Eedjo dokafo Onghalamwenyo yopaKriste noilonga yokuudifa
7-13 MARSA
OMAMONA OMEENDJOVO DAKALUNGA | 1 SAMUEL 12-13
“Ounhwa ohau tetekele epunduko”
Ounhwa Ohau Twala Mokufifwohoni
17 Mokutala eenghatu daSaul kombada otashi dulika tadi monika da fa da yuka. Ndele doshili, oshiwana shaKalunga osha li “moudjuu,” ‘nokufininikwa unene,’ nosha tila unene molwonghalo yasho yoku he na eteelelo. (1 Samuel 13:6, 7) Doshili, inashi puka okulikwatela ko ngeenge onghalo tai shi pitike. Ndele dimbuluka kutya Jehova oha dulu okulesha omitima nosho yo okumona mo omalinyengotomheno etu omoule. (1 Samuel 16:7) Hano, osha yela kutya okwa li a mona oikala yonhumba i na sha naSaul oyo inai popiwa momahokololo Ombibeli sha yukilila. Pashihopaenenwa, Jehova otashi dulika kwa li a mona kutya oku he lididimika kwaSaul okwa li kwa pendulwa kelinenepeko. Otashi dulika Saul kwa li ta shingwa kediladilo kutya e li ohamba yaIsrael ashishe ndele oku na okuteelela oo a tala ko e li omuprofeti a kulupa a kala ko. Kashi na mbudi kutya oshike, Saul okwa li e udite kutya okungonyotoka kwaSamuel okwe mu pa oufemba a longe po oilonga oyo kuye mwene nokudina omalombwelo okondadalunde oo kwa li a pewa. Oshidjemo? Samuel ina pandula okulikwatela ko mwene kwa ningwa kuSaul. Ponhele yaasho, okwa handukila Saul ta ti: “Ouhamba woye itau ka kalelela . . . , osheshi ove ino diinina osho Omwene e shi ku lombwela.” (1 Samuel 13:13, 14) Natango vali apa, ounhwa owa twala mokufifwohoni.
Jehova oha kala a hafa ngeenge to dulika kuye
8 Ehokololo lOmbibeli li na sha nohamba Saul otali divilike kutya osha fimanenena okudulika. Eshi Saul a hovela okupangela okwa li omulininipiki, ‘nomuxupi momesho aye mwene.’ Ndele nande ongaho, konima yefimbo okwa ka kwatwa kounhwa nokwa li a tomhafana monghedi ya puka. (1 Samuel 10:21, 22; 15:17) Pomhito imwe, Saul okwa li e na oku ka lwifa Ovafilisti, ndele Samuel okwa li e mu lombwela e mu teelele opo e uye a ningile Jehova exwikiloyambo noku mu lombwele osho e na okuninga. Ndelenee Samuel ka li e uya pefimbo olo Saul a li e mu teelela, novanhu ova li tava i onhapo. Eshi Saul a mona ovanhu tava i onhapo, okwa “yamba exwikiloyambo,” naasho osha li sha handukifa Jehova. Eshi Samuel e ke uya kuSaul, Saul okwe lipopila omolwokuhadulika kwaye a ti kutya molwaashi Samuel ine uya pefimbo, okwe “lipameka” ndele ta yambe exwikiloyambo opo ngeno Jehova e mu file onghenda. Ohamba Saul oya li i wete exwikiloyambo la fimanenena li dule okudulika kelombwelo olo a lombwelwa a teelele Samuel e uye a yambe eyambo. Samuel okwa li e mu lombwela a ti: “Wa ninga nai, ino diinina oshipango shOmwene Kalunga koye, osho ye eshi ku lombwela.” Jehova okwa li a ekelashi Saul e li ohamba omolwokuhadulika kwaye. — 1 Samuel 10:8; 13:5-13.
Omamona opamhepo
Oto ka dulika ngoo kewiliko laJehova lopahole?
15 Ovaisrael otashi dulika va li tava diladila kutya otava dulu okukala ve lineekela ohamba yopanhu oyo ve wete nomesho shi dulife okukala ve lineekela muJehova. Ndele ngeenge osho va li tava diladila ngaho, osha yela kutya ova li tava shikula “oinima yongaho.” Kakele kaasho, osho osha li tashi ke va ningifa va itavele noupu oinima ikwao yongaho oyo hai xumifwa komesho kuSatana. Pashihopaenenwa, ohamba yopanhu oya li tai dulu oku va ningifa noupu va longele oikalunga. Ovalongeli voikalunga oyo ya hongwa moiti ile momamanya ohava diladila kutya otava dulu okukala ve lineekela muyo molwaashi ve i wete nomesho nohava dulu oku i kuma. Ihava kala ve lineekela Omushiti woinima aishe, Jehova Kalunga, molwaashi ihave mu mono nomesho okomutwe. Ashike omuyapostoli Paulus okwa li a mona kutya oikalunga ‘oinima ihe na ekwafo lasha.’ (1 Kor. 8:4, OB-1986) Oikalunga ihai mono ko, ihai udu ko, ihai popi noihai longo sha nokuli. Onghee hano, otashi ka kala sha nyika oulai okulongela oikalunga molwaashi ashike hai dulu okumonika nosho yo okukumwa. Oikalunga oyo “oinima yongaho” noihai dulu okukwafela ovanhu nandenande, naavo ve lineekela muyo ‘otava ka faafana nayo.’ — Eps. 115:4-8.
14-20 MARSA
OMAMONA OMEENDJOVO DAKALUNGA | 1 SAMUEL 14-15
“Okudulika Oku Dule Etomhenoyambo”
Jehova oha kala a hafa ngeenge to dulika kuye
4 Molwaashi Jehova oye e tu shita, keshe eshi tu na oshaye. Ngeenge osho ngaho, mbela otu na ngoo osho hatu dulu oku mu pa? Heeno, ohatu dulu oku mu pa oshinima shi na ondilo inene. Oshinima osho oshike mbela? Enyamukulo ohatu li hange mekumaido lOmbibeli olo tali ti: “[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].” (Omayeletumbulo 27:11) Heeno ohatu yandje sha kuKalunga, mokukala hatu dulika kuye. Nonande otu li meenghalo da yoolokafana, mokukala hatu dulika kuKalunga ohatu ka ulika kutya Satana Ondiaboli okwa popya oipupulu inyanyalifi eshi a ti kutya ovanhu itava ka kala ovadiinini kuKalunga ngeenge ve li momayeleko. Kau fi tuu oufembanghenda mukumwifi okunyaneka pomutenya oipupulu yaSatana!
it-2-E 521 okat. 2
Okudulika
Kalunga iha hokwa ovanhu ovo ihava dulika kuye. Opo nee Samuel okwa lombwela ohamba Saul a ti: “Omwene a hokwa ngeno omaxwikiloyambo nomatomenoyambo ngaashi a hokwa eduliko, okudulika kondaka yOmwene? Tala, okudulika [osho tashi ti okupwilikina] ku dule etomenoyambo, nokuuda ko ku dule omakaadi eedi deemhedi.” (1Sam 15:22) Okudopa okudulika kondjovo yaJehova, osha hala okutya omunhu ke na eitavelo, ile elineekelo meendjovo odo nosho yo mOdjo yado. Oo ta dopa okudulika ke lidule naao ta nyanekele, ile ta longele oikalunga. (1Sam 15:23; yelekanifa Rom 6:16.) Oshityalonga okwiitavela ihashi kala shi na eityo, ngeenge omunhu ina katuka eenghatu; naasho otashi ulike kutya ina itavela, ile ina fimaneka omunhu oo e mu lombwela. (Mat 21:28-32) Ovanhu ovo va itavela ashike oshili yeendjovo daKalunga, ndele ihava kala metwokumwe nao, otave lifufya, noku lipukifa nomatomhafano ongaho noitava ka nangekwa noupuna. (Jak 1:22-25) Omona waKalunga naye okwe shi yelifa nawa eshi a ti kutya, nokuli naavo hava monika va fa tava longele Kalunga kashili, ashike ohave shi ningi monghedi ya puka, ile nomalinyengotomheno a puka, itava ka ya mo nandenande mOuhamba waKalunga. — Mat 7:15-23.
Omamona opamhepo
it-1-E 493
Onghenda
Ngeenge omafininiko okwe tu ningifa tu ete onghenda moshinima osho shihe li metwokumwe nehalo laKalunga, otashi ka eta oilanduliko ya kwata moiti. Naasho osho sha li sha ningilwa ohamba Saul. Pefimbo opo Jehova okwa li a handukila Ovaameleki oshikando shotete, eshi va li va ponokela Ovaisrael, konima eshi va dja muEgipiti. Saul okwa li a lombwelwa ehe va file nande onghenda. Okwa li a fininikwa komahalo aye mwene nokali a shikula omalombwelo aJehova filufilu. Onghee Jehova kali vali a tambula ko Saul e li ohamba. (1Sam 15:2-24) Omunhu ngeenge okwa kala e na olupandu li na sha neendjila daJehova douyuki, otashi ke mu kwafela aha ninge osho sha puka, ngaashi Saul a li a ninga nokali vali a hokiwa kuJehova.
21-27 MARSA
OMAMONA OMEENDJOVO | 1 SAMUEL 16-17
“Olwoodi olOmwene”
‘Olwoodi olaJehova’
David okwa li a shilipaleka Saul mokuhokolola ashishe osho sha li sha ningwa po shi na sha nonghoshi nosho yo emwangha. Mbela okwa li te litade? Hasho. David okwa li e shii kutya omolwashike a findana momalwoodi oo. Okwa ti: “Omwene ou a xupifa nge meenyala donghoshi nomeenyala demwangha, Ye ota ka xupifa nge yo meke lOmufilisti ou.” Opo nee Saul okwa li a fya ounye ndele ta nyamukula ta ti: “Inda, Omwene na kale naave.” — 1 Samuel 17:37
Mbela ino hala okukala u na eitavelo la fa laDavid? Ashike dimbuluka kutya eitavelo laDavid kala li ashike okukala wa hala okuninga oshinima shonhumba. Okwa kala e na eitavelo muKalunga nomolwaasho a li e na eshiivo nowino. Okwa li e shii kutya Jehova oku li Omwaameni omunahole nosho yo Omuwanifi womaudaneko. Ngeenge otwa hala okukala tu na eitavelo la tya ngaho, otwa pumbwa okutwikila okulihonga kombinga yaKalunga mOmbiibeli. Ngeenge otwa kala metwokumwe naasho twe lihonga, ohatu ka mona oidjemo iwa notashi ka pameka eitavelo letu. — Ovaheberi 11:1.
‘Olwoodi olaJehova’
Onghedi omo David a li a nyamukula otai ulike kutya okwa li e na eitavelo. Diladila ashike omunyasha David ta ula Goljat ta ti: “Ove to uya kuame u neongamukonda neonga nomukonda, ndelenee ame handi uya kuove medina lOmwene womatanga ovakwaita, Kalunga komatanga Ovaisrael, ou we mu sheka.” David okwa li e shii kutya oilwifo yopanhu inai fimanenena. Goljat kali a fimaneka Jehova Kalunga, na Jehova okwa li te ke mu katukila onghatu. Ngaashi David a popya, “olwoodi olOmwene.” — 1 Samuel 17:45-47.
David okwa li e wete kutya Goljat omunene noku na oilwifo inene. Ashike ka li a tilifwa koinima oyo. Kali a ninga ngaashi Saul netangakwaita laye. David ka li e liyelekanifa naGoljat. Ponhele yaasho, okwa li a yelekanifa Goljat naJehova. Goljat okwa li e na oule weemeta 2, 9 e dule ovalumenhu aveshe, ashike mbela okwa li munene e fike peni oku mu yelekanifa nOmunamapangelo aeshe? Ngaashi ovanhu aveshe, okwa li e fike pokapuka, oko taka dulu okudipawa kuJehova!
‘Olwoodi olaJehova’
Kunena, ovapiya vaKalunga ihava kufa ombinga moita yo venevene, molwaashi osha li ashike hashi ningwa mefimbo lonale. (Mateus 26:52) Ashike nande ongaho, otwa pumbwa okuhopaenena eitavelo laDavid. Nafye otwa pumbwa okutala ko Jehova e li omunhu wolela, Kalunga oo oye aeke e na okulongelwa nokutilika. Omafimbo amwe otashi dulika tu kale tu wete omaupyakadi etu makula neenghono, ashike omanini ngeenge otwe a yelekanifa neenghono daJehova inadi ngabekwa. Ngeenge otwa hoolola okulongela Jehova Kalunga nokukala tu na eitavelo muye ngaashi David, itatu ka tilifwa komashongo nokomaupyakadi. Jehova ota dulu okufinda keshe shimwe.
Omamona opamhepo
it-2-E 871-872
Saul
Omhepo yaJehova oya li ya dja po puSaul konima eshi David a vaekwa a ninge ohamba yOvaisrael yomonakwiiwa. Okudja opo ‘omhepo ii, ya tumwa kOmwene, ye mu hepeka.’ Eshi omhepo yaJehova ya dja mo muSaul, Jehova okwa li a ningifa omhepo ii i kale muye, naasho osha li sha ningifa Saul a kanife ombili yopamadiladilo nokwa kala e na omaliudo a puka taa ingaana momadiladilo aye. Eshi Saul a li ina dulika kuJehova, osha ulika kutya okwa li e na omadiladilo mai momutima, nomhepo yaJehova kaya li vali ye mu amena. Onghee hano, eshi Jehova a efa ‘omhepo ii’ i hepeke Saul, osho otashi dulu okutiwa kutya ‘omhepo ii’ oya dja kuJehova, novapiya vaSaul ova popya kombinga yomhepo oyo i li ‘omhepo ii ya tumwa kuKalunga.’ Saul okwa li a pula, opo David a ninge omwiimbi waye, opo e mu imbile po ngeenge ta hangika ‘komhepo ii,’ opo a ngungumane. — 1Sam 16:14-23; 17:15.
28 MARSA–3 APRILI
OMAMONA OMEENDJOVO DAKALUNGA | 1 SAMUEL 18-19
“Kala Omulininipiki Nonande Owa Pondola”
Lineekela omhepo yaKalunga Mokuungaunga Nomalunduluko Omonghalamwenyo
4 Diva, omumati oo omufita okwa li ta ka ninga omufimanekwa moshiwana shavo. Okwa ifanwa a ka longele ohamba noku i shikila ouhumbafeta. Okwa dipaa omukwaita Goljat, omutongolume oo a li e na onyanya, nomolwaasho okwa li a tilika kovakwaita vaIsrael va deuka. Eshi David a ninga omuwiliki wetanga lovakwaita, okwa lwa nokufinda Ovafilisti. Ovanhu ova li ve mu hole. Ova li va tota omaimbilo tae mu tange. Nale, fimbo oiningwanima oyo inai ningwa, omuyandjimayele umwe wohamba Saul okwa li a hokolola omunyasha David kutya ka li ashike e ‘shii okushika’ okahumbafeta, ndele okwa li yo “ependa nomukwaita nomunongo mokupopya nokwa shitwa nawa.” — 1 Samuel 16:18; 17:23, 24, 45-51; 18:5-7.
Etongolo Pokati Kovayuki Novadinikalunga
6 Ovanhu vamwe ohava kala ve na ounhwa molwaashi ohava monika nawa, ve shiivike apeshe, ovaimbi dingi, ovanaenghono, ile ve na eendodo dopombada. David okwa li e na oinima aishe oyo, ashike okwa kala omulininipiki monghalamwenyo yaye aishe. Konima eshi a dipaa Goliat naashi ohamba Saul ya li ya hala oku mu pa okamonakadona kayo ka ninge omukulukadi waye, okwa ti: “Aame omushike, eumbo lange nepata latate muIsrael olo eshike, ame ndi ninge oshitenya shohamba?” (1 Sam. 18:18) Oshike sha li sha kwafela David a kale omulininipiki? David okwa li ashike e na omaukwatya oo, ounghulungu nosho yo omaufembanghenda molwaashi Kalunga okwa li a ‘tala mokule mwi,’ ile e lininipika, opo a yandje elitulemo kuye. (Eps. 113:5-8) David okwa li e shii kutya oinima aishe iwa oyo a li e na oya dja kuJehova. — Yelekanifa 1 Ovakorinto 4:7.
7 Ngaashi David, oshiwana shaJehova kunena ohashi kendabala okuulika elininipiko. Otu na oushili oo kutya Jehova, Omunhu munenenene meshito alishe, oha ulike oukwatya oo wa denga mbada welininipiko. (Eps. 18:35) Ohatu tula moilonga omayele a nwefwa mo oo taa ti: “Djaleni efilonghenda lomomutima, ombili, elininipiko, engungumano noutalanheni.” (Kol. 3:12) Otu shi shii yo kutya ohole “ihai litange, ihai fulalala.” (1 Kor. 13:4) Ngeenge otwa kala hatu ulike elininipiko, otashi dulika ovanhu va nanenwe kuJehova. Ngaashi ashike ovashamane hava dulu okufindwa keenghedi dovakulukadi vavo nopehe na ondjovo, ovanhu vamwe navo otava dulu okunanenwa kuKalunga okupitila melininipiko olo hali ulikwa koshiwana shaye. — 1 Pet. 3:1.
Omamona Opamhepo
it-2-E 695-696
Omuxunganeki
Nonande ovaxunganeki ova li va nangekwa po kuJehova, osho inashi hala okutya ohava popi alushe oinima ya nwefwa mo. Ponhele yaasho, omhepo yaKalunga ‘oya li hai uya kuvo’ omafimbo amwe nokuholola omatumwalaka oo taa ka yandjwa. (Hes 11:4, 5; Mika 3:8) Osho ohashi va kumu monghedi ye likalekelwa, tashi va ningifa va kale va hala okuxunganeka. (1Sam 10:10; Jer 20:9; Amos 3:8) Kava li ashike hava ningi oinima oyo ihai ningwa naanaa, ashike ova li yo hava ulike nghee va li ve udite, nohava ulike kutya ova yooloka ko kovanhu vakwao. Naasho otashi dulika shi yelife osho sha hala okutya eshi taku ti oohandimwe ovo ohave ‘lihumbata ngaashi ovaxunganeki.’ (1Sam 10:6-11; 19:20-24; yelekanifa Oil 2:4, 12-17; 6:15; 7:55.) Ouladi nexwamo lavo ohau va ningifa va kale ve na elihumbato tali limbililike vamwe, ngaashi ashike omuxunganeki oo a li e uya povakulunhu vomatangakwaita, eshi Jehu a vaekwa. Eshi ovakulunhu vomatanga ovakwaita va didilika kutya omulumenhu oo okwa li omuxunganeki, ova li va tambula ko etumwalaka laye meendelelo. (2Eeh 9:1-13; yelekanifa Oil 26:24, 25.) Eshi Saul a li ta taataa David, osha li sha etifa a kale ‘te lihumbata a fa omuxunganeki,’ nokwe lidula oikutu nokwa nangala “hamunghele omutenya aushe noufiku aushe.” (1Sam 19:18–20:1) Mepingafano naasho sha popiwa mOmbiibeli, osho inashi hala okutya ovaxunganeki aveshe ova li hava kala hamunghele. Ombiibeli oya popya peemhito mbali omo omuprofeti a li a ya e li hamunghele omolwetomheno laasho a li ta ka xunganeka. (Jes 20:2-4; Mika 1:8-11) Etomheno laSaul lokukala hamunghele, otashi dulika a li ta ulike kutya ye omunhu wongaho, a ekelashi oikutu yaye youhamba nokwa li ta ulike kutya ita dulu okukala e li omhinge nounamapangelo waJehova, ile nomatomheno amwe vali, ashike inashi tumbulwa mo mOmbiibeli.
4-10 APRILI
OMAMONA OMEENDJOVO | 1 SAMUEL 20-22
“Nghee to Dulu Okukala kaume muwa”
Natu Pange Oukaume Wopofingo Paife, Ofimbo Exulilo Inali uya
18 Kunena, ovamwatate novamwameme ova taalela omashongo e lili noku lili. Pashihopaenenwa, vahapu ohava hangwa koiponga yopaushitwe ile oyo hai etifwa kovanhu. Ngeenge osho osha ningwa, vahapu vomufye ohatu dulu okutambula ko ovamwatate ve uye va kale hava di momaumbo etu. Vamwe otava dulu okukwafela pashimaliwa. Ashike atusheni ohatu dulu okupula Jehova a kwafele ovamwatate novamwameme ovo. Ngeenge otwa didilike kutya omumwatate ile omumwameme okwa teka omukumo, otashi dulika tuha shiive osho tu na okutya ile okuninga. Ashike atushe ohatu dulu okukwafela, okukonga efimbo tu kale pamwe nookaume ketu, nokupwilikina kuvo nolukeno. Ohatu dulu yo oku va leshela omushangwa tau hekeleke oo tu hole unene. (Jes. 50:4) Osho sha fimanenena oshosho kutya oto dulu okuyandja ekwafo kookaume koye ngeenge ve ku pumbwa. — Lesha Omayeletumbulo 17:17.
Kala nokweenda Meendjila daJehova
7 Kalunga okwa hala tu kale ookaume ve shii okulineekelwa. (Omayel. 17:17) David nomonamati wohamba Saul, Jonatan, ova li ookaume kopofingo. Eshi Jonatan a li a uda kutya David okwa dipaa Goljat, ‘omwenyo waye owa li we limanga kumwe nomwenyo waDavid, ndele Jonatan okwa li e mu hole ngaashi omwenyo waye mwene.’ (1 Sam. 18:1, 3) Okwa li nokuli a londwela David kutya Saul okwa hala oku mu dipaa. Eshi David a li a ya onhapo, Jonatan okwa li e ke mu shakeneka ndele tava pange oukaume. Saul hanga a dipaa Jonatan molwaashi okwa li ta popile David, ndele nande ongaho, Jonatan naDavid ova li va shakena vali ndele tava pameke oukaume wavo. (1 Sam. 20:24-41) Eshi va li va shakena oshikando shaxuuninwa, Jonatan okwa li a pameka David, e mu “nyatipalifa muKalunga.” — 1 Sam. 23:16-18.
Nghee to Dulu Okupanga Oukaume Muwa Mounyuni Ou Uhe Na Ohole
11 Kala omudiinini. Salomo okwa ti: “[Kaume] oku hole alushe, nomumwaina omulumenhu ta dalwa, a kwafe moluhepo.” (Omayel. 17:17) Eshi Salomo a popya eendjovo odo, otashi dulika a li ta diladila kombinga youkaume oo wa li pokati kaxe David naJonatan. (1 Sam. 18:1) Ohamba Saul oya li ya hala omonamati Jonatan oye a fyuulule oshipangelapundi shouhamba waIsrael. Ashike Jonatan okwa li a dimina kutya David oye a hoololwa kuJehova a ninge ohamba. Mepingafano naSaul, Jonatan ka li a twila David ondubo. Jonatan ka li a hala okupewa efimano olo la li li na okupewa David, noka li a itavela omalundilo oo Saul a li ta tandavelifa shi na sha naDavid. (1 Sam. 20:24-34) Mbela nafye otu na oikala ya fa yaJonatan? Ngeenge ookaume ketu va pewa oinakuwanifwa meongalo, mbela ohatu kala ngoo twa hafa pamwe navo? Ngeenge ve li meenghalo didjuu, mbela ohatu va hekeleke ngoo noku va yambidida? Ngeenge pe na umwe ta ambe kaume ketu, mbela ohatu itavele diva olwaambo la tya ngaho ile ohatu popile kaume ketu nouladi ngaashi Jonatan?
Omamona Opamhepo
Omanenedhiladhilo Okuza Membo lyaSamuel Gwotango
21:12, 13. Jehova okwa tegelela tu longithe iitalenti yetu yopamadhiladhilo nuunkulungu wetu okuungaunga noonkalo oondhigu monkalamwenyo. Okwe tu pa Oohapu dhe dha nwethwa mo ndhoka tadhi gandja oondunge, ontseyo nuunkulungu wokudhiladhila. (Omayeletumbulo 1:4) Otu na wo ekwatho lyaakuluntugongalo yopaKriste mboka ya langekwa po.
18-24 APRILI
OMAMONA OMEENDJOVO DAKALUNGA | 1 SAMUEL 23-24
“Teelela Nelididimiko kuJehova”
Lineekela Omhepo yaKalunga Mokuungaunga Nomalunduluko Omonghalamwenyo
8 David okwa anya okuningila Saul owii. Neitavelo tali longo nelididimiko, okwa li a hafa okweefela oinima momake aJehova. Konima eshi ohamba ya fiya po ekololo, David okwe i ingida a ti: “Omwene na tokole pokati ketu naave, nOmwene ne ku handukile omolwange. Ndelenee eke lange itali ke ku kuma.” (1 Samuel 24:13) Nonande okwa li e shi shii kutya Saul okwa li a puka, David ina alulila Saul owii noine mu popila mowii. Oikando ihapu, David okwa anya okuyukifa oinima kuye mwene. Ponhele yaasho, okwa li e lineekelela Jehova a yukife oinima. — 1 Samuel 25:32-34; 26:10, 11.
w04-E 6/1 22-23
Mbela Eenghalo Omo Ho Lihange Odo Hadi Ufa Onghalamwenyo Yoye?
Etomheno etitatu olo olo kutya ponhele yokuxwepopaleka eenghalo detu monghedi ihe li pamishangwa, otu na okuteelela kuJehova. Omuhongwa Jakob okwa shanga a ti: “Eshi tamu lididimike, otamu lideula nye vene, opo mu kale muhe na oshipo nomu kale hamu shi endifa nawa moinima aishe.” (Jakob 1:4) Elididimiko oli na okweefiwa fiyo la kwafela omunhu e ‘shi endife nawa moinima aishe,’ mokupitika eyeleko nokuhe li kandula po monghedi ihe li pamishangwa, opo ngeno li pite po, ile li dje po diva. Osho otashi ka yeleka eitavelo letu noku li yelifa filufilu, nolwanima otashi ka ulika nghee le shi pondola. Josef naDavid ova li ve na elididimiko la tya ngaho. Kava li va kendabala okukonga po ekandulepo limwe li lili olo tashi dulika itali hafifa Jehova. Ponhele yaasho, ova longa noudiinini va tale kutya meenghalo davo otamu va dile shike shiwa. Ova li va teelela kuJehova, nonokutya enangeko noupuna lilipi tali va dile kuJehova omolwokuninga ngaho. Jehova okwa li e va longifa aveshe, opo va mangulule nokuwilika oshiwana shaye. — Genesis 41:39-41; 45:5; 2 Samuel 5:4, 5.
Nafye otashi dulika tu taalele eenghalo omo tashi dulika tu yelekwe tu konge po ekandulepo loupyakadi lihe li pamishangwa. Pashihopaenenwa, mbela owa teka omukumo molwaashi ino mona natango kaume kopahombo ta wapalele? Ngeenge osho, henuka eyeleko keshe lokuhadulika koshipango shaJehova ‘shokuhombola ashike mOmwene.’ (1 Ovakorinto 7:39) Mbela oto ungaunga nomaupyakadi omohombo yoye? Ponhele yokuliyandja komhepo younyuni oyo hai xumifa komesho etopoko neteyohombo, longeleni kumwe momafimbo madjuu. (Malakia 2:16; Ovaefeso 5:21-33) Mbela oto nane nonhatu mokufila oukwaneumbo woye oshisho omolwouxupilo tau kande omapunya? Okuteelela kuJehova okwa kwatela mo okuhenuka okuninga oinima tai limbilike, ile ihe li paveta, opo ngeno u mone oshimaliwa. (Epsalme 37:25; Ovaheberi 13:18) Hano, atushe otwa pumbwa okulonga noudiinini, opo tu tale kutya oshike hatu dulu okuninga po, nonande otu li meenghalo didjuu, nokukendabala monghedi oyo tai ke tu pefa omanangeko noupuna kuJehova. Eshi hatu ningi ngaho, natu kale twa tokola toko tu kale twa teelela kuJehova oye e tu kwafele tu ungaunge nomupondo neenghalo. — Mika 7:7.
Omamona Opamhepo
Ino Efa Nande Osha Shi Ku Imbe Ondjabi Yoye
11 Ngeenge otwa kulike ohole nombili momitima detu, itatu ka twila vamwe ondubo. Eendjovo daKalunga oda ti: “Ohole i noutalanheni, ohole i nolukeno; ohole ihai fi efupa.” (1 Kor. 13:4) Opo tuha efe ondubo i kule momitima detu, otwa pumbwa okukendabala okukala hatu tale ko oinima ngaashi Kalunga he i tale ko nokutala ko ovamwatate novamwameme ve li oilyo yolutu lopaKriste limwe. Osho otashi ke tu kwafela tu kala tu uditile vamwe oukwao wananghali, metwokumwe nomayele a nwefwa mo oo a ti: Ngeenge “oshinhimbu shimwe tashi fimanekwa, oinhimbu aishe otai hafe pamwe nasho.” (1 Kor. 12:16-18, 26) Ponhele yokukala twa twila vamwe ondubo ngeenge va mona omanangeko noupuna, natu kale twa hafa. Diladila koshihopaenenwa shomonamati wohamba Saul, Jonatan. Ka li a twila David ondubo eshi a fyuulula oshipundi shaxe. Ponhele yaasho, okwa li e mu twa omukumo. (1 Sam. 23:16-18) Mbela ohatu dulu ngoo okukala ovanalukeno novanahole ngaashi Jonatan?
25 APRILI–1 MEI
OMAMONA OMEENDJOVO DAKALUNGA | 1 SAMUEL 25-26
“Mbela Oho Katuka Nopehe Na Okudiladila?”
Okwa Li A Katuka Pandunge
10 Mbela ovakwaita ovo va li hava longo noudiinini ova li va ungaunga ngahelipi novafita ovo? Okwa li shipu kuvo okukala ngeno tava kufa peedi efimbo nefimbo, ndele hasho va li va ninga. Mepingafano naasho, ova li va amena oufita novapiya vaNabal. (Lesha 1 Samuel 25:15, 16.) Eedi novafita ova li tava dulu okuhangwa koiponga molwaashi oilyani oya li ihapu pefimbo opo. Eengaba daIsrael dokolukadi oda li popepi, nomolwaasho eembudi dokoilongo imwe oda li hadi va ponokele lwoikando.
11 Otashi dulika sha li shidjuu kuDavid okupalula ovakwaita vaye aveshe mombuwa. Nomolwaasho, efiku limwe okwa li a tuma ovatumwa 10 va ka pule ekwafo kuNabal. David okwa li a hoolola omhito tai wapalele. Osha li efimbo loshivilo shokukulula eedi, efimbo opo ovanhu va li hava kala ve na omhepo yokuyandja nova hafa. David okwa li yo a longifa oitya ya hoololekeka nomautumbulilo oo taa ulike efimaneko. Okwe lipopya ta ti, “omona woye David,” tashi dulika e shi ninga monghedi yefimaneko okuulika kutya Nabal omukulunhu kuye. Mbela Nabal okwa li e linyenga ngahelipi? — 1 Sam. 25:5-8, yelekanifa no-NW.
12 Okwa li a handuka neenghono. Omulumenhu omunyasha oo a tumbulwa pehovelo loshitukulwa eshi okwa lombwela Abigail kutya Nabal okwe “va tuka.” Nabal oo a li muluva okwa li ta tanguna shi na sha nomingome daye di na ondilo, omeva nombelela yaye oyo a toma. Okwa ula David kutya ke na oshilonga, nokwe mu faafanifa nomupiya oo a ya onhapo mwene waye. Nabal otashi dulika a li e na etaleko la fa laSaul, oo a li e tonde David. Ashike aveshe vavali kava li ve na etaleko la fa laJehova. Kalunga okwa li e hole David nokwa li e mu tala ko e li ohamba yomonakwiiwa yaIsrael, ndele hangaashi omupiya omunashibofa. — 1 Sam. 25:10, 11, 14.
Okwa Li A Katuka Pandunge
18 Okwa li e udite a fa oye a etifa oupyakadi oo nokwa pula David e mu dimine po. Okwa li a dimina shili kutya omushamane waye elai ngaashi edina laye tali ti, notashi dulika a li a popya kutya David ote ke lidinifa ashike ngeenge okwa katukile onghatu omunhu a tya ngaho. Okwa li a ulika kutya okwe lineekela David e li omukalelipo waJehova, nokwa dimina kutya okwa li ta lu “oita yOmwene.” Okwa ulika yo kutya oku shii osho Jehova a udaneka shi na sha naDavid nosho yo ouhamba, eshi a ti: ‘Omwene te ku ningi ohamba yaIsrael.’ Shimwe vali, Abigail okwa li a ladipika David aha katuke onghatu oyo tai ke mu etela etimba lohonde ile oyo lwanima tai ke mu ‘nyikifa oluhodi,’ sha hala okutya, tai ke mu ningifa a kale e na eliudo tali mu vele ombedi. (Lesha 1 Samuel 25:24-31.) Odo kada li tuu eendjovo diwa notadi kumu omutima!
Omamona Opamhepo
Okwa Li A Katuka Pandunge
16 Mbela osho osha hala okutya Abigail okwa li a tukululila oshibofa oukwamutwe womushamane waye? Ahowe; kaleka momadiladilo kutya Nabal okwa li a ungaunga nai nomupiya waJehova omuvaekwa, naasho osha li tashi dulu okudipaifa oilyo ihapu youkwaneumbo waye oyo ya li ihe na ondjo. Mbela Abigail ita ka kala a fa ta yambidida epuko lomushamane waye ngeenge okwa dopa okukatuka onghatu? Pomhito oyo, okwa li e na okudulika kuKalunga ponhele yokudulika komushamane waye.