Ovakwatelikomesho ovo va shiya ko mouhaku ova londwela kutya omakwatafano opaintaneta otaa dulu okukuma neenghono ovanyasha — Ombiibeli otai ti ngahelipi?

Mo 23 Mei 2023, ovakwatelikomesho ovo va shiya ko mouhaku moUnited States ova londwela kutya omakwatafano opaintaneta okwa kuma neenghono ovanyasha.

•  O-The U.S. Surgeon General’s Advisory, 2023 oya popya shi na sha nomakwatafano opaintaneta nosho yo oupyakadi wopamadiladilo movanyasha, ya ti: “Nonande eenhele dokointaneta ohadi kwafele ounona vamwe nosho yo ovanyasha, ope na omaumbangi mahapu, oo taa ulike kutya eenhele dokointaneta ohadi kumu neenghono pamadiladilo nopalutu ounona novanyasha.”

Odjo oyo oya yandja omatomheno kutya omolwashike.

•  Ovanyasha ovo ve na eedula 12 fiyo 15, “ovo hava longifa omakwatafano opaintaneta oule weevili di dulife punhatu efiku keshe, ovo unene hava kala oshihakanwa shokukwatwa koupyakadi wopamadiladilo.”

•  Ovanyasha vomido 14, “ngeenge tava longifa omakwatafano opaintaneta, ihava dulu naanaa okukofa nawa, hava ulwa omalaka mai okupitila mointaneta, ve na etaleko lii li na sha nomalutu avo, ve udite vehe na oshilonga, hava kwatwa kepolimano noupyakadi wa tya ngaho ohau hange unene ovanyasha oukadona shi dulife ovamati.”

Ongahelipi ovadali tava dulu okwaamena ovana koupyakadi wa tya ngaho? Ombiibeli otai yandje omaetepo taa longo e na sha naasho.

Osho ovadali tava dulu okuninga

Katuka eenghatu. U li omudali, shiiva oupyakadi oo wa kwatelwa mo nokutokola, ngeenge oto ka pitika okaana koye ka longife omakwatafano opaintaneta, ile hasho.

•  Efinamhango lOmbiibeli: “Omona woye omumati, mu ikifa ondjila yaye ya yuka.” — Omayeletumbulo 22:6.

•  Opo u lihonge shihapu, lesha oshitukulwa “Should My Child Use Social Media?”

Ngeenge owa pitike okaana koye ka kale haka longifa omakwatafano opaintaneta, lungamena omaupyakadi oo taa dulu okuholoka po nokukala u shii oinima oyo haka ningi, ngeenge taka longifa ointaneta. Ongahelipi to dulu okuninga ngaho?

Amena okaana koye koinima oyo ya nyika oshiponga. Ka deula ka kale haka didilike mo nokuhenuka oinima oyo ya nyika oshiponga.

•  Efinamhango lOmbiibeli: “Mokati keni inamu tumbulwa oluhaelo, owii keshe ile olwisho, elihumbato lififa ohoni, okupopya kwa nyika oulai ile omashendjo oulai.” — Ovaefeso 5:3, 4.

•  Opo u mone omaetepo, lesha oshitukulwa “Teaching Your Teenager Social Media Safety.”

Tula po ongaba. Pashihopaenenwa, tula po eemhango kutya onaini okaana koye ta ka dulu okulongifa omakwatafano opaintaneta nonokutya oule wefimbo li fike peni.

•  Efinamhango lOmbiibeli: ‘Pashukileni eenghatu deni mu ende . . . ngaashi ovanaendunge, Longifeni nawa efimbo.’ — Ovaefeso 5:15, 16.

•  Longifa okavidio kokoshipelende Lungamena omakwatafano opaintaneta, opo u kwafele okaana koye ka mone kutya omolwashike sha fimana okulitulila po omangabeko.