Otu na okwiilikana

2 Kulyelye?

MBELA Kalunga oha pwilikine ngoo komailikano aeshe, kashi na nee mbudi kutya ohatu ilikana kulyelye? Ovanhu vahapu mounyuni kunena osho hava diladila ngaho. Vahapu ovo va hokwa okulimbwanga mumwe kwomaitavelo nova hala omalongelokalunga aeshe a kale a tambulwa ko osho va itavela ngaho, nonande omaitavelo avo okwa yoolokafana. Ndele mbela ediladilo la tya ngaho oli li tuu mondjila?

Ombibeli otai ti kutya ovanhu luhapu ihava ilikana kwaao e na okwiilikanwa. Pefimbo lOmbibeli, ovanhu vahapu ova li hava ilikana koihongwafano. Ndele Kalunga okwa li a londwela ovanhu lwoikando va henuke onghedi ya tya ngaho. Pashihopaenenwa, Epsalme 115:4-6 ola popya kombinga yoihongwafano la ti: “Oi nomatwi, ndee ihai udu ko.” Oshitwa osha yela kutya omolwashike u na okwiilikana kukalunga oo ehe na nande efiku a ude omailikano oye?

Ehokololo limwe lOmbibeli otali yelifa nawanawa oshitwa osho. Omuprofeti washili Elia okwa li a shonga ovaprofeti vaBaal a ti kutya nava ilikane kukalunga kavo Baal, opo nee, Elia naye okwa ka ilikana kuKalunga kaye. Elia okwa li a popya kutya Kalunga kashili ota ka nyamukula eilikano ndele kalunga ou ehe fi washili ita ka nyamukula. Ovaprofeti vaBaal ova li va dimina okuninga ngaho, nova li va ilikana oule wefimbo lile va mana mo, nova li nokuli tava lili mokule, ndele kava li va pondola. Ombibeli oya ti kutya kape na nande ou e va ‘nyamukula, nokape na ou e va uda.’ (1 Eehamba 18:29) Ndele mbela oshike sha li sha ningwa po eshi Elia a ilikana?

Konima eshi Elia a mana okwiilikana, Kalunga okwa li e mu nyamukula meendelelo, a tuma omundilo okudja meulu ndele tau xwike po eyambo olo Elia a li a longekida. Omolwashike eilikano laElia la li la nyamukulwa? Ope na oshinima shimwe sha fimanenena osho shi li meilikano laElia, olo tali hangwa 1 Eehamba 18:36, 37. Eilikano olo ola li lixupi neenghono, la li ashike la fikama po moitya 30 lwaapo yOshiheberi shonale. Ndele nande ongaho, momatumbulo ashike oo manini, Elia okwa li a tumbula lwoikando itatu edina laKalunga, Jehova.

Baal osho tashi ti “omwene,” osha li oshikalunga shOvakaanan, nedina lasho ola li hali ifanwa oinima imwe i lili yomoshitukulwa osho. Ndele Jehova edina le likalekelwa, olo hali ifanwa ashike Omunhu umwe aeke meshito alishe. Kalunga okwa li a lombwela oshiwana shaye a ti: “Aame [Jehova, NW], olo edina lange, ihandi yandje efimano lange kuumwe.” — Jesaja 42:8.

Mbela eilikano laElia nosho yo omailikano ovaprofeti vaBaal okwa li a yukifwa komunhu umwe? Elongelokalunga laBaal ola li hali xutula eenghedi dovanhu nomilandu dalo doumbwada nomwa li hamu ningwa nokuli omaxwikiloyambo ovanhu. Mepingafano naasho, Jehova okwa li a lombwela oshiwana shaye, Israel, shi mu longele monghedi yefimaneko, nosha li shi na okuhenuka eenghedi da tya ngaho inadi koshoka. Diladila kwaashi: Ngeenge owa shangela kaume koye onhumwafo oo wa fimaneka, mbela oto ka teelela i twalwe komunhu wedina limwe li lili nohe lihumbata monghedi ya yooloka ko filufilu kwaayo yakaume koye? Hasho nandenande!

Ngeenge to ilikana kuJehova, oto ilikana kOmushiti, Xe yovanhu aveshe.a Omuprofeti Jesaja okwa li a ilikana ta ti: “Akutu Omwene, Oove Tate yetu.” (Jesaja 63:16) Onghee hano, Kalunga oo Oye Jesus a li ta popi kombinga yaye eshi a li a lombwela ovashikuli vaye a ti: “Ohandi londo kuTate nokuXo yeni, kuKalunga kange nokuKalunga keni.” (Johannes 20:17) Jehova oye Xe yaJesus. Jesus okwa li ha ilikana kuKalunga Jehova nokwa li a honga ovashikuli vaye va kale tava ilikana kuye. — Mateus 6:9.

Mbela Ombibeli oye tu lombwela tu kale hatu ilikana kuJesus, kuMaria, kovayapuki ile kovaengeli? Ahowe, oye tu lombwela ashike tu ilikane kuJehova. Natu ka taleni omatomheno avali kutya omolwashike tu na okwiilikana ashike kuJehova. Lotete, eilikano oli li onghedi yokulongela Kalunga, nOmbibeli oya popya kutya otu na ashike okulongela Jehova. (Exodus 20:5) Etivali, Ombibeli otai popi kutya Jehova oye “Omuudi womailikano.” (Epsalme 65:3) Nonande Jehova oha yandje oinakuwanifwa ihapu kuvamwe nehalo liwa, ina yandja oshinakuwanifwa osho komunhu nande oumwe. Okwa udaneka kutya oye mwene ta ka pwilikina komailikano etu.

Ngeenge owa hala Kalunga a pwilikine komailikano oye, dimbuluka ekumaido lopamishangwa olo tali ti: “Keshe tuu ou ta ifana edina lOmwene ota ka xupifwa.” (Oilonga 2:21) Mbela Jehova oha pwilikine ashike komailikano aeshe nopehe na oshiteelelwa sha sha? Mbela ope na vali oshinima shimwe osho twa pumbwa okushiiva ngeenge otwa hala Jehova a pwilikine komailikano etu?

[Eshangelo lopedu]

[Efano pepandja 5]

Onghedi omo Elia a li a shonga ovaprofeti vaBaal otai ulike kutya omailikano aeshe ihaa yukifwa komunhu umwe