Okwoongala ohaku tu kwafele tu “twaafane omukumo mohole nomoilonga iwa”

MOMUKOKOMOKO womafelemido, oshiwana shaJehova osha kala hashi ongala monghedi ya unganekwa. MuIsrael shonale, ovalumenhu aveshe ova li hava i kuJerusalem omolwoivilo itatu inene. (Deut. 16:16) Mefelemudo lotete, Ovakriste ova li hava ongala pandjikilile, va li have shi ningile luhapu momaumbo. (Filem. 1, 2) Kunena, ohatu hafele okwoongala nosho yo oyoongalele inini naai ya kula. Omolwashike ovapiya vaKalunga hava ongala pamwe? Ohave shi ningi unene molwaashi okwoongala oku li oshitukulwa sha fimana shelongelokalunga lavo. — Eps. 95:6; Kol. 3:16.

² Okwoongala ohaku etele yo ouwa ovo have uya kuko. Ovaisrael ova li va lombwelwa shi na sha nOshivilo shOmatwali oshitiheyali keshe, taku ti: “Ongela oshiwana, ovalumenhu novakainhu nounona nomunailongo woye, ou e li peenhu doye, opo va shiive okuuda nokulongwa okutila Omwene Kalunga keni nokudiinina shili eendjovo adishe domhango.” (Deut. 31:12) Osho otashi ulike kutya etomheno la fimana lokwoongala olo ‘okuhongwa kOmwene.’ (Jes. 54:13) Okwoongala ohaku tu pe yo omhito yokushiivafana, okutwaafana omukumo nokupamekafana okupitila meendafano.

OKWOONGALA KWEONGALO

³ Ovahongwa ovo va li va ongala konima yOpentekoste 33 O.P. ova li va diinina ehongo lovayapostoli, ‘nomafiku aeshe ova kala nomutima umwe motembeli.’ (Oil. 2:42, 46) Lwanima, ngeenge Ovakriste va li va ongala opo va longele Kalunga, ova li hava lesha omishangwa da nwefwa mo, mwa kwatelwa eenhumwafo odo da shangwa kovayapostoli nosho yo kovahongwa vamwe. (1 Kor. 1:1, 2; Kol. 4:16; 1 Tes. 1:1; Jak. 1:1) Ova li yo hava ilikana pokwoongala. (Oil. 4:24-29; 20:36) Omafimbo amwe, opa li hapa hokololwa oimoniwa yovatumwa i na sha noukalele. (Oil. 11:5-18; 14:27, 28) Opa li yo hapa kundafanwa omahongo Ombiibeli nosho yo omawanifo omaxunganeko a nwefwa mo. Opa li hapa yandjwa ehongo li na sha nelihumbato la koshoka lopaKriste nosho yo nghee ve na okukala ovadiinini. Aveshe ova li hava tuwa omukumo opo va kale ovaudifi vonghundana iwa ovaladi. — Rom. 10:9, 10; 1 Kor. 11:23-26; 15:58; Ef. 5:1-33.

⁴ Kunena, okwoongala kwopaKriste ohaku ningwa taku landulwa oshihopaenenwa shopefimbo lovayapostoli. Ohatu dulika kekumaido olo li li mOvaheberi 10:24, 25, tali ti: ‘Tu filafaneni oshisho. Tuha efe po okwoongala pamwe, ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.’ Momafiku aa axuuninwa madjuu, otwa pumbwa etwomukumo neenghono olo hatu mono mokukala pokwoongala pandjikilile opo tu kale twa pama pamhepo nokukala Ovakriste ovadiinini. (Rom. 1:11, 12) Tu li Ovakriste, otu li mokati kovanhu va nyonauka. Fye otwa efa po oukolokoshi nomahalo ounyuni. (Fil. 2:15, 16; Tit. 2:12-14) Openi vali hatu dulu okuya shihe fi okweendafana noshiwana shaJehova? (Eps. 84:10) Openi vali hatu dulu okumona ouwa ngeenge ihatu konakona nokukundafana Eendjovo daKalunga? Natu ka taleni kokwoongala ku lili noku lili oko kwa unganekwa omolwouwa wetu.

OKWOONGALA KWOMOMEXULILOSHIVIKE

⁵ Oshitukulwa shotete shokwoongala kwomexuliloshivike ohapa yandjwa oshipopiwa yopaMbiibeli shomoipafi osho sha nuninwa unene ovanhu ovo vehe fi Eendombwedi, mwa kwatelwa ovo tashi dulika opo tave uya kokwoongala oshikando shotete. Oshipopiwa osho shomoipafi ohashi dana onghandangala ya fimana mokupalula pamhepo ovo vape nosho yo ovaudifi. — Oil. 18:4; 19:9, 10.

⁶ Kristus Jesus, ovayapostoli vaye nosho yo vakwao vamwe ova li hava ningi okwoongala kwomoipafi kwa faafana naako haku ningwa kunena komaongalo oshiwana shaJehova. Nopehe na omalimbililo, Jesus okwa li omupopi womoipafi a denga mbada kombada yedu. Ombiibeli oya popya shi na sha naye ya ti: “Kapa li omunhu noshito, a popya ngaashi winya ta popi.” (Joh. 7:46) Jesus okwa li ha popi e na eenghonopangelo, naasho osha li sha kumwifa ovapwilikini vaye. (Mat. 7:28, 29) Ovanhu ovo va li va tambula ko etumwalaka laye ova li va mona ouwa muhapu. (Mat. 13:16, 17) Ovayapostoli ova li va landula oshihopaenenwa shaye. MOilonga 2:14-36 omu na oshipopiwa shaPetrus sha denga mbada osho a li a yandja pOpentekoste 33 O.P. Ovanhu omayovi ova li ve linyengifwa va katuke eenghatu omolwaasho va uda. Lwanima, vamwe ova li va ninga ovaitaveli konima yokupwilikina koshipopiwa shaPaulus muAtena. — Oil. 17:22-34.

⁷ Nokunena, ovanhu omamiliyona ohava mono ouwa moshipopiwa shomoipafi osho hashi yandjwa momaongalo nosho yo moipopiwa oyo hai yandjwa poyoongalele inini naayo ya kula. Oipopiwa ya tya ngaho ohai tu kwafele tu kale tu shii omahongo opaKriste notu kale ovadiinini moilonga yOuhamba. Ngeenge otwa kala hatu shivi ovanhu ovo ve na ohokwe nosho yo keshe umwe kokwoongala, ohatu va kwafele va shiive omahongo Ombiibeli a fimana.

⁸ Moshipopiwa shomoipafi ohamu kundafanwa oikundafanwa i lili noku lili. Oipopiwa ohai kala tai popi kombinga yomahongo nomaxunganeko Ombiibeli, omafinamhango opamishangwa, omayele e na sha nonghalamwenyo youkwaneumbo noinima ya pamba eehombo, eenghalo odo da taalela ovanyasha nosho yo elihumbato lopaKriste. Oipopiwa imwe ohai yandje elitulemo keshito laJehova likumwifi. Imwe ohai kala ya kwatela mo oihopaenenwa yeitavelo, youladi noyoudiinini yovanhu ovo va popiwa mOmbiibeli, tai divilike oilihongomwa oyo hatu lihongo mo kunena.

⁹ Opo tu kale hatu mono ouwa pauyadi moipopiwa yomoipafi, osha fimanenena okukala hatu yandje elitulemo filufilu, hatu kongo omishangwa odo tadi popiwa komupopi nokulandula eshi te di lesha noku di fatulula. (Luk. 8:18) Ngeenge otwa kala hatu yandje elitulemo kwaasho tashi kundafanwa, otashi ke tu kwafela tu kale twa tokola toko okudiinina osho hatu lihongo noku shi tula moilonga. — 1 Tes. 5:21.

¹⁰ Ngeenge ope na ovo tava dulu okuyandja oipopiwa, eongalo otali dulu okukala hali pewa oshipopiwa shomoipafi oshivike keshe. Luhapu osho ohashi ningwa mokushiva ovapopi ovatalelipo okudja komaongalo opopepi. Ngeenge kape na ovapopi va wana, ohaku ningwa eenghendabala opo oipopiwa oyo i yandjwe luhapu ngaashi tashi dulika.

¹¹ Oshitukulwa oshitivali shokwoongala kwomexuliloshivike ohashi landulwa kEkonakono lOshungonangelo, sha hala okutya, eenghundafana domapulo nomanyamukulo de likolelela koitukulwa oyo hai kala mOshungonangelo yokukonakonwa. Jehova ohe tu pe eendja dopamhepo pefimbo okupitila mOshungonangelo.

¹² Oitukulwa yokukonakonwa luhapu ohai kala tai kundafana nghee omafinamhango Ombiibeli taa dulu okutulwa moilonga monghalamwenyo yakeshe efiku. Ohai kwafele Ovakriste opo va dule okukondjifa “omhepo younyuni” nosho yo elihumbato inali koshoka. (1 Kor. 2:12) Oshungonangelo ohai yelifa omahongo nomaxunganeko Ombiibeli, tai kwafele ovanhu aveshe va kale ve na eudeko loshili li li pefimbo nova twikile okweenda melila louyuki. (Eps. 97:11; Omayel. 4:18) Okukala pEkonakono lOshungonangelo nokukufa ombinga mokunyamukula otashi dulu oku tu kwafela tu kale twa hafa omolweteelelo lounyuni mupe waJehova wouyuki. (Rom. 12:12; 2 Pet. 3:13) Eendafano lopaKriste ohali tu kwafele tu kulike oiimati yomhepo notu kale twa halelela okulongela Jehova nouladi. (Gal. 5:22) Ohali tu pameke tu dule okulididimikila omayeleko notu litungile “ekanghameno liwa laayo yokomesho” opo tu dule ‘oku ka mona omwenyo waalushe.’ — 1 Tim. 6:19; 1 Pet. 1:6, 7.

¹³ Ongahelipi hatu dulu okumona ouwa pauyadi mefiloshisho la tya ngaho li na sha nokupalulwa pamhepo? Otu na okukala hatu lilongekidile okwoongala komesho yefimbo, kutya nee opauhandimwe ile otu li omaukwaneumbo, hatu lesha omishangwa odo da etwa mo moishangomwa oyo tai ka longifwa, nokuyandja omilombo pokwoongala noitya yetu vene. Osho otashi ka findila oshili momitima detu, navakwetu otava ka mona ouwa eshi tava pwilikine kunghee hatu hepaulula eitavelo letu. Ngeenge otwa kala hatu pwilikine nelitulemo komilombo davamwe, ohatu ke lihonga shihapu oshivike keshe.

OKWOONGALA KWOMOKATI KOSHIVIKE

¹⁴ Oshivike keshe ohatu kala yo tu na okwoongala mOlupale lOuhamba haku ifanwa Onghalamwenyo yopaKriste noilonga yokuudifa. Okwoongala oko oku na oitukulwa yopatatu ya nuninwa oku tu “longekida” tu kale ovakalele vaKalunga. (2 Kor. 3:5, 6) Elandulafano nouyelele ohau yandjwa mokafo kokulongifwa pokwoongala kwOnghalamwenyo yopaKriste noilonga yokuudifa. Okafo oko oke na yo oihopaenenwa yeenghundafana i na sha noukalele.

¹⁵ Oshitukulwa shotete shokwoongala oko, osho hashi ifanwa Omamona omEendjovo daKalunga, ohashi tu kwafele tu shiive nawa omahokololo noshikalimo shOmbiibeli nosho yo osho hatu lihongo mo. Oshitukulwa osho osha kwatela mo oshipopiwa, okulesha nosho yo eenghundafana da kanghamena kelesho lOmbiibeli lokoshivike. Mokafo kokwoongala kwOnghalamwenyo yopaKriste noilonga yokuudifa omu na omafano neemwaka dokushanga. Oinima oyo oya nuninwa oku tu kwafela tu lihonge nokudidilika oilihongomwa yopaMbiibeli. Eenghundafana dopaMbiibeli domoule da tya ngaho ohadi tu etele ouwa monghalamwenyo yetu yopaumwene nokuxwepopaleka ehongo letu, opo tu ‘kale twa wana notwa wanenena oshilonga keshe shiwa.’ — 2 Tim. 3:16, 17.

¹⁶ Oshitukulwa oshitivali shokwoongala oko, osho hashi ifanwa Longa noudiinini moilonga yokuudifa, osha nuninwa oku tu deulila oukalele opo tu xwepopaleke onghedi yetu yokuudifa nokuhonga. Kakele koipopiwa yovanafikola, opa wedwa ouvidio ve na sha noihopaenenwa yeenghundafana. Oshitukulwa shokwoongala osho ohashi tu kwafele tu kale tu na ‘elaka la longwa’ opo tu dule ‘okuyakula nokutwa ouladi ava va loloka.’ — Jes. 50:4.

¹⁷ Oshitukulwa oshititatu, osho hashi ifanwa Okukala Omukriste washili, ohashi kundafana nghee omafinamhango Ombiibeli taa dulu okutulwa moilonga monghalamwenyo yakeshe efiku. (Eps. 119:105) Oshitukulwa sha fimana shokwoongala oko osho Ekonakonombiibeli lEongalo. Ngaashi Ekonakono lOshungonangelo, Ekonakonombiibeli lEongalo nalo ola kwatela mo eenghundafana domapulo nomanyamukulo.

¹⁸ Omwedi keshe, ngeenge okafo kape kokwoongala Onghalamwenyo yopaKriste noilonga yokuudifa ke uya, omuunganeki wolutu lovakulunhuongalo, ile omukulunhuongalo oo he mu kwafele, ohe ka konakona noukeka ndele ta ningi elandulafano laavo tava ka yandja oipopiwa. Oshivike keshe, omukulunhuongalo umwe oo e li omuhongi muwa nokwa popilwa kolutu lovakulunhuongalo oha ningi omunashipundi wokwoongala. Oinakuwanifwa yaye oya kwatela mo okushilipaleka kutya okwoongala okwa hovela nokwa pwa pefimbo nokuyandja olupandu nosho yo omayele kovanafikola.

¹⁹ Ngeenge otwa kala hatu lilongekidile okwoongala kwOnghalamwenyo noilonga yokuudifa, hatu kala po nokukufa ombinga pandjikilile, ohatu ka mona eshiivo lOmishangwa nohatu ka uda ko omafinamhango Ombiibeli. Ohatu ka kala yo tu na omukumo wokuudifa onghundana iwa nowino wokuninga ovanhu ovahongwa. Ovo have uya kokwoongala ndele inava ninginifwa natango ohava mono yo ouwa meendafano lopahole nomeenghundafana tadi tungu pamhepo. Opo tu lilongekide okwoongala oko nosho yo kumwe vali noupu, ohatu dulu okulongifa o-Watchtower Library, o-JW Library^®, Ongulumambo yokointaneta (ngeenge oi li melaka loye), nosho yo ongulumambo oyo i li mOlupale lOuhamba. Ongulumambo yomOlupale lOuhamba oi na oishangomwa i lili noku lili yEendombwedi daJehova, mwa kwatelwa o-Watch Tower Publications Index ile Elongifwambo lokukonga omauyelele moishangomwa yEendombwedi daJehova, omatoloko Eembiibeli a yoolokafana, omamboitya nosho yo omambo amwe omauyelele taa kwafa. Ongulumambo oyo otai dulu okulongifwa kukeshe umwe komesho ile konima yokwoongala.

ELONGEKIDO LOILONGA YOMOMAPYA

²⁰ Eengudu dovaudifi ohadi ongala oule wefimbo lixupi pelongekido loilonga yomomapya pomafimbo a yoolokafana momukokomoko woshivike nomomaxuliloshivike. Elongekido olo luhapu ohali ningilwa momaumbo ile peenhele dimwe vali tadi wapalele. Otali dulu yo okuningilwa mOlupale lOuhamba. Ngeenge eengudu dinini oda kala hadi ongala peenhele da yoolokafana moshitukulwa, otashi dulu okukala shipu kovaudifi okuya kelongekido loilonga yomomapya nokoshitukulwa. Ovaudifi otava dulu okuunganekwa diva nokuya koshitukulwa nopehe na okwoongaonga. Omupashukili wongudu ota dulu yo okuyandja elitulemo la wana kovaudifi ovo ve li mepashukilo laye. Nonande oshiwa ngeenge eengudu tadi ongala peenhele da yoolokafana, eengudu donhumba otadi dulu okwoongala pamwe omolweenghalo. Pashihopaenenwa, ngeenge ope na ovaudifi vanini hava i moukalele mokati koshivike, otashi dulika shi kale shiwa ngeenge eengudu da yoolokafana oda ongala pamwe mOlupale lOuhamba ile ponhele vali imwe tai wapalele. Kungaho, ovaudifi otava ka kala ve na ovo tava longo pamwe navo. Eongalo otali dulu yo okuningila elongekido loilonga yomomapya pOlupale lOuhamba momafiku omafudo ounyuni. Ile eengudu adishe otadi dulu okwoongala pamwe konima yEkonakono lOshungonangelo omolwelongekido loilonga yomomapya.

²¹ Ngeenge eengudu doilonga yomomapya ohadi ongala peenhele da yoolokafana, omupashukili wongudu keshe oha kwatele komesho elongekido loilonga yomomapya longudu yavo. Omafimbo amwe, omupashukili wongudu ota dulu okupula omuponhele waye ile omumwatate umwe vali ta dulu okukwatela komesho elongekido. Oo ta kwatele komesho na kale e lilongekida okukundafana ouyelele tau wapalele notau kwafele ovaudifi moukalele. Konima yelongekido loilonga yomomapya, omumwatate umwe oha xulifa neilikano, opo nee ongudu tai i momapya. Elongekido ohali kwata oule wominute nhano fiyo heyali, ashike oli na okukala lixupi ngeenge otali ningwa konima yokwoongala. Ope na okuyandjwa etwomukumo, ouyelele newiliko tali kwafele ovo tava i moilonga yoku ka udifa. Ovo vape ile ovo tashi dulika va pumbwa ekwafo otava dulu okulonga pamwe novaudifi ovo ve na owino opo va deulwe.

NGHEE OKWOONGALA KWOMAONGALO MAPE ILE MANINI HAKU NINGWA

²² Eshi ovanhu vahapu tava ningi ovahongwa, omaongalo nao otaa hapupala. Eindilo li na sha neongalo lipe luhapu ohali ningwa komupashukilishikandjo. Ashike omafimbo amwe, ohashi kala shiwa neenghono keengudu dinini okukala di li oshitukulwa sheongalo olo li li popepi.

²³ Omafimbo amwe, otashi dulika omaongalo manini a kale ashike a fikama po movamwameme. Ngeenge osho ngaho, omumwameme oo ta ilikana meongalo ile ta kwatele komesho okwoongala oku na okukala a djala sha komutwe, metwokumwe nelongekido lopamishangwa. (1 Kor. 11:3-16) Luhapu ohe shi ningi e li omutumba, a taalela kovapwilikini. Ovamwameme kave na okuyandja oipopiwa yomoipafi pokwoongala. Ponhele yaasho, ohava lesha ouyelele oo wa yandjwa kehangano nokuninga omatyekosha shi na sha nao, ile otava dulu oku shi ninga monghedi yeenghundafana ile yomauliko. Oshitaimbelewa otashi ka pula umwe womovamwameme a kale ta ningi ekwatafano nasho nokuunganeka okwoongala. Mokweendela ko kwefimbo, ngeenge opa kala ovamwatate va wana okukwatela komesho, otava ka wanifa po oinakuwanifwa oyo.

OYOONGALELE YOSHIKANDJO

²⁴ Omudo keshe, ohapa ningwa omalongekido opo omaongalo oo e li moshikandjo shimwe a kale e na oyoongalele yopavali yoshikandjo yefiku limwe. Eemhito dehafo da tya ngaho ohadi pe ovapwilikini aveshe omhito ‘yokumbwalangadjeka omitima davo’ mokweendafana navakwao. (2 Kor. 6:11-13) Ehangano laJehova ohali longekida oipalanyole yopamishangwa nosho yo oitukulwa i lili noku lili yoyoongalele tai kundafana omhumbwe yonhumba kondadalunde. Ouyelele oo ohau yandjwa okupitila moipopiwa, momauliko nomomapulapulo. Ehongo li li pefimbo la tya ngaho ohali tungu ovakalipo aveshe. Oyoongalele oyo ohai pe omhito ovahongwa vape va ninginifwe opo va ulike kutya ove liyapulila Jehova.

OSHOONGALELE SHOSHITUKULWA

²⁵ Omudo keshe, ohapa ningwa oshoongalele sha kula. Luhapu oshoongalele shoshitukulwa osho ohashi kala shi na omafiku atatu, sha kwatela mo omaongalo a dja koikandjo ihapu. Oitaimbelewa oyo tai pashukile omaongalo manini otashi dulika i mone shiwa okuningila oshoongalele shoshitukulwa ponhele imwe. Moilongo imwe, omalongekido e na sha noshoongalele shoshitukulwa otashi dulika a kale a yoolokafana she likolelela keenghalo ile kewiliko olo la yandjwa kehangano. Omafimbo nomafimbo, moilongo imwe ohamu ningwa oyoongalele yopaiwana ile ye likalekelwa, notapa dulu okukala Eendombwedi omayovi omilongo da dja koilongo i lili noku lili. Oule womido, vahapu ova shiiva kombinga yonghundana iwa yOuhamba omolwoundombwedi oo wa yandjwa poyoongalele ya tya ngaho yEendombwedi daJehova.   

²⁶ Oyoongalele yoshitukulwa oi li omhito yehafo kovapiya vaJehova noku mu longela va hangana. Ohapa yelifwa ouyelele woshili mupe. Poyoongalele imwe, ohapa piti oishangomwa ipe yokulongifwa paumwene nosho yo pekonakonombiibeli leongalo ile moukalele. Ohapa ninginifwa yo ovahongwa vape. Oyoongalele oya fimana molwaashi ohai xumifa komesho ekulo lopamhepo. Ohai yandje oumbangi kutya oshiwana shaJehova oshi li oumwainafana wopaiwana wOvakriste ovo ve na ohole yashili oyo tai va didilikifa mo kutya ove li ovahongwa vaJesus Kristus. — Joh. 13:35.

²⁷ Okuya kokwoongala kweongalo nosho yo koyoongalele inini naai ya kula yoshiwana shaJehova ohaku tu pameke tu longe ehalo laYe. Ohashi tu amene yo komanwefemo ounyuni oo taa dulu okunghundipaleka eitavelo letu. Okwoongala kwa tya ngaho ohaku ningwa nelalakano lokutanga nokufimanekifa Jehova. (Eps. 35:18; Omayel. 14:28) Otwa pandula eshi Jehova ha longekidile oshiwana shaye eemhito doku shi tulumukifa pamhepo pefimbo eli lexulilo.

OUVALELO WOMWENE

²⁸ Omaongalo Eendombwedi daJehova mounyuni aushe ohaa dimbuluka efyo laJesus Kristus lumwe modula, olo hali ifanwa Edimbuluko lefyo laKristus ile Ouvalelo wOmwene. (1 Kor. 11:20, 23, 24) Okwoongala kwokomudo oko okwa fimanenena koshiwana shaJehova. Otwa lombwelwa kondadalunde tu kale hatu dana Edimbuluko. — Luk. 22:19.

²⁹ Efiku lEdimbuluko otali tu kumwe nefiku lOpaasa yopaMbiibeli, ngaashi ya ulikwa mOmishangwa. (Ex. 12:2, 6; Mat. 26:17, 20, 26) Opaasa oya li hai danwa omudo keshe opo Ovaisrael va dimbuluke okumangululwa kwavo muEgipti mo 1513 K.O.P. Momudo oo, Jehova okwa li a lombwela Ovaisrael va lye odjona yOpaasa mefiku eti-14 lomwedi wotete pakalindeli kOshijuda nokwa li e va mangulula mo moupika muEgipti. (Ex. 12:1-51) Opo Ovaisrael va mone kutya efiku olo oli li ko naini, ova li hava teelele efiku lonhumba pefimbo loitemadula yavo, olo oufiku nomutenya hau kala u na oule u fike pamwe, nongeenge omwedi owe ya ko muJerusalem, ohava teelele pa pite omafiku 13 opo Opaasa i fike. Edimbuluko ohali ningwa ngeenge omwedi wa tokeka okudja pefiku olo oufiku nomutenya hau kala u na oule u fike pamwe.

³⁰ Jesus okwa popya kutya Edimbuluko oli na okudanwa ngahelipi muMateus 26:26-28. Edimbuluko kali fi onghedindjikilile ya nyika oumhulile, ndele ouvalelo wopafaneko oo hau liwa kwaavo va vaekwa va ka pangele pamwe naJesus Kristus mOuhamba waye womeulu. (Luk. 22:28-30) Ovakriste vakwao aveshe ve liyapulila Jehova nosho yo ovanhu ovo ve na ohokwe ova ladipikwa va kale hava kala pedimbuluko lOuvalelo wOmwene. Okukala po kwavo otaku ulike kutya ove na olupandu li na sha nefiloshisho olo Jehova Kalunga a yandja omolwouwa wovanhu aveshe okupitila mOmona waye, Jesus Kristus. Ofimbo Edimbuluko inali danwa, ohaku yandjwa oshipopiwa shomoipafi she likalekelwa, osho hashi kala sha nuninwa okuningifa ovanhu va kale va halelela okudana oshiningwanima osho nokukulika ohokwe yaavo va hala okukonakona Ombiibeli.

³¹ Eendombwedi daJehova ohadi kala da teelela nodjuulufi eemhito dokwoongala pamwe, opo di ‘filafane oshisho nokutwaafana omukumo mohole nomoilonga iwa.’ (Heb. 10:24) Omupiya omudiinini nomunaendunge okwe lilongekida okuunganeka okwoongala kwa tya ngaho she likolelela keemhumbwe detu dopamhepo. Ovapiya vaJehova aveshe nosho yo ovanhu ovo ve na ohokwe otava ladipikwa va longife pauyadi omalongekido oo e na sha nokwoongala pandjikilile. Ngeenge ovapiya vaJehova ova kala hava ulike olupandu tali di komutima li na sha nomafiloshisho oo ha yandje okupitila mehangano laye, otava ka kala moukumwe. Ndele osho sha fimanenena, ohatu ka tanga Jehova noku mu fimanekifa. — Eps. 111:1.