Қолостықтарға
1 Құдайдың еркімен Мәсіх Исаның елшісі болған Пауыл және бауырласымыз Тімөте+ 2 Мәсіх Исамен байланыста жүрген Қолостағы қасиетті де адал бауырластарға жазып отыр.
Құдай Әкеміз сендерге рақымы мен тыныштығын сыйласын!
3 Сендер үшін дұға еткен сайын, Иеміз Иса Мәсіхтің Әкесі Құдайға үнемі алғыс айтамыз. 4 Сендердің Мәсіх Исаның ізбасарлары ретіндегі сенімдерің мен барлық қасиеттілерге деген сүйіспеншіліктерің жайлы естідік. 5 Ал бұл сенімдерің мен сүйіспеншіліктерің өздерің үшін көкте сақтаулы тұрған үмітке негізделген+. Осы үміт жайлы сендер ізгі хабардың шынайы сөздерін естігенде білдіңдер. 6 Өздеріңе жеткен осы ізгі хабар бүкіл дүниеде қалай жеміс беріп, қалай таралып жатқан болса+, Құдайдың рақымы туралы шындықты естіген және сол жайлы тура білім алғаннан бері сендердің араларыңда да тап солай болуда. 7 Бұл рақым жайында сендер өзіміз сияқты құл, сүйікті Епафрастан+ білдіңдер. Ол — біздің орнымызға өздеріңе қызмет етіп жүрген Мәсіхтің адал қызметшісі. 8 Рух арқылы дамытқан сүйіспеншіліктеріңді бізге сол айтып жеткізді.
9 Сондықтан да бұл туралы естіген күннен бастап, сендер үшін Құдайға үнемі дұға етіп+, оның еркі жайлы тура білімдерің арта берсін+, әрі даналық пен киелі рух беретін түсінікке ие болсын деп сұраймыз+. 10 Біз Ехобаның* есіміне лайықты өмір сүріп, оған барлық жағынан ұнамды әрі әрбір игі істе жемісті болсаңдар екен, сондай-ақ Құдай жайлы тура білімдерің тереңдей түссе екен дейміз+. 11 Сендер оның ұлы құдіретінен қажетті күш алып+, бәріне шыдамдылықпен және қуанышпен төзсін 12 әрі жарықтағы қасиеттілердің мұрасына+ ортақтасуға өздеріңді лайық еткен Әкеге әрдайым алғыс айтсын деп дұға етудеміз.
13 Ол бізді түнектің билігінен құтқарып+, сүйікті Ұлының патшалығына енгізді. 14 Біз оның Ұлының төлемі арқылы азат етілдік, яғни күнәларымыз кешірілді+. 15 Ол — көзге көрінбейтін Құдайдың кейпі+, жаратылыс атаулының тұңғышы+. 16 Өйткені көктегі мен жердегінің, көзге көрінетін мен көрінбейтіннің — тақтар, билеушілер, үкіметтер мен басшылардың — бәрі сол арқылы жаратылды+. Барлығы сол арқылы+ және сол үшін жаратылды. 17 Сондай-ақ ол барлық нәрседен бұрын бар болған+, әрі басқа нәрселердің бәрі сол арқылы жаратылған. 18 Ол — дененің, яғни қауымның басы+. Барлық нәрсенің алғашқысы болу үшін ол бәрінің бастамасы және өлімнен қайта тірілгендердің тұңғышы болды+. 19 Өйткені Құдай барлық нәрсенің оның бойында толық болғанын+, 20 сондай-ақ оның азап бағанасында* төгілген қаны+ арқылы жердегі мен көктегінің бәрін өзімен татуластыруды жөн көрді+.
21 Кезінде Құдайдан алшақ болған әрі зұлым істер жөнінде ойлап онымен жауласып жүрген сендерді 22 енді ол Ұлының тәндік денесі, яғни өлімі, арқылы өзімен татуластырды. Құдай мұны өзінің алдында қасиетті, таза әрі еш айыпсыз болуларың үшін істеді+. 23 Ал бұл үшін сендер сенімдеріңді сақтап+, негіздеріңде нық тұрып+, берік болуларың+, әрі өздерің естіген және барлық жерде уағыздалған+ осы ізгі хабарға негізделген үміттен таймауларың керек. Мен, Пауыл, осы ізгі хабарды уағыздайтын қызметші болдым+.
24 Қазір сендер үшін азап шегіп жатқаныма қуанамын+, бірақ Мәсіхтің денесінің, яғни қауымның+, мүшесі ретінде мен әлі жеткілікті азап шеккен жоқпын деп есептеймін+. 25 Мен осы қауымның қызметшісі болдым, өйткені сендердің игіліктерің үшін Құдай маған міндет жүктеп+, өз сөзін толықтай уағыздауды, 26 яғни қасиетті құпияны+ уағыздауды тапсырды. Бұл құпия бұрынғы замандарда* және өткен ұрпақтарға жасырын болып келді+, ал енді оның қасиетті қызметшілеріне ашылды+. 27 Құдай оларға қасиетті құпияның зор байлығын басқа ұлттар арасында ашып беруді дұрыс көрді+. Бұл құпия — өздеріңмен байланыстағы Мәсіх, яғни онымен бірге даңққа бөлену үміті+. 28 Біз Мәсіх жайында жариялап, әрбір адамға ескерту жасап, барынша даналықпен тәлім беріп жүрміз. Бұны Құдай алдында әрбір адамды Мәсіхтің рухани толысқан шәкірті ету үшін істеудеміз+. 29 Осы үшін мен бойымда әрекет етіп жатқан Құдайдың күшіне сүйеніп, жан сала еңбек етіп жүрмін+.