Omapulo a dja kovaleshi
Oshilihongomwa shilipi shi li mOmayeletumbulo 24:27?
Omushangi wOmayeletumbulo umwe okwa yandja omayele komulumenhu omunyasha a ti: “Longa nokuyukifa oilonga yoye pondje ndele longekida epya loye, opo nee to tungu ongulu yoye.” Eyeletumbulo olo la nwefwa mo otali popi kombinga yashike? Otali popi kutya omulumenhu oku na okulilongekida nawa fimbo ina hombola nokuhovela oukwaneumbo waye, sha hala okutya, okukala e shii oinakuwanifwa yomohombo.
Mefimbo lonale, ovelishe oyo omafimbo amwe oya li ya yelifwa kutya omushamane nosho yo xe omudali ke na ashike okulonga oilonga yokulikongela omboloto ndele oku na yo okutunga ile okutwa omukumo oukwaneumbo waye, pashihopaenenwa, oku u honga oinima yopamhepo. Nonande ediladilo olo oloshili noli li pamishangwa, halo lela oshitwa sha fimana shovelishe oyo. Omolwashike mbela? Natu ka tale komatomheno avali.
Etomheno lotete, ovelishe oyo itai popi kombinga yokutunga meityo lokutwa omukumo ile okupameka oukwaneumbo oo u li po nale. Ponhele yaasho, otai ulike kokutunga eumbo meityo lolelalela. Oshitya osho sha tolokwa ‘tunga’ otashi dulu yo okukala shi na eityo lopafaneko, okutunga eumbo ile okuhovela oukwaneumbo, sha hala okutya, okuhombola nokudala ounona.
Etomheno etivali, ovelishe oyo otai divilike okuninga oinima palandulafano, ya fa tai ti kutya “tete ninga eshi; opo nee to ka ninga shinya.” Ndele mbela eyeletumbulo olo ola hala okutya oinakuwanifwa yakwalukeshe oi na okupita komesho oinima yopamhepo? Hasho nandenande!
Pefimbo lOmbibeli, ngeenge omulumenhu a li a hala ‘okutunga ongulu’ yaye ile okuhovela oukwaneumbo, sha hala okutya, okuhombola, okwa li a pumbwa okulipula kutya: ‘Mbela onde lilongekida ngoo okufila oshisho nokukwafela omukulukadi wange nosho yo ounona ovo tashi dulika hatu ka dala monakwiiwa?’ Fimbo omulumenhu ina hovela oukwaneumbo, okwa li e na okulonga oilonga yonhumba, ngaashi okulonga epya laye ile okukuna oikunomwa. Onghee hano, o-Today’s English Version oya toloka ovelishe oyo sha yukilila ya ti: “Ino tunga eumbo fimbo epya loye inali fika okuteywa, nou na oushili kutya oto dulu okumona ouxupilo.” Mbela efinamhango olo otali longo ngoo nokunena?
Heeno otali longo. Omulumenhu oo a hala okuhombola okwa pumbwa okulilongekidila nawa oshinakuwanifwa osho. Ngeenge ota dulu palutu, oku na okulonga. Ndele omulumenhu ke na ashike okulonga noudiinini opo a file oshisho oukwaneumbo waye palutu. Eendjovo daKalunga otadi ti kutya omulumenhu oo iha file oshisho oukwaneumbo waye palutu, pamaliudo nosho yo pamhepo oku dulike kwaao ehe na eitavelo. (1 Tim. 5:8) Onghee hano, omulumenhu omunyasha oo te lilongekidile okuhombola nokukala noukwaneumbo oku na okulipula omapulo aa kutya: ‘Mbela onde lilongekida ngoo shili okufila oshisho palutu oukwaneumbo? Onde lilongekida ngoo okukwatela komesho oukwaneumbo moinima yopamhepo? Ohandi ka wanifa po ngoo oshinakuwanifwa shokukwatela komesho ekonakonombibeli pandjikilile pamwe nomukulukadi wange nounona?’ Eendjovo daKalunga otadi divilike kutya oinakuwanifwa ya tya ngaho oya fimanenena. — Deut. 6:6-8; Ef. 6:4.
Onghee hano, omulumenhu omunyasha oo ta kongo okakadona a hombole oku na okudiladila nawa kombinga yefinamhango olo li li mOmayeletumbulo 24:27. Sha faafana, okakadona nako oke na okulipula ngeenge oke lilongekidila ngoo oinakuwanifwa yokukala omukulukadi nomudalakadi. Ovalihomboli ovanyasha navo ove na okulipula omapulo a faafana ngeenge tava diladila okudala ounona. (Luk. 14:28) Okukala metwokumwe newiliko olo la nwefwa mo otaku dulu okukwafela oshiwana shaKalunga shi henuke omaupyakadi mahapu nokukala shi na omaukwaneumbo a hafa.
[Eendjovo dididilikwedi pepandja 10]
Omulumenhu omunyasha oku na okulipula omapulo elipi e na sha nohombo?