OKUKALA OMUKRISTE WASHILI
Kala ho litale ko ngaashi Jehova he ku tale ko
“Omwene okwa hokwa oshiwana shaye.” (Eps 149:4) Nonande inatu wanenena, oha kala e wete omaukwatya etu mawa nokudula kwetu. Omafimbo amwe ohashi kala shidjuu okudidilika mo omaukwatya etu aa mawa. Otashi dulika tu kale hatu kondjo nomaliudo etu, okukala tu udite tuhe na oshilonga omolwonghedi omo vamwe hava ungaunga nafye. Ile ngeenge otwa kala hatu yandje elitulemo komapuko oo twa ninga monakudiwa, otashi dulika tu kale twa limbililwa, ngeenge Jehova oku tu hole ngoo shili. Oshike tashi dulu oku tu kwafela, ngeenge otwa hangika komaliudo a tya ngaho?
Dimbuluka kutya Jehova oha dulu okumona osho ovanhu ihava dulu okumona. (1Sam 16:7) Sha hala okutya, oha dulu nokuli okumona osho itatu dulu okumona mufye vene. Ombiibeli oye tu kwafela tu ude ko nghee Jehova he tu tale ko. Ohatu dulu okuuda ko oshinima osho, ngeenge hatu lesha Ombiibeli nomahokololo oo taa ulike nghee Jehova e hole ovo have mu longele.
TALENI OKAVIDIO KALA WA TOMHWA MOMUTIMA KUTYA KALUNGA OKU KU HOLE, NDELE TAMU NYAMUKULA OMAPULO TAA SHIKULA:
Efaneko li na sha nomutondoki nosho yo xe otali tu hongo shike kombinga yanghee Jehova he tu tale ko?
Ngeenge omunhu oo a nyona enyono la kwata moiti okwa katuka onghatu, opo a tungulule ekwatafano laye naJehova, ongahelipi ta dulu okukala a tomhwa momutima kutya Kalunga oku mu hole? — 1Jo 3:19, 20
Omumwatate okwa mona ouwa ngahelipi mokulesha nomokudilonga kehokololo laDavid naJosafat?