Elimemesho la eta ouwa!

Helen te limemesha eshi e li pokatemba koishangomwa. Ovakainhu vavali tava ende po.

OVAKAINHU vavali ovanyasha ova li tava ende ponhele yomangeshefelo moshilando Baguio, shaPhilippine. Ova li va mona okatemba koishangomwa, ashike inava ya po. Omumwameme Helen, oo a li ofika pokatemba, okwa li te limemesha nohamu te va tale. Ovakainhu ovo ova li va twikila nondjila yavo, ashike ova li va kuminwa okulimemesha nohamu kwaHelen.

Lwanima, eshi ovakainhu ovo va li va finda keumbo ve li mobesa, ova li va mona edidiliko linene lo-jw.org olo la li kOlupale lOuhamba. Ova dimbuluka kutya eendada odo oda faafana naado va mona kokatemba koishangomwa. Aveshe ova li va dja mo mobesa nokutala elandulafano li na sha nokwoongala kwomaongalo a yoolokafana olo la li komuvelo woluumbo lOlupale lOuhamba olo.

Ovakainhu ovo tuu ovo vavali tave limemesha eshi va mona Helen mOlupale lOuhamba.

Ovakainhu ovo vavali ova li ve uya kokwoongala kwa shikula ko. Mbela olyelye va mona tete eshi ve uya mOlupale lOuhamba? OHelen! Ova li va didilika diva kutya oye winya va mwene te limemesha. Helen okwa ti: “Onda li nda tila eshi nda mona ovakainhu ovo tava ende va finda kwaame. Onda li handi diladila kutya pamwe ope na sha sha puka osho nda ninga.” Ashike ovakainhu ovo ova li va yelifila Helen kutya ove mu mona pokatemba koishangomwa.

Ovakainhu ovo ovanyasha ova li va tyapula okwoongala nosho yo eendafano, nova li ve udite ouumbo. Eshi va mona ovanhu tava wapaleke olupale konima yokwoongala, ova li va pula ngeenge navo otava dulu okukwafela. Umwe womovakainhu ovo paife okwa fiya po oshilongo, ashike mukwao ohe uya kokwoongala nokwa hovela okukonakona Ombiibeli. Oidjemo aishe oyo oya etifwa ashike kelimemesho.