ETUKULWA 35

Ongahelipi handi dulu okuninga kaume kaKalunga?

Jeremy okwe lihonga okukala a lenga oukaume naKalunga okupitila moudjuu oo wa li we mu hanga. Okwa ti: “Eshi nda li ndi na eedula 12, tate okwa fiya po oukwaneumbo wetu. Oufiku umwe onda li handi ilikana fimbo nda nangala, handi pula Jehova e linyengife tate a alukile keumbo.”

Nonande Jeremy okwa li a nyika oluhodi, okwa li a hovela okulesha Ombiibeli. Eshi a fika pEpsalme 10:14, ola li le mu kuma neenghono. Ovelishe oyo oya popya kombinga yaJehova ya ti: “To lineekelwa kwaau, ehe nomukwafi, Oove omukwafi weefiye.” Jeremy okwa ti: “Onda li ndi udite kutya Jehova aame ta popi naame nota shiivifile nge kutya oye omukwafi wange, noye Tate. Openi vali handi dulu okuhanga tate a denga mbada e mu fa?”

KUTYA NEE ou li monghalo ya fa yaJeremy, ile hasho, Ombiibeli otai ulike kutya Jehova okwa hala u ninge kaume kaye. Ombiibeli oya ti: “Eheneni popepi naKalunga, opo nee ota ka ehena popepi nanye.” (Jakob 4:8) Dilonga kwaasho eendjovo odo da hala okutya: Nokuli nonande ito dulu okumona Jehova Kalunga nomesho oye okomutwe noku na ondodo ya tumbala, ote ku shivi u ninge kaume kaye.

Ashike okupanga oukaume naKalunga otashi pula eenghendabala. Oku shi faneka: Ngeenge ou na oshimeno meumbo, ou shii kutya ihashi kulu kusho vene. Opo shi kule nawa, owa pumbwa oku shi tekela pandjikilile noku shi kaleka momudingonoko muwa omo tashi kulile. Osho osha faafana nokupanga oukaume naKalunga. Oshike wa pumbwa okuninga po, opo oukaume oo u kule?

Osha fimana okukonakona Ombiibeli

Ookaume ova pumbwa okukala hava kundafana nokupwilikinafana. Oukaume naKalunga nao osho u li ngaho. Okulesha nokukonakona Ombiibeli oyo onghedi omo hatu pwilikine osho Kalunga te tu lombwele. — Epsalme 1:2, 3.

Ashike otashi dulika u kale uhe hole okukonakona. Ovanyasha vahapu ohava hoolola okutala o-TV, okudana ou-game, ile okukala nookaume ponhele yokukonakona. Ndele ngeenge owa hala okupanga oukaume naKalunga, owa pumbwa okuninga eenghendabala. Owa pumbwa okupwilikina kuye okupitila mokukonakona Eendjovo daye.

Ashike ino kala u na oshisho, molwaashi okukonakona Ombiibeli inaku pumbwa okukala omutengi. Oto dulu okulihonga oku ku hafela, nokuli nonande ou wete uhe hole okukonakona. Oshinima shotete osho wa pumbwa okuninga osho okulitulila po efimbo lokukonakona Ombiibeli. Okakadona kedina Lais oka ti: “Ondi na elandulafano. Ohandi lesha etukulwa limwe lOmbiibeli ongula keshe.” Maria womido 15 oha ningi shimwe shi lili. Okwa ti: “Ohandi lesha oshitukulwa shinini shOmbiibeli konguloshi keshe fimbo inandi kofa.”

Opo u hovele okukonakona, tala oshimhungu pepandja 292. Shanga pedu apa efimbo olo wa hala okukala to longifa, nande ominute 30 lwaapo u konakone Eendjovo daKalunga.

․․․․․

Okulitulila po efimbo oshi li ashike ehovelo. Ngeenge owa hovele okukonakona, oto ka mona kutya ihashi kala alushe shipu okulesha Ombiibeli. Otashi dulika to tu kumwe naJezreel weedula 11, oo a popya oshili a ti: “Oitukulwa imwe yOmbiibeli oidjuu okuuda ko nokaihokwifa naanaa.” Ngeenge naave osho u udite ngaho, ino sholola. Kala alushe wa tala ko efimbo lokukonakona Ombiibeli li li efimbo lokupwilikina kuJehova Kalunga, kaume koye. Lwanima, okukonakona Ombiibeli otaku ka kala kuhokwifa noto ka mona mo ouwa.

Osha fimanenena okwiilikana

Eilikano olo onghedi omo hatu popi naKalunga. Oli li oshali ya denga mbada. Oto dulu okupopya naJehova Kalunga efimbo keshe omutenya, ile oufiku. Okwe lilongekida alushe okupwilikina kwoove. Kakele kaasho, okwa hala yo okuuda osho to ti. Nomolwaasho Ombiibeli tai ku ladipike tai ti: “Oisho yeni aishe i shiivifileni Kalunga momailikano, nokwiindila mwa mana mo nokupandula.” — Ovafilippi 4:6.

Ngaashi omushangwa oo we shi ulika, ope na oinima ihapu oyo to dulu okulombwela Jehova. Osho osha kwatela mo omaupyakadi noisho oyo u na. Oto dulu yo oku mu lombwela oinima oyo wa pandula. Mbela iho pandula ookaume koye omolwoinima iwa oyo ve ku ningila? Sha faafana, oto dulu okupandula Jehova oo he ku ningile oinima ihapu e dule ookaume koye. — Epsalme 106:1.

Shanga apa oinima imwe oyo wa pandula Jehova.

․․․․․

Nopehe na omalimbililo, omafimbo amwe ohapa kala oinima yonhumba tai ku tilifa notai ku etele ostresa oyo hai kala ye ku wilila po. Epsalme 55:22 otali ti: “Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.”

Pomifinda tadi landula, shanga po omaupyakadi oye oo wa hala okukala to ilikana kombinga yao.

․․․․․

Oimoniwa yopaumwene

Ope na vali oshinima shimwe shi na sha noukaume woye naKalunga osho u na okuyandja elitulemo kusho. Omupsalme David okwa ti: “Makeleni, nye mu tale ouwa wOmwene apa u fike.” (Epsalme 34:8) Eshi David a li ta shange Epsalme 34, okwa li ta piti monghalo itilifa. Okwa li ta i onhapo ohamba Saul oyo ya li ya hala oku mu dipaa, noshinima osho osha li shii neenghono. Ashike okwa li e na oku ka hondama mokati kOvafilisti ovo va li ovatondi vaye. Molwaashi David okwa li monghalo ya nyika oshiponga, okwa li a konga ondunge yokuliningifa a fa ehe li nawa momutwe, naasho osha li she mu kwafela a xupe. — 1 Samuel 21:10-15.

David ka li e litanga kutya okwa xupa omolwondungediladilo yaye. Ponhele yaasho, okwa li a pandula Jehova. Okwa popya lwopehovelo lepsalme olo la tumbulwa nale, a ti: “Ame nda konga Omwene, ndele Ye okwa nyamukula nge nokwa xupifa nge metilo alishe.” (Epsalme 34:4) Oshimoniwa shaDavid shopaumwene oshe mu kwafela a ladipike vamwe kutya “makeleni, nye mu tale ouwa wOmwene apa u fike.”a

Mbela ou na oshimoniwa monghalamwenyo yoye osho tashi ulike nghee Jehova he ku file oshisho? Ngeenge osho, shi shanga pomifinda tadi landula. Eetepo: Oshimoniwa inashi pumbwa okukala sha kwatela mo oshinima shinene. Kendabala okudiladila komanangeko noupuna manini oo ho mono efiku keshe, oo amwe omuo taa dulu okutalwa ko ehe na oshilonga.

․․․․․

Ovadali voye otashi dulika ve ku honga kombinga yOmbiibeli. Ngeenge osho, oshi li enangeko noupuna. Ashike nande ongaho, owa pumbwa okupanga oukaume naKalunga kwoove mwene. Ngeenge ino shi ninga, oto dulu okulongifa ouyelele oo u li metukulwa eli u ku kwafele u hovele. Jehova ota ka punika eenghendabala doye. Ombiibeli oya ti: “Kaleni hamu indile, opo nee otamu pewa; kaleni hamu kongo, opo nee otamu mono.” — Mateus 7:7.

LESHA SHIHAPU KOMBINGA YOSHIKUNDAFANWA ESHI MEMBO 1, ETUKULWA 38 NOSHO YO 39

[Eshangelo lopedu]

OMUSHANGWA WENENEDILADILO

“Ovo ve shii kutya ova pumbwa ewiliko laKalunga otava kala va hafa.” — Mateus 5:3.

EETEPO

Lesha ashike omapandja ane Ombiibeli efiku keshe, noto ka dula oku i mana ko moule wodula.

OU SHI SHII NGOO KUTYA . . . ?

Eshi to lesha embo eli nokudulika komayele a kanghamena kOmbiibeli otashi ulike kutya Jehova oku na ko nasha naave pauhandimwe. — Johannes 6:44.

OSHO NDA HALA OKUNINGA

Opo ndi mone ouwa muhapu mokukonakona Ombiibeli paumwene, ohandi ka ninga ngaha ․․․․․

Opo ndi kale handi ilikana pandjikilile, ohandi ka ninga ngaha ․․․․․

Onda hala okupula ovadali vange kombinga yoshikundafanwa eshi ․․․․․

OTO DILADILA NGAHELIPI?

● Ongahelipi to dulu okukala ho hafele neenghono okukonakona Ombiibeli?

● Omolwashike Jehova a hala okupwilikina komailikano ovanhu inava wanenena?

● Ongahelipi to dulu okuxwepopaleka ongushu yomailikano oye?

[Ouyelele u li pepandja 291]

Eshi nda li okaana, onda li handi ilikana handi endulula oinima. Paife ohandi kendabala okwiilikana kombinga yoinima iwa nosho yo ii oyo ya ningwa mefiku. Molwaashi omafiku ihaa kala a faafana, osho ohashi kwafele nge ndiha kale handi endulula oinima ya faafana.” — Eve

[Oshimhungu/​Efano pepandja 292]

Konakona Ombiibeli

1. Hoolola ehokololo lopaMbiibeli olo wa hala okulesha. Ilikana u pewe ounongo opo u dule okuuda ko osho to lesha.

2. Lesha ehokololo noukeka. Ino endelela. Eshi to lesha, kala to diladila. Longifa oyuuditifi yoye ngaashi to dulu: Kendabala okukala wa fa u wete osho tashi ningwa, kala wa fa u udite eendaka dovanhu ovo va tumbulwa mehokololo, kala wa fa u udite edimba, kala wa fa u udite omulyo woikulya, nosho tuu. Kendabala okukala wa fa u wete lela osho tashi ningwa po.

3. Dilonga kwaasho opo wa lesha. Lipula omapulo ngaashi aa taa landula apa

● Omolwashike Jehova a kwatela ehokololo eli mEendjovo daye?

● Ovanhu velipi va tumbulwa mehokololo eli ve li oshihopaenenwa shiwa, novelipi ve li oihopaenenwa tai londwele?

● Oilihongomwa ilipi handi lihongo mehokololo eli?

● Ehokololo otali hongo nge shike kombinga yaJehova nosho yo onghedi yaye yokuninga oinima?

4. Ilikana pauxupi kuJehova. Mu lombwela osho we lihonga mekonakonombiibeli loye nonokutya owa diladila oku ka longifa ngahelipi ouyelele oo monghalamwenyo yoye. Pandula alushe Jehova omolwoshali oyo e ku pa, Eendjovo daye, Ombiibeli Iyapuki.

[Efano]

“Ondjovo yoye oyo olamba yeemhadi dange, nouyelele mondjila yange.” — Epsalme 119:105.

[Oshimhungu/​Efano pepandja 294]

Kala wa pitifa komesho oinima oyo ya fimanenena

Mbela owe lipyakidila unene, ndele ku na efimbo lokwiilikana? Mbela ku na efimbo lokukonakona Ombiibeli? Luhapu, ohashi likolelele kwaasho wa pitifa komesho.

Kendabala okuninga ngaha: Kufa okavela, ndele to tula mo omamanya mahapu a kula. Tula mo yo edu fiyo ka yada. Paife okavela koye oke yadi omamanya nosho yo edu.

Paife pima mo oinima oyo i li mokavela, ashike i kaleka poima. Kendabala okuninga ngaha: Yadeka okavela nedu, ndele to kendabala okutula mo omamanya. Mbela omamanya itaa wana mo vali? Omolwaashi owa tula mo tete edu.

Oshike to lihongo mo? Ombiibeli oya ti: ‘Shiiveni oinima oyo ya fimanenena.’ (Ovafilippi 1:10) Ngeenge owa kala wa pitifa komesho oinima inini ngaashi omalihafifo, ito ka kala u na efimbo lokuninga oinima oyo ya fimanenena, oinima yopakalunga. Ndele ngeenge owa dulika komayele Ombiibeli oo, oto ka kala u na efimbo lokuninga oinima yOuhamba nosho yo okukufa ombinga momalihafifo oshiyeleke. Oshe likolelela ashike kwaasho to tula mokavela tete.

[Efano pepandja 290]

Ngaashi oshimeno, oukaume naKalunga otau pula eenghendabala opo u kule