Oshimhungu Shomapulo

◼ Ounona ove na okulihonga kombinga yashike opo va kule pamhepo?

Ovadali Ovakriste ove na okuninga shihapu opo va tekulile ounona vavo “meduliko nomekumaido lOmwene.” (Ef. 6:4) Pashihopaenenwa, ovadali ohava mono hashi eta ouwa okukundafana omushangwa wefiku ongula keshe pamwe novana. Pefimbo lelongelokalunga loukwaneumbo nopeemhito dikwao, omaukwaneumbo otashi dulika a tale nokukundafana okavidio pamwe, a kundafane ouyelele wokondadalunde oo u li moitukulwa yo-Young People Ask, a dane oshinyandwa she likolelela kehokololo lOmbibeli ile a ninge omadeulo. Ashike nande ongaho, opo ounona va ‘lalakanene oukulunhu,’ ove na yo okuhongwa eeshili domoule dOmbibeli. — Heb. 6:1, NW.

Diladila kwaasho hatu hongo ovo hatu shakeneke moukalele. Petalelepo lotete ile eshi twa ninga omalishuneko onhumba, luhapu ohatu kendabala tu hovele ekonakonombibeli hatu longifa embo Ombibeli otai hongo lela shike? Shimha twe li mane ko, ohatu longifa embo “Likalekeni mohole yaKalunga.” Omolwashike? Embo Ombibeli otai hongo ohali kwafele ovakonakoni va mone eshiivo lopehovelo lomishangwa. Embo “Ohole yaKalunga” ohali va hongo nghee ve na okutula moilonga omafinamhango Ombibeli mokukalamwenyo kwavo. Oishangomwa aishe oyo ohai kwafele ovo vape opo va ‘twame’ muKristus “nokulipamekela meitavelo.” (Kol. 2:6, 7) Mbela ounona vetu navo itava ka mona ouwa mouyelele oo? Navo ova pumbwa okuhongwa kombinga yekulilo, yOuhamba nosho yo yonghalo yoonakufya. Ounona ova pumbwa yo okushiiva kutya omolwashike Kalunga a efa pa kale okumona oixuna nonghee tava dulu okudidilika mo omafiku axuuninwa onghalelo ei yoinima. Ove na okukala va tomhwa kutya elongelokalunga lEendombwedi daJehova olashili. Ovanyasha ova pumbwa yo okuuda ko omafinamhango Ombibeli nonghee tava dulu okudeula “eenghono davo dokukoneka.” (Heb. 5:14, NW) Oshoshili kutya ovadali ove na okutala komido nokokudula kwounona vavo. Ashike, ounona vahapu ohava dulu okuhovela okulihonga eeshili domoule dOmbibeli nokuli nonande ovanini. — Luk. 2:42, 46, 47.