vakweni osho to ka popya. (Omayel. 27:17) Lundulula etwalemo loye ngeenge ou wete itali pondola.