Olukeno ohali hemuna omitima daavo va fula onya
OMUKAINHU umwe omunamido ka li e linyenga nawa eshi Eendombwedi mbali dokuHolanda, George naManon, da li de mu etela onghundana iwa yOuhamba. Oda ka uda kutya okwa filwa ovashamane vavali nosho yo omonamati nokwa li e na ouyahame wopomatwikililo omakipa. Nonande omukulukadi oo okwa li ngoo a lota pefimbo leenghundafana, ka li natango ta ulike oukaume.
Konima yaasho, George okwa li a lombwela Manon va alukile ko vali komukainhu oo nove mu etele okapandi keengala molwaashi ota monika e udite owike nokwa fula onya. Eshi ve mu etela eengala odo, omukulukadi oo wedina Rie okwa li e shi kuminwa. Ndele molwaashi ova li ve uya ine shi teelela, ova li va ninga eudafano opo va aluke efiku limwe vali. Eshi George naManon va ka aluka efiku olo va udafana, inava hanga mo omunhu meumbo. Nonande ova li va alukila ko keumbo oko pomafimbo a yoolokafana, inave mu hanga mo. Ova li tava diladila nokuli kutya pamwe okwe va hondama.
Fikulimwe, George osho a ka hanga Rie meumbo. Rie okwa li a yandja ombili eshi inave mu hanga mo meumbo efiku olo va li va udafana molwaashi okwa li moshipangelo. Okwa ti: “Ou shii ngoo kutya oshike nda li nda ninga po fiku mwa dja apa? Onda li nda hovela okulesha Ombibeli.” Konima yaasho, ova li va hovela eenghundafana tadi tungu nosho yo ekonakonombibeli.
Eshi Rie a kala nokukonakona Ombibeli, okwa li a lunduluka a ninga omukainhu e na omhepo iwa nokwa hafa, ponhele yokukala a fula onya. Nonande ka li ha dulu okudja mo meumbo, okwa li a hovela diva okuhepaululila ovo va li have uya oku mu talela po kombinga yeitavelo laye. Ka li yo ha dulu okuya kokwoongala alushe omolwoukolele waye, ashike nande ongaho, okwa li ha kala a hafa ngeenge ovamwatate novamwameme tave mu talele po. Fiku a wanifa eedula 82, okwa li a ya koshoongalele shopashikandjo nokwa li a ulika kutya okwe liyapulila Jehova okupitila meninginifo.
Rie okwa ka fya ashike konima yeemwedi dinini nokwa li a fiya a shanga okatevo. Okatevo kaye oka li taka popi shi na sha nowike oo omunhu ha kala e udite pefimbo loukulupe nokwa divilika efimano lokukala omunalukeno. Manon okwa ti: “Omutima wange owa li wa kumwa kwaasho nda lesha mokatevo oko nonda hafa eshi Jehova e tu kwafela tu mu kenukile.”
Oshihopaenenwa shaJehova osho hashi tu kwafele tu ulikile vamwe ohole noku va kenukila. (Ef. 5:1, 2) Oukalele wetu otau ka eta oidjemo iwa eshi hatu ‘liholola ofye ovayakuli vaKalunga mokukala nombili’ ile olukeno. — 2 Kor. 6:4, 6.