Olyelye ta ka xupifa ovakwashiwana? — Ombiibeli otai ti ngahelipi?

Oiwana ya Hangana oya popya ya ti:

• Okudja momafiku 7-23 Oktoba 2023, oita oyo i li pokati kaGaza naIsrael oya twaalela eemwenyo dovanhu ve dulife po 6 400 nokulemaneka 15 200, navahapu vomuvo ovakwashiwana. Shikwao vali, ovanhu omayovi omafele ova fininikwa va fiye po omaumbo avo.

• Okudja mo 24 Septemba 2023, oita oyo i li pokati kaRussia naUkraine oya twaalela eemwenyo dovakwashiwana 9 701, ofimbo ovo va lemanekwa 17 748 moUkraine.

Eteelelo lilipi tali hangwa mOmbiibeli tali dulu okuhekeleka ovo tava mono oixuna koita?

Etomheno lokukala neteelelo

Ombiibeli oya xunganeka kutya Kalunga ota ka “xulifa po oita kombada yedu alishe.” (Epsalme 46:9) Ota ka longifa epangelo laye lomeulu, ile Ouhamba, opo a pingene po omapangelo aeshe opanhu. (Daniel 2:44) Ouhamba waKalunga otau ka etela ovanhu epepelelo.

Didilika osho Jesus Kristus, oo e li Ohamba yOuhamba waKalunga, ta ka ninga:

• “Otai ka xupifa epongo eli tali kuu onghuwo li kwafwe, nomukwanaluhepo ou ehe na omukwafi. Otai ningile omuxupi nohepele olukeno, notai xupifa eemwenyo deehepele; ndele tai di kulile momafininiko nomomalwifo.” — Epsalme 72:12-14.

Koshi yOuhamba waye, Kalunga ota ka xulifa po okumona oixuna akushe oko kwa etifwa po koita nosho yo koilonga youkolokoshi.

• “Ota ka feta po omahodi aeshe momesho avo, nefyo itali ka kala po vali, ile oluhodi, okulila nouyahame itau ka kala po vali. Oinima ikulu oya xula po.” — Ehololo 21:4.

Mafiku, Ouhamba waKalunga otau ka ya mo olunyala moiningwanima oyo tai ningwa kombada yedu. Ombiibeli oya hangwa nale ya xunganeka kombinga ‘yoita neenghundana di na sha noita’ odo di li ko kunena. (Mateus 24:6) Oiningwanima ei nosho yo ikwao otai ulike kutya otu li “momafiku axuuninwa” omapangelo opanhu. — 2 Timoteus 3:1.