Jesus ota ka xulifa po oilonga yominyonena

Jesus oku udite ko kutya ovanhu ohava kala ve udite ngahelipi omolwominyonena nosho yo okuningilwa okuhena ouyuki. Okwa li a lundilwa, a dengwa shihe li paveta, a ungaungiwa naye nai, a tokolwa shihe li pauyuki nokwa fya efyo liyahameka. Nonande ke na ondjo, okwe liyamba nehalo liwa, opo “omwenyo waye u ninge ekulilo lavahapu.” (Mateus 20:28; Johannes 15:13) E li Ohamba yOuhamba waKalunga, mafiku ota ka eta ouyuki kombada yedu alishe nokuxulifa po oilonga yominyonena fiyo alushe. — Jesaja 42:3.

Ombiibeli oya popya nghee ounyuni tau ka kala konima ngeenge Jesus a katuka onghatu, ya ti:

• “Omuhenakalunga ita kala po vali, nongeenge to talatala onhele yaye, ke po vali nande. Ndelenee ovananheni vo otava ka fyuulula edu, ndele tava ka hafela ombili inene.” — Epsalme 37:10, 11, KB-13.

Ongahelipi hatu dulu okuulika olupandu omolwaashishe osho Jesus e tu ningila nosho yo osho te ke tu ningila mafiku? Onghedi imwe, okulihonga shihapu shi na sha ‘nonghundana iwa yOuhamba waKalunga,’ etumwalaka olo a li ha udifa. (Lukas 4:43) Lesha oshitukulwa“Ouhamba waKalunga oshike?”