Jesus ota ka xulifa po oluhepo

Eshi Jesus a li kombada yedu, okwa li a ulikila ovanhu ohole inene unene tuu eehepele naavo va wililwa po. (Mateus 9:36) Okwa li nokuli a yamba po omwenyo waye, opo ovanhu va mone ouwa. (Mateus 20:28; Johannes 15:13) Mafiku, ota ka ulikila natango ovanhu ohole, eshi ta ka longifa eenghonopangelo daye e li Ohamba yOuhamba waKalunga, opo a xulife po oluhepo kombada yedu alishe.

Ombiibeli oya popya monghedi yokatevo osho Jesus ta ka ninga ya ti:

• ‘Oye na pe eehepele domovanhu eyukifilo, a xupife omapongo.’ — Epsalme 72:4.

Ongahelipi hatu dulu okuulika olupandu omolwaashishe osho Jesus e tu ningila nosho yo osho te ke tu ningila mafiku? Onghedi imwe, okulihonga shihapu shi na sha ‘nonghundana iwa yOuhamba waKalunga,’ etumwalaka olo a li ha udifa. (Lukas 4:43) Lesha oshitukulwa “Ouhamba waKalunga oshike?”