Longifa o-jw.org moukalele, “Ninga kaume kaJehova”

Ko-jw.org koshi yoshipalanyole “Bible Teachings” > “Children” > “Become Jehovah’s Friend,” oku na outukulwa va pamba ounona ovo va kwatela mo omaimbilo, ouvidio noinyangadalwa. Kakele kaasho, ouvidio vamwe vomwaavo otava hangwa ko-jw.org/kj mOshikwanyama koshi yokapalanyole “Oishangomwa” > “Ouvidio.” Oho longifa ngoo ouvidio ovo moukalele? Ngeenge oho konakona Ombibeli nomudali oo e na ounona vanini, omolwashike iho mu ulikile ouvidio ovo? Osho otashi dulika shi ke mu linyengife a kale hai koitukulwa ikwao oyo i li ko-Web site yetu.

Omumwatate umwe omanga a li ta yandje okafo Onghundana yOuhamba onomola 38, okwa li a shakeneka omukainhu oo a li a hovela okulesha okafo diva konima eshi e ke mu pa. Okwa li e na ounona ovo va li va hala okuuda nawa kombinga yokafo. Omumwatate okwa li e mu yelifila pauxupi oshikalimo shokafo noku mu ulikila o-Web site yetu oyo i li konima yokafo. Molwaashi omukainhu oo okwa li ta ulike ohokwe, okwe mu danena okavidio kamwe komouvidio vaKaleb pamwe nounona vaye a longifa ongodi yaye yopeke.

Omumwameme umwe okwa li a lombwela omunailonga pamwe naye oo e na ounona vanini kombinga yo-Web site yetu nosho yo ouyelele oo u li ko wa pamba omaukwaneumbo. Omukainhu oo okwa li a ka tala ko ko-Web site yetu pamwe nounona vaye. Lwanima, okwa li a lombwela omumwameme kutya ounona vaye okwa li tava endaenda neumbo alishe tava imbi “Preach the Word” (“Udifa Ondjovo,”) eimbilo limwe lomomaimbilo oo e li koshi yoshitukulwa “Become Jehovah’s Friend” (“Ninga kaume kaJehova.”)

Kendabala okushiiva nawa oitukulwa oyo i li ko-jw.org nokutapela mongodi yoye kamwe komouvidio, omaimbilo ile oinyangadalwa oyo. Osho otashi ke ku kwafela u dule okulongifa nawa oshitukulwa eshi sho-jw.org moukalele. Kashi fi tuu oshilongifo sha denga mbada osho tashi dulu oku tu kwafela tu longele Omwene! — Oil. 20:19.