Nghee hatu dulu okuudifa hatu longifa outemba noitaafula yoileshomwa

Okuudifa hatu longifa outemba noitaafula yoileshomwa okwa ulika kutya oku li onghedi hai pondola filufilu mokunanena ovanamitimadiwa koshili. (Joh. 6:44) Onghee hano, ovakulunhuongalo ova kala nokuladipikwa va unganeke onghedi yokuudifila meenhele daaveshe moitukulwa yeongalo lavo omo mu na ovaendi vokolupadi vahapu. Molwaashi okatemba ile oshitaafula ihashi kala po efimbo alishe inashi fimana okupula epitikilo kovapangeli. Oolyelye va wana okukufa ombinga monghedi yokuudifa oyo? Ovaudifi ovo ve na eendunge dokuyoolola, have lihumbata monghedi yefimaneko nove shii okukundafana novanhu. Natu ka taleni koinima oyo tu na nosho yo tuhe na okuninga oyo tai ke tu kwafela tu pondole tu li ovaudifi.

Osho tu na okuninga:

Kala to ulike oukaume, to kwafele ovo tava ende po noku va tambula ko. Ovaudifi vamwe ohave limemesha tashi di komutima nohava popifa neendjovo doukaume. Ngeenge omunhu oo ta piti po ota tale nawa kokatemba ile koshitaafula, oto dulu kutya, “Ngeenge owa hala oto dulu okukufa po oshileshomwa.”
Kala kokule kanini oshiyeleke noshitaafula ile nokatemba. Moitukulwa imwe ovaudifi ohava pondola ngeenge ova kala ofika kokule kanini nokatemba ile noshitaafula. Ovaudifi vamwe ohava mono kutya onghedi oyo ohai ningifa ovo tava ende po va kale tava ongaonga okufikama po, onghee ohava fikama kokule vali va teelela fiyo osheshi pe uya umwe. Ngeenge omunhu okwe uya poshitaafula, kendabala okukundafana naye. Oto dulu oku mu pula kutya, “Mbela owe lipulile nale epulo eli?”
Kala ho longifa Ombibeli luhapu ngaashi tashi dulika.
Yelifa nghee ekonakonombibeli hali ningwa kukeshe oo ta kufa po shimwe shomoishangomwa yetu yokukonakonwa, ngaashi okambo Ombibeli otai hongo. Mu danena yoo okavidio Omolwashike u na okukonakona Ombibeli?
Kufa ko ouyelele waavo va ulika ohokwe ngeenge otashi shiiva.