Etine, 16 Oktoba
“Longekidileni Omwene ondjila mombuwa, yelakanifileni Kalunga ketu elila la yukilila mofuka.” — Jes. 40:3.
Olweendo lidjuu okudja muBabilon wa finda kuIsrael ola li tali dulu okukwata eemwedi nhee lwaapo, ashike Jehova okwa li e va udanekela kutya ota ka kufa po oshinima keshe osho sha li tashi va imbi okushuna. Ovajuda ovadiinini ova li ve shii kutya omauwa okushuna kuIsrael okwa li e dule kokule eliyambo keshe olo tava ningi. Enangeko noupuna la denga mbada ola kwatela mo elongelokalunga lavo. MuBabilon kamwa li otembeli yaJehova. Kamwa li oaltari oko Ovaisrael va li tava dulu okuyambela omayambo, oo a li taa pulwa paMhango yaMoses, nokapa li ovapristeri va unganekwa ovo va li tava dulu okuyamba omayambo oo. Shikwao vali, oshiwana shaJehova osha li shi dulike neenghono momuvalu kovalumenhu novakainhu ovapaani, ovo va li vehe na ko na sha naJehova, ile nomifikamhango daye. Onghee Ovajuda ovatilikalunga omayovi ova li va teelela nodjuulufi okushuna keduumbo lavo oko va li tava ka tungulula elongelokalunga la koshoka. w23.05 14-15 ¶3-4
Etitano, 17 Oktoba
“Kaleni hamu ende ngaashi ovana vouyelele.” — Ef. 5:8.
Otwa pumbwa ekwafo lomhepo iyapuki yaKalunga, opo tu twikile okulihumbata ngaashi “ovana vouyelele.” Omolwashike? Omolwaashi kashipu okukala twa koshoka mounyuni ou u na elihumbato inali koshoka. (1 Tes. 4:3-5, 7, 8) Omhepo iyapuki otai dulu oku tu kwafela tu finde omadiladilo ounyuni, mwa kwatelwa omahongo opanhu nosho yo etaleko lavo, olo tali kondjifafana nomadiladilo aKalunga. Omhepo iyapuki otai dulu yo oku tu kwafela tu kale hatu ‘longo ouwa nokukala ovayuki.’ (Ef. 5:9) Onghedi imwe omo hatu dulu okumona omhepo iyapuki omokwiilikana tu i pewe. Jesus okwa popya kutya Jehova ota ka ‘yandja omhepo iyapuki kwaavo tave mu indile.’ (Luk. 11:13) Ngeenge hatu tange Jehova pamwe pokwoongala kwopaKriste, ohatu pewa yo omhepo iyapuki. (Ef. 5:19, 20) Omhepo iyapuki yaKalunga ohai tu nwefa mo nawa, opo tu kale metwokumwe nonghedi oyo tai hafifa Kalunga. w24.03 23-24 ¶13-15
Olomakaya, 18 Oktoba
“Kaleni hamu indile, opo nee otamu pewa; kaleni hamu kongo, opo nee otamu mono; kaleni hamu konghola, opo nee otamu yeululwa.” — Luk. 11:9.
Mbela owa pumbwa okukala omunanheni shi dulife nale? Ngeenge osho, ilikana, opo u kale u i na. Onheni oi li oshitukulwa shoiimati yomhepo. (Gal. 5:22, 23) Onghee ohatu dulu okwiilikana tu pewe omhepo iyapuki nokupula Jehova e tu kwafele tu imike oiimati yayo. Ngeenge otwa shakeneke onghalo oyo tai yeleke onheni yetu, natu ‘kaleni hatu indile’ tu pewe omhepo iyapuki, opo tu kale ovananheni. (Luk. 11:13) Ohatu dulu yo okupula Jehova e tu kwafele tu tale ko oinima ngaashi ye he i tale ko. Opo nee konima ngeenge otwa ilikana, otwa pumbwa okuninga ngaashi hatu dulu, opo tu kale ovananheni efiku keshe. Ngeenge otwa kala hatu ilikana tu kale ovananheni nokukendabala okukala ovananheni, oukwatya oo otau ka mena omidi momitima detu notau ka kala oshitukulwa shomaukwatya etu.Otai ku kwafele u dilonga koihopaenenwa yopaMbiibeli. MOmbiibeli omu na oihopaenenwa ihapu yovanhu ovo va li ovananheni. Ngeenge otwa dilonga komahokololo oo, ohatu ke lihonga eenghedi omo hatu dulu okuulika onheni. w23.08 22 ¶10-11