Oita oyo tai luwa kOushilo wOpokati — Ombiibeli otai ti ngahelipi?

Ovanhu mounyuni otave lipula kutya oshike tashi ka ningwa po shi na sha noita oyo tai luwa kuUnited States, Israel nosho yo Iran. Mbela onghalo oyo otai ka naipala, ndele oita tai kwatele mo oilongo ihapu? Mbela omapangelo otaa ka kelela oita oyo iha pule komesho, ndele mounyuni tamu kala ombili tai kalelele?

Ovo ve shii exunganeko olo la popiwa mOmbiibeli otashi dulika ve lipule ngeenge oita oyo tai luwa kOushilo wOpokati oi li ehovelo loita yaArmagedon oyo ya popiwa membo lEhololo.

Ombiibeli otai ti ngahelipi?

Mbela omapangelo otaa ka xulifa po oita oyo tai luwa kOushilo wOpokati?

Ombiibeli oya ti: “Inamu tula elineekelo leni movapangeli, ile momona womunhu, oo ita dulu okweeta exupifo.” — Epsalme 146:3.

Katu shi shii ngeenge omapangelo otaa dulu okweeta ombili tai kalelele koilongo oyo i li kOushilo wOpokati. Kakele kaasho, Ombiibeli oye shi yelifa nawa kutya kape na omupangeli wopapolotika, epangelo lopanhu, ile ongudu yovanhu tai dulu okuxulifa po oita nokweeta ombili tai kalelele. Kalunga oye aeke ta dulu ‘okuxulifa po oita kombada yedu alishe.’ — Epsalme 46:9.

• Opo u lihonge shihapu, lesha Oshungonangelo i na oshipalanyole“Mbela oita oi na ngoo efiku i ka xule po?”

Mbela oita oyo tai luwa kOushilo wOpokati otai wanifa po exunganeko lonhumba?

Ombiibeli oya ti: “Otamu ka uda oita neenghundana di na sha noita. . . . Oiwana otai ka lwifafana, omauhamba otaa ka kondjifafana.” — Mateus 24:6, 7.

Oita oyo tai luwa paife kOushilo wOpokati oi li shimwe shomoiningwanima oyo tai ulike kutya otu li ‘momafiku axuuninwa ounyuni ou’ notai yandje oumbangi kutya otu li “momafiku axuuninwa.” (Mateus 24:3; 2 Timoteus 3:1) Oita oyo tu wete kunena otai ulike kutya mafiku Kalunga ota ka xulifa po oita nosho yo omaupyakadi aeshe oo hai etele ovanhu.

• Opo u lihonge shihapu, lesha oshitukulwa “What Is the Sign of ‘the Last Days,’ or ‘End Times’?”

Mbela Armagedon ota hovele kOushilo wOpokati?

Ombiibeli oya ti: “Eemhepo da nyata oda ongaleka eehamba ponhele hai ifanwa mOshiheberi Armagedon.” — Ehololo 16:16.

Oita yaArmagedon kai fi oita pokati komapangelo opanhu oyo ya hovela kOushilo wOpokati. Oita oyo tai luwa mounyuni aushe pokati komapangelo aeshe opanhu naKalunga.

• Opo u lihonge shihapu, lesha oshitukulwa “Oita yaArmagedon oshike?”

Oshike tashi dulu oku tu kwafela tu ungaunge noisho pomafimbo madjuu?

Ombiibeli oya ti: “Inamu kala mu na oshisho shasha, ndele oisho yeni aishe i shiivifileni Kalunga momailikano, nokwiindila mwa mana mo nokupandula.” — Ovafilippi 4:6.

Jehovaa Kalunga ote tu shivi tu ilikane kuye. Molwaashi Kalunga oku na ko nasha nafye, ota ka pwilikina komailikano etu noku tu kwafela tu ungaunge noisho yetu. (1 Petrus 5:7) Onghedi imwe omo ha ningi ngaho omo ku tu kwafela tu ude ko kutya omolwashike pe na oita, nghee tai ka xula po nosho yo osho ta ka ninga po, opo a kufe po ouyehame nokumona oixuna. — Ehololo 21:3, 4.

• Opo u lihonge shihapu shi na sha nanghee Kalunga he tu kwafele, lesha oshitukulwa “You Can Find Words of Comfort in the Bible.”