Decembari

Kunngik­kormiuni atorfilik Etiopiamiu imermut morsutsin­neqarnissamut piareersimava? Etiopiamiu ‘Jerusalemmimut guutisioriar­torsimammat’ paasisin­naavarput taanna juutit upperisaannut ilanngus­simasoq. (ApS 8:27) Hebræerisut Allakkani Illernartuni Jehova pillugu ilikkagaqarsimassaaq. Sulili ilikkagaqar­nerorusuppoq. Tassami Esajap allagaani atuarujoortoq Fiilippip naapippaa. (ApS 8:28) Etiopiamiu paasisaqar­nerorusuppoq. Etiopiamiit Israalimut aallarpoq Jerusalemmimi guutisiorfimmi Jehova guutisiorfigisin­naajumallugu. Fiilippip Etiopiamiu ilumoortunik nutaanik pingaarutilinnik, ilaatigut Missiarsip kinaaneranik ilinniartippaa. (ApS 8:34, 35) Jehova Jiisusilu asaneruleramigit imermut morsutsin­neqarusulerpoq Jiisusimik malinnit­tunngorluni. Fiilippip takusin­naagamiuk piareersimasoq imermut morsutsippaa. w23.03 8-9 § 3-6

Sallusarutta Jehovap iluarinavian­ngilaatigut. (Uss 6:16, 17) Inuppassuit salluneq nalingin­naasutut isigisaraluaraat Jehovap nuannarin­ngimmagu sallunaveersaar­tarpugut. (Tuss 15:1, 2) Sallunngik­kaluarlunili piaaraluni allat kukkusumik isumaqalis­sutigisin­naasaannik oqaluttoqartarpoq. Sallunaveersaar­niaruttali taamaalior­naveersaar­tassaagut. Aamma oqaluuserinerluinaveersaar­tassaagut. (Uss 25:23; Tes 2. 3:11) Malugigukku oqaloqatigiinneq ajortumut saalersoq isumalluar­nartumik oqaaseqarit. Inuppassuit oqalussin­naanertik atornerlut­tarmassuk oqaloriaatsitta Jehovamit iluarineqarnissaa qulakkeerumallugu ilungersor­tariaqarpugut. Oqaluus­sinermi, ataatsimiinnerni allanillu oqaloqateqarnermi Jehovap ataqqinaatigisaminik oqaloriaaseqar­niarnerput pilluaq­qussavaa. Jehovap inuit ajortut suujunnaarsippagit ataqqinaatigisaanik oqalunnissarput sapernan­nginnerungaassaaq. – Juud 15. w22.04 9 § 18-20

Jehovap Jiisusillu qanoq asatigigaatigut eqqarsaatigigaangatsigu taakkua asanissaannut killinneqar­tarpugut. (Joh 1. 4:10) Annermik asaneruler­tarpagut paasigaangatsigu Jiisusi uagorpiaq pilluta toqusoq. Apustilip Paulusip tamanna paasivaa, qujamasunninilu ersersippaa Galaatiamiunut ima allakkami: ‘Guutip ernera, uannik asannippoq uangalu pillunga imminut pilliutigaluni.’ (Gal 2:20) Utertitsis­sutitut akiliut pissutigalugu Jehovap imminut qanillisippaatit ikinngutiginias­sagakku. (Joh 6:44) Jehovap ilinni ajunngitsoq takugamiuk ikinngutigiler­niaraatit akisunerpaamillu pisiarisimagaatit nalunagu qamuuna kissaam­missutigisarpat, ilaa? Jehova Jiisusilu asaneruler­tarpatit, ilaa? Taamaattumik una eqqarsaatigisassaavoq: ‘Asanninnera sunissamut kajumis­sissutigissavara?’ Guutimik Kristusimillu asanninnerput inuit allat asanissaannut kajumis­sissutigaarput. – Kor 2. 5:14, 15; 6:1, 2. w23.01 28 § 6-7

Jehovap siunertaatut isumaqatigiilluta guutisioqatigiin­niassagatta Biibili pingaaruteqarluinnarpoq. Allassimaffiit ilarpassuisa taamaallaat atuartartunit maniguuttunit paasineqar­nissaat Jehovap isumagaa. (Luk 10:21) Inuppassuit Biibilimik atuartarput. Maniguuttulli kisimik paasilluar­tarpaat maleruarlugulu. (Kor 2. 3:15, 16) Jehovap ilisimassusia Biibilimit erserpoq. Jehovap Biibili aqqutigalugu ilagiittut ilinniar­tittarpaatigut, aammali tamatta immikkut tuppallersar­tarlutalu ilitsersor­tarpaatigut. Jehovap oqaasia atuaraangatsigu malugisarparput soqutigigaatigut. (Es 30:21) Biibilimik atuaraangavit misigisarpiuk allassimaffik ilinnorpiaq allataasoq? Inuilli millionilik­kuutaat Biibili iluaqutigisarpaat. Qanoq illit pisariaqar­titannut tulluartumik atoriaan­naasumillu paasissutis­saqarsinnaava? Pissutissatuaq tassa Jehova atuakkior­tuummat ilisimas­suseqar­nerpaaq. – Tim 2. 3:16, 17. w23.02 4-5 § 8-10

Jehova asagatsigu kiffartor­nitsinni sapinngisatsinnik iliuuseqarusuppugut. Taamaalius­saguttali anersaakkut ittunik anguniagaqar­tariaqarpugut. Assersuutigalugu kristumiutut pissuserineqar­tussanik ineriar­tortitsisariaqarpugut, atorluarsin­naasatsinnik piginnaaneqaler­tariaqarpugut allanillu ikiuinissamut periarfis­sarsior­tariaqarluta. Sooq anersaakkut ittunik anguniagaqar­tuassaagut? Pingaarnertut Ataatarput qilammiusoq asannittoq nuannaar­tikkusuk­katsigu. Kiffartornermi piginnaanitsinnik sapinngisamik atuinerput Jehovap nuannaarutigissavaa. Aamma uppeqatigut pitsaanerpaamik ikiorsin­naanias­sagatsigit anersaakkut siumukarusuppugut. (Tes 1. 4:9, 10) Qanoq sivisutigisumik Nalunaajaasuusimanerput apeqqutaatinnagu tamatta anersaakkut ineriar­torsinnaavugut. w22.04 22 § 1-2

Nunarsuarmi politikkikkut pissaanillit qanittukkut Babylon­nersuaq, upperisarsiornerup eqqunngitsup naalagaaffissua, saassutissavaat. Tamanna annikil­liornar­torsuarmut aallarniutaassaaq. Tamatuma kingunerisaanik inuppassuit Jehova guutisiorfigilissavaat? Naamik. Saqqummersitat kapitali 6-imi ersersin­neqarpoq taamanik­kussamut Jehovamut kiffartun­ngitsut politik­kerinut nunarsuarmilu niuernikkut aaqqissuussanut, qaqqanut assersuun­neqartunut, illersor­tissarsiussasut. Jehovap kunngeqarfimminik tapersersuin­nginnerat pissutigalugu akerlilersor­timisut isigissavai. (Luk 11:23; Saqq 6:15-17) Annikil­liornar­tussarsuarmi Jehovamut aalajaallutik kiffartortut allaanerunertik ersersissavaat. Nunarsuarmi inunni eqimattatut kisiartaallutik Jehova Guuti kiffartorfigissavaat ‘uumasorlu nujuartaq’ tapersersorusun­ngilluin­nassallugu. – Saqq 13:14-17. w22.05 16-17 § 8-9

Guutip innuttaasa ‘Kunngeqarfik pillugu nutaarsiassat nuannersut’ kisiisa oqaluus­sissutigisus­saanngilaat. (Mat 24:14) Aamma inngilit suliaat Saqqummersitani kapitalini 8-miit 10-mut allaatigineqartut tapersersor­tariaqarpaat. Guutip kunngeqarfianik itigartitsisut naalliuutissaat arlallit inngilinit taakkunannga nalunaarutigineqarput. Taamaattumik Jehovap Nalunaajaasuisa Saatanip silarsuaata ajortup immikkoortuisa assigiin­ngitsut Guutimit eqqartuun­neqarnis­saannik tusarliussaq ‘nataqqornatut innertullu’ allaatigineqartoq nalunaarutigisimavaat. (Saqq 8:7, 13) Ullormi Jehovap kamaffissaani inuit aniguis­sagunik inuunertik allanngor­terujus­suartariaqarlugulu naggatissaq nalliutingajalersoq paasisariaqarpaat. (Sef 2:2, 3) Tusarliussarli tamanna nuannarineqan­ngimmat nalunaarutigiumallugu sapiittariaqarpugut. Annikil­liornar­tussarsuarmi eqqartuussummik tusarliussaq inaarutaasoq inunnit mamiatsaatigineqar­nerulissaaq. – Saqq 16:21. w22.05 6-7 § 18-19

Aappariit kristumiut angajoq­qaanngortut eqqarsaatigikkit. Meeqqat qanoq perorsar­neqarsinnaasut pillugu oqalugiaaterpassuit tusarnaarsimavaat. Qitornar­taarmatali siunnersuutit taakkunani eqqartor­neqarsimasut isumaqar­nerulerput. Qitornar­taartik namminneq perorsar­tussaavaat. Tamannalu akisussaaf­ferujussuuvoq! Ersarippoq inuunerput allanngoraangat najoqqutassiat Biibilimeersut nalunngil­luakkagut isumaqarluar­nerulertartut. Taamaattumik Jehovamut kiffartortut itsaq Israalimi kunnginut peqqussut maleruarlugu ‘inuunertik tamaat’ Biibili atuarlugulu atuakkatik eqqarsaatigeq­qissaar­tarpaat. (Mos 5. 17:19) Angajoq­qaajususi, kristumiup akisussaaf­figisin­naasaasa pingaar­nersaasa ilaat akisussaaf­figaarsi, tassa meeqqassi Jehova pillugu ilinniar­tinnissaat. Guuterpulli pillugu ilisimas­sutissiin­narusun­ngilasi. Meeqqasi Jehovamik asannin­nissaannut ikiorusuppasi. w22.05 26-27 § 2-3

Ajortulior­tarnerup ajortuliorsimanerul­luunniit aliasuutiginerat naammanngilaq. Iliuuseqar­nissamut piareersimasariaqarpugut. Jehovap isumakkeerfigin­nissanerluni aalajanger­nialeraangami ajortuliortoq imminut saassimanersoq maluginiartarpaa. Tassa inuk ajortuliorun­naarluni Jehovap iluarisaatut inooriaaseqar­tariaqarpoq. (Es 55:7) Jehovatut eqqarsar­taaseqalerumalluni isumaminik allannguisariaqarpoq. (Rom 12:2; Ef 4:23) Eqqarsar­taaserisimasaminik iliuuserisarsimasaminillu aalajangersimal­luinnarluni unitsitsisariaqarpoq. (Kol 3:7-9) Kisianni soorunami aatsaat Kristusip pilliutaa upperigutsigu Jehovap isumakkeerfigerusus­sallutalu ajortuliagut piiassavai. Jehovap pissuserisatsinnik allannguiniarluta sapinngisatsinnik iliuuseqartugut takuguniuk pilliut taanna tunngavigalugu isumakkeerfigerusus­savaatigut. – Joh 1. 1:7. w22.06 6 § 16-17

Oqaluttuarisaanerup ingerlanerani inuit imminnut ajortumik piuarsimapput. (Oqal 8:9) Assersuutigalugu oqartus­saassusertik atornerlut­tarpaat, pinerluttut nakuusertarput, meeqqat pimmasaarisartut atuaqatitik ajuallatsil­lugillu sioorasaar­tarpaat, allaallu ilaasa ilaquttatik peqqarniitsumik pisarpaat. Tupinnanngilaq inunnut qunusaratta! Saatanip tamanna qanoq atorluar­niartarpaa? Saatanip inunnut qununeq atorlugu eqqunngitsulior­tinniar­tarlutalu oqaluus­siunnaar­tinniar­tarpaatigut. Naalakkersuisut Saatanimit sunnerneqar­nermikkut sulinerput inerteq­qutaalersit­tarlugulu malersor­tarpaatigut. (Luk 21:12) Saatanip silarsuaata Jehovap Nalunaajaasui pillugit paasissutissat eqqunngitsut salluliuutillu siammar­tertarpai. Tamakkuninnga upperinnittut illaruaatigisarpaatigut, allaallu saassut­tarpaatigut. (Mat 10:36) Saatanip saassus­seriaasii tupaallaatigaagut? Naamerluinnaq. Kristumiut siulliit nalaanniilli taamatut saassus­sisarpoq. – ApS 5:27, 28, 40. w22.06 16 § 10-11

Naapertuil­luarnermut ‘unnersuun­neqartunut’ kikkut ilaappat? Makititaasut Harmagedonnimilu aniguisut paratiisimilu meeqqat inunngorumaartussat. Ukiut 1.000-t naappata nunarsuarmi kikkut tamarmik naammal­luinnar­tuussapput. Eqqaamas­savarput inuk naammal­luinnar­tuunini pissutigiin­narlugu naassaan­ngitsumik inuuler­navianngitsoq. Adami Evalu eqqarsaatigikkit. Naammal­luinnar­tuupput, naassaan­ngitsumilli inuuneqalis­sagunik Jehovamut Guutimut naalattuunertik ersersit­tariaqarpaat. Ajoraluar­tumillu Jehovamut naalanngillat. (Rom 5:12) Ukiut 1.000-t naappata inuit tamarmik naammal­luinnar­tunngorsimas­sagamik taakkua tamarmik Jehovap naalakkersuinera naassaan­ngitsumik tapersersorluin­nassavaat? Imaluunniit Adami Evalu assigalugit naammal­luinnar­tuugaluarlutik aalajaak­kunnaassappat? Apeqqutit taakku akineqar­tariaqarput. w22.09 22-23 § 12-14

Nunarsuarmi pissutsit eqqarsaatigigaangakkit isumalluarnissat sapernar­tittarpiuk? Ilaqutariit imminnut ungasil­liartorput. Inuit ataatsimut isigalugit nakuuser­nerulerlutillu namminis­sarsior­nerulerlutillu saassus­siumatunerulerput. Amerlasuut oqartus­saasunik tatigin­nippian­ngillat. Pissutsilli taakkorpiaat isumallualis­sutigisin­naavatit. Sooq? ‘Ullut kingulliit’ pillugit siulittuummut maluginiar­nartumut naapertuuteq­qissaartumik inuit pissusilersormata. (Tim 2. 3:1-5) Siulittuutip tamatuma eqquunnera, inuup unneqqarissup kialuunniit miserratigisin­naanngisaa, Guutip kunngeqarfiani Kristusip Jiisusip kunngisut naalakkersuilersimaneranut uppernarsaataavoq. Tamannali Kunngeqarfik pillugu siulittuuterpassuit ilaannaraat. Siulittuutit taakku tamarmik katiter­takkatut imminnut naapertuul­lutillu Jehovap pisussanut piffissaliussaani sumut killinnitsinnik ersersitsipput. w22.07 2 § 1-2

Nunani tamalaani COVID-19-imik tuniluut­toqarnerani qanoq ataatsimiit­tarnissatsinnik oqaluus­sisarnis­satsinnillu paasiuminartumik ilitsersor­neqarpugut. Ingerlaan­nangajak internetikkut ataatsimiit­talerlutalu ataatsimeersuar­talerpugut. Aamma allakkat oqarasuaallu atorlugit oqaluus­sinerusalerpugut. Jehovap ikiungaarpaatigut. Immikkoor­tortaqarfip­passuit nalunaarput oqaluus­sisartut amerleriarujus­suarsimasut. Allaat piffissami tamatumani amerlasuut qiimmaal­lannartunik misigisaqarput. Nunani tamalaani tuniluut­toqalermat immaqa ilaat misigipput peqatigiiffipput mianersorpal­laartoq. Arlaleriarlutali takuarput ilitsersuutit tunngavis­saqarluartut. Jiisusip asannilluni innuttaminik siulersuinera eqqarsaatigeq­qissaaraangatsigu qularineq ajorparput qanorluunniit pisoqas­sagaluarpat Jehovap erneratalu asasaata najussagaatigut. – Hebr 13:5, 6. w22.07 13 § 15-16

Jehovap qinunikkut unnersiutiginerata saniatigut tunniuttagai pitsaal­luinnartut pillugit qutsavigerusut­tarparput. Assersuutigalugu naasut qalipaatigissut, nerisassat assigiin­ngitsorpassuit mamarunartut ikinngutillu qiimmaal­lannartut pillugit qutsavigisin­naavarput. Ataatatta asannittup nuannaar­tikkumalluta tamakkuninnga allarpas­suarnillu tunisarpaatigut. (Tuss 104:12-15, 24) Pingaar­nertulli, anersaakkut inuussutis­sarpassuit neriuuterpullu nuanningaartoq pillugit Jehova qutsavigisarparput. Jehovap iliuuserisarpassui pillugit qutsaviginissaa puiortoorsin­naasarparput. Tamatuma eqqaamanissaanut suna iluaqutigisin­naaviuk? Qinnutigisatit allattorsin­naavatit Jehovamillu qanoq akineqarsimanersut takujumallugu allattukkatit misissul­lattaasarlugit. Taamaalillutit ikiuinera pillugu qutsavigisinnaavat. – Kol 3:15. w22.07 22 § 8-9

Ilumoortoq pillugu misissuineq naammanngilaq. Tamakkiisumik iluaqutigiumallugu malillugu inuusariaqarpugut, tassa ilikkakkagut maleruar­tariaqarpagut. Aatsaat taamaaliornikkut piviusumik pilluassaagut. (Jaak 1:25) Ilumoortoq malillugu inuunerluta qanoq qulakkeersin­naavarput? Qatanngutip angutip siunnersuutigaa suut pikkorif­figinerlugit sutigullu pitsanngorsaasin­naanerluta paasiumallugu imminut misissor­tassasugut. Apustili Paulusi allappoq: “[Qanoq] siumukar­tigisimanerput apeqqutaatinnagu toraakkatsinnut tassunga torersumik ingerlajuarta.” (Flp 3:16) ‘Ilumoortoq malillugu inuunerup’ iluaqutissartai eqqarsaatigikkit. Inuunerput pitsaanerulersiin­narnagu Jehova uppeqatigullu nuannaalersit­tarpagut. (Joh 3. 4; Uss 27:11) Ilumoortup nuannaringaar­nissaanut ilumoortorlu malillugu inuunissamut pitsaanerusumik pissutis­saqanngilagut! w22.08 18-19 § 16-18

Utoqqaanertat qanoq ersersis­sinnaavaat Jehova Jiisusilu asallugit? Jiisusip savaataasa pisariaqar­titaannik isumassuineq asannit­tuliorneruvoq pingaarutilik. (Pet 1 5:1, 2) Tamanna Jiisusip apustilimut Petrusimut erseqqissarpaa. Jiisusi pingasoriarluni miserratigereerlugu Petrusip asallugu ersersik­kusungaarsimassavaa. Jiisusip makititaanermi kingorna Petrusi aperaa: “Siimuut, Johannesip ernera, asavinga?” Petrusip asanninnini ersersik­kusungaaramiuk qanorluunniit iliuuseqarusus­sinnaasoq takorloorsin­naavarput. Jiisusip Petrusi oqarfigaa: “Savaaraatinnik paarsisuugit.” (Joh 21:15-17) Inuunermilu sinnera Naalakkap savaataasa asannilluni paarinerisigut Petrusip uppernarsarpaa Jiisusi asallugu. Utoqqaaner­taasusi, qanoq takutis­sinnaavisiuk Jiisusip Petrusimut oqaasii pingaar­tillugit? Paarsisutut pulaartarnikkut unittooq­qasullu Jehovamut uternis­saannik ikiorniarlugit immikkut ittumik iliuuseqarnikkut Jehova Jiisusilu qanoq asatigalugit takutis­sinnaavarsi. – Ez 34:11, 12. w23.01 29 § 10-11

Eqqarsaruit allat ajornar­torsiutigisannik paasinnis­sinnaan­ngitsut tamanna navianar­torujus­suusinnaavoq. Isummer­toorsin­naavutimmi illit atukkatit allanngor­tinneqarsin­naanngitsut pileris­susipilun­nilluunniit akiuisinnaanak. Biibilimili ilumoortoq una maluginiaruk: ‘Usserneqar­nissinni pinertusaarsin­naaqqullusi ikiussavaasi.’ Taamaattumik pileris­susipiluk sakkortusin­naagaluartoq akiorsinnaavat. Jehovap ikiuineratigut eqqunngitsulior­naveersaarnissat sapinngilat. Una eqqaamajuaruk: Naammal­luinnaan­ngitsuugatta pileris­susipiloqariataarnissaq pinngitsoor­tissinnaan­ngilarput. Pileris­susipiloqaleruttali ingerlaannaq itigartitsisin­naavugut, soorlu Juuserfi Potifarip nulianit qimaapallattoq. (Mos 1. 39:12) Pileris­susipalaat timitaler­tariaqan­ngilatit! w23.01 12-13 § 16-17

Jehova naapertuil­luartuuvoq. (Mos 5. 32:4) Naapertuil­luarneq kinaassusersior­tuunnginnerlu imminut ataqatigiil­luinnarput, Jehovalu kinaassusersior­tuunngilaq. (ApS 10:34, 35) Biibili oqaatsini inuppassuit taamani inuusimasut paasisin­naasaanni allataammat erserpoq Jehova kinaassusersior­tuunngitsoq. Jehova neriorsuivoq naggatissap nalaani ‘paasisimasaqarneq annertusiar­tussasoq’. Tassa ilumoortoq Biibilimiittoq inuppassuit paasissavaat. (Dan 12:4) Biibilimik Biibililersaarutinillu nutserinikkut, saqqummersitsinikkut agguaas­sinikkullu tamanna anguneqarsimavoq. Jehovap innuttaasa Biibili tamaat ilaannaaluunniit oqaatsinut 240-nit amerlanerusunut nutsersimavaat, nutsigarlu kimilluunniit akeqanngitsumik pissarsiarineqarsinnaavoq. Tamatuma kingunerisaanik inuit inuiannit tamaneersut ‘Kunngeqarfik pillugu nutaarsiassanik nuannersunik’ ilinniartarput. (Mat 24:14) Guutitta naapertuil­luartup inuit amerlanerpaat Biibilip atuarneratigut imminut ilisarisiman­nilernis­saannut periarfis­sikkusuppai. Inuimmi tamaasa asangaarpai. w23.02 5 § 11-12

Eqqortuliorneq nuannaringaarpiuk? Ilimanarpoq. Naammal­luinnan­ngitsuugattali mianersun­ngikkutta inoqatitta eqqortuliornermut isiginnit­taasiannit sunnerneqarsin­naavugut. (Es 5:20) Jiisusip nalaani upperisarsiornikkut siulersortaasut eqqortuliorsoripput. Namminnerli eqqortuusorisatik malillugit allanik isornar­torsiuisarmata sakkortuumik avoqqaarai. (Oqal 7:16; Luk 16:15) Aamma nalitsinni inuppassuit taamaapput. Eqqortuliorsoralutillu allanik isornar­torsiuisarput. Amerlanertigut makitasuujusarlutillu allanit pitsaanerusorisarput. Guutilli pissusipalaat taakku eqqortuliornermut tunngan­ngilluinnartut iluarinngilai. Naapertuil­luarneq pissusiuvoq nuannersoq. Naatsumik oqaatigalugu tassaavoq Jehovap Guutip iluarisaatut eqqortuliorneq. Biibilimi oqaatsit naapertuil­luassutsimut atorneqartut najoqqutassiat qutsinnerpaat – Jehovap najoqqutassiai – malillugit inuunermut tunngasarput. w22.08 27 § 3-5

Jiisusip ilinniartitani kukkusaraluartut tatigai. (Joh 15:16) Jaakup Johannesillu Kunngeqarfimmi immikkut inissisimaf­feqarnis­saminnik qinnuigimmanni Jehovamut kiffartornermut pissutiginiagaat apeqqusernagulu apustiliujun­naarsinngilai. (Mak 10:35-40) Kingusin­nerusukkut Jiisusi unnuakkut tigusaagami ilinniar­titaminit tamanit qimanneqarpoq. (Mat 26:56) Jiisusilli tatigiun­naanngilai. Naammal­luinnan­ngissutaat nalunngil­luinnaraluarlugit “toqussi tikillugu asavai”. (Joh 13:1) Allaat Jiisusip toqusunit makititaareernermi kingorna apustilini aalajaatsut aqqanillit oqaluus­sinermi siulersuisun­ngortin­nerisigut savaatiminillu erlinnartunik isumassuisun­ngortin­nerisigut annertuumik akisussaaf­filerpai. (Mat 28:19, 20; Joh 21:15-17) Pissutis­saqarluarluni angutit naammal­luinnan­ngitsut taakku tatigai. Tamarmik nunami inuujun­naarnissartik tikillugu aalajaallutik kiffartorput. Aap, Jiisusi inunnik naammal­luinnan­ngitsunik tatigin­ninnermut tunngatillugu maligas­siuilluarpoq. w22.09 6 § 12

Jehovap asagaatigut – tassa najoraatigut – qularin­ngikkutsigu Saatanip qunulersis­sinnaas­sanngilaatigut. Assersuutigalugu Tussiaat 118-imik allattoq erloqinar­torsiungaarpoq. Akerarpassuisa ilagaat qaffasissumik inissisimaffillit (versit 9, 10). Ilaannikkut tatineqangaartarpoq (versi 13). Aamma Jehovamit sakkortuumik perorsaatis­sinneqarsimavoq (versi 18). Tussiaasiortorli ima erinarsor­nissamut kajumis­sisinneqarpoq: “Siooragisas­saqanngilanga.” Jehovamit perorsaatis­sinneqaraluarluni nalunngilaa Ataatami qilammiusup asagaani. Tussiaasiortup qularinngilaa qanorluunniit ittunik nalaataqaraluaruni Guutiminit asannittumit ikiorneqas­salluni. (Tuss 118:29) Jehovap asagaatigut qularin­ngittariaqarparput. Tamanna annilaanganerit nalinginnaasut pingasut qaanger­nissaannut, tassa (1) ilaquttatta pilersorsin­naajunnaar­nissaasa ernumas­sutigin­nginnissaanut, (2) inuit qunugin­nginnis­saannut aamma (3) toqup annilaan­ngatigin­nginnissaanut, iluaqutigis­savarput. w22.06 15 § 3-4

Jehovamik guutisiornerup inuunitsinni salliutinnissaa qulakkeer­tariaqarparput. Jehova Pinngor­titsisorigatsigu guutisiorfigisariaqarparput. (Saqq 4:11; 14:6, 7) Taamaattumik Jehovap iluarisaatut guutisiorfiginissaa allanit tamanit pingaar­nerutit­tariaqarparput. (Joh 4:23, 24) Guutip anersaavanit illernartumit siulersor­neqarluta Biibilimi ilumoortunut naapertuuttumik guutisiorusuppugut. Aamma nunami suliatsinnik killilersuif­fiusumi inerteq­qutaaffiusumiluunniit najugaqarutta guutisiornerput salliutit­tariaqarparput. Maannakkut qatanngutitta ilaat 100-t sinnerlugit Jehovamik Nalunaajaasuunertik pissutigiin­narlugu parnaarus­saaqqapput. Taamaak­kaluartoq nuannaarlutik sapinngisaminnik qinusarput, atuaqqis­saartarput aamma Guuti kunngeqarfialu pillugit allanut oqaluttuar­tarlutik. Nikassar­neqarutta malersor­neqarut­taluunniit Jehovap pinertusaar­tittarmatigut akissarsisik­kumaarlutalu nuannaarsin­naavugut. – Pet 1. 4:14. w22.10 9 § 13

Jehova Ussatini tamatigut atoriaan­naasunik siunnersuuteqarpoq. Siunnersuutit pitsaasut taakkua ilaat marluk eqqarsaatigikkit. Siullertut, pigisatit naammagikkit. Ussatit 23:4, 5-imilu ima siunnersuuteqarpoq: “Pisuunngor­niarneq noqqaas­sutigeqinagu, … isitit pisuussutinut saatsikkukkit peerutereersimassapput, sulunil­lutimmi nattoralittut qullarsareersimassapput.” Pisuulli piitsullu ilaasa aningaasarsior­nissartik isumakuluutigival­laartarpaat. Tamannalu pissutigalugu tusaamaneqarnertik, attaveqatigiinnertik allaallu peqqissusertik iliuutsimikkut innarler­tarpaat. (Uss 28:20; Tim 1. 6:9, 10) Aappaatut, oqalutsinnak eqqarsaqqaarit. Sissuin­ngikkutta oqaatsitsigut ajoqusiingaarsin­naavugut. Ussatit 12:18-imi allassimavoq: “Eqqarsariaq­qaarnani oqaaserisat panatut kapisisarput, ilisimasulli oqaa katsorsaataasarpoq.” Allat kukkussutaanik oqaatis­suaatigin­ninnaveersaar­tarutta attaveqatigiil­luarsin­naavugut. – Uss 20:19. w22.10 21 § 14; 22 § 16-17

Ezekielip tusarlius­sassani tamaat paasilluin­nartariaqarpaa. Pigiliul­luinnar­tussaavaa oqaluus­siniassagami misigis­sutsiminut sunniuteqar­tillugu. Taava ilimagin­ngisamik pisoqarpoq. Ezekielip mappersagaq ‘tungusun­nitsuutitut mamartigisoq’ paasivaa. (Ez 3:3) Tassa Jehova sinnerlugu tusarliussamik ingerlatitseqqiineq Ezekielip nuannersutut isigimmagu tungusun­nitsuummik mamarsarnertut ippoq. (Tuss 19:9-12) Jehovap pruffiitin­ngortimmani qujamasuppoq. Kingusin­nerusukkut Jehovap Ezekieli ima oqarfigaa: “Tusarnaaq­qissaarlutit ilinnut oqaatigisakka tamaasa uummammiuliun­niakkit.” (Ez 3:10) Jehovap Ezekieli taama peqqummagu mappersakkami allassimasut puiukkiuteqquai eqqarsaatigeq­qissaaq­qullugillu. Ezekieli taamaalior­nermigut uppernikkut nakussatsippoq. Aamma mappersakkami pikkunartumik tusarlius­saqarpoq Ezekielip inunnut ingerlateq­qitassaanik. (Ez 3:11) Guutip tusarliussaa paasilluarlugulu upperigamiuk naammas­sinissaata tungaanut oqaluus­sisinnaalerpoq. w22.11 6 § 12-14

Peqatigiif­fitsinni allannguinerit ilumoorfigin­ninninnut misilin­neqaataappata susinnaavit? Peqatigiif­fitsinni allannguisoqaraangat tapersersuisarit. Inoqajuitsumi angalanerminni Kehatikkut angerutsip illerfia inuit siornanni ingerlat­tartussaavaat. (Mos 4. 3:29, 31; 10:33; Jos 3:2-4) Tamanna immikkut pisinnaatitaaffiuvoq! Nunamili neriorsuutigisami najugaqalermata pissutsit allanngorput. Angerutsip illerfia nuunneqaqat­taarunnaarpoq. Taamaattumik Kehatikkut allanik suliassin­neqarput. (Nal 1. 6:16-18; 26:1, 24) Siornatigut immikkut ittumik suliassin­neqarsimanertik pissutigalugu maanna naammagit­taallior­nerannik imaluunniit nuimanerusumik suliassin­neqarusun­nerannik allassimasoqanngilaq. Qanoq ilinniarfigisin­naavagut? Jehovap peqatigiis­sortaani allannguinerit, suliassin­neqarninnut sunniuteqas­sagaluarpataluunniit, uummatit tamakkerlugu tapersersortakkit. Qanorluunniit suliassin­neqaraluaruit nuannaarutigisaruk. Eqqaamajuk imaanngitsoq suliassin­neqarnerit pillugu Jehovap asagaatit. Jehovap naalannerit suliassin­neqarnernit sunilluunniit pingaar­tinneruaa. w22.11 23 § 10-11

Oniisifoorusip apustili Paulusi ujarpaa nanigamiullu pisariaqar­titaanik ikiorlugu. Taamaaliorami inuunini navianar­torsiortippaa. Qanoq ilinniarfigisin­naavarput? Qatanngutigut malersor­neqartut inunnut qununeq pissutigalugu tapersersun­ngitsuus­sanngilagut. Illersorlugillu ikiussavagut. (Uss 17:17) Asanninnerput tapersersuinerpullu pisariaqar­tippaat. Ruslandimi qatanngutitta uppeqatitik asasatik parnaarus­saaqqasut qanoq ikiorsimaneraat eqqarsaatigiuk. Ilaat eqqartuus­sivinni sassartitaagaangata qatannguterpassuit eqqartuus­sivinnukartarput tapersersuiar­torlutik. Qanoq ilinniarfigisin­naavagut? Qatanngutit angutit akisussaasut salluliuutigineqaraangata, tigusaagaangata malersor­neqaraangataluunniit annilaangalis­sanngilagut. Qinnuttakkit, ilaqutai isumagisakkit qanorlu tapersersorsin­naanerlugit periarfis­sarsiorlutit. – ApS 12:5; Kor 2. 1:10, 11. w22.11 17 § 11-12

Utoqqaanertat suliassaasa ilagaat anersaakkut misigis­sutsikkullu ikiuiniarneq. (Pet 1. 5:2) Ajunaar­nersuarmik nalaataqarnermi siullerpaajutillugu qulakkeer­tariaqarpaat qatanngutit tamarmik ajunnginnersut, nerisas­saqarnersut, atisassaqarnersut inissaqar­nersullu. Tamatumali kingorna eqqugaasut qaammaterpaalunni anersaakkut misigis­sutsikkullu ikiorneqar­tariaqassapput. (Joh 21:15) “Qaangiiniarneq sivisusinnaavoq”, Harold, Immikkoor­tortaqarfiup Ataatsimiititaliaani kiffartortoq qatannguterpas­suarnillu ajunaar­nersuarmik eqqugaasimasunik naapitsisimasoq, taama oqarpoq imalu nangilluni: “Inuunerat ingerlaq­qileraluartoq asasaminnik kingornus­saminnillu annaasaqarnertik annaqqatarsimanertillu eqqaamajuaan­nassavaat. Misigisimasaat misigis­sutsitigut uteqqiajuarsin­naapput. Tamanna uppernikinnermut ersiutaanani inuttut qisuariar­neruvoq pissusis­samisoortoq.” Utoqqaanertat allassimaffik una maleruar­tarpaat: “Qiasut qiaqatigisigit.” – Rom 12:15. w22.12 22 § 1; 24-25 § 10-11

Eqqortuliorumalluta akiuunnitsinni Jehovap tukkorluni anersaaminik illernartumik tunilluta ikiortarpaatigut. Biibili atuaraangatsigu anersaamit illernartumit killinneqar­tarpugut. Aamma ataatsimiik­kaangatta anersaaq illernartoq pisarparput. Katersuuk­kaangatta kristumioqatigut uagutsitulli eqqortulior­nissamik ilungersuuteqartut ilagisarpagut, tamannalu qiimmas­saatigisarparput. (Hebr 10:24, 25; 13:7) Sanngiis­sutitsinnillu ikioqqulluta Jehova ilumoorluta qinunikkut saaffigigaangatsigu anersaaminik illernartumik akiuuttuar­niassagatta tunissavaatigut. Taamatut iliuuseqaraluarluta ilimanarpoq pileris­susipiluit takkuttuassasut, iliuuseqar­tuarnerpulli pileris­susipilunnut nakkaan­nanngin­nissamut iluaqutigis­savarput. Iliuusissat Jehovamut attaveqarluar­niarnitsinnut iluaqutaasut iliuuserilersimagatsigit iliuuseriuar­nissaat eqqortulior­nissamullu piumassusermik ineriar­tortitsiuarnissaq pingaaruteqarpoq. w23.01 11 § 13-14

Biibili peqqissutsimut nerisas­sanillu aalajangersimasunik nerisar­nissamut tunngatillugu atuagaan­ngikkaluartoq Jehovap tamakku pillugit qanoq isiginnit­taaseqar­neranik tassani paasitin­neqarpugut. Assersuutigalugu ima kajumis­saarpaatigut: ‘Ajortoq inuunermit nigorsimatiguk.’ (Oqal 11:10) Inuunermik navianar­torsior­titsisinnaasut, soorlu nerival­laarneq, aalakoor­nartutorpal­laarnerlu, Biibilimi assuarineqarput. (Uss 23:20) Qanoq annertutigisumik sunillu nerisar­nissamut imernis­samullu tunngatillugu imminut aquttar­nissarput Jehovap naatsorsuutigaa. (Kor 1. 9:25) Isumatusaarluta aalajangiil­luarnikkut takutis­sinnaavarput inuuneq Guutip tunissutaa qujamasuutigingaarlugu. (Tuss 119:99, 100; Uss 2:11) Assersuutigalugu sutorniar­nerluta eqqarsaatigeq­qissaar­tarparput. Nerisassat aalajangersimasut mamarigaluarlugit saperutsigit nerinaveersaar­tarpagut. Aamma naammattumik sinittarnikkut, timersor­tarnikkut, timikkut ipeersaarnikkut angerlarsimaf­fittalu eqqiluisaar­tinneratigut uppernarsar­tarparput isumatusaarluta. w23.02 21 § 6-7

Biibilimik atuarninni anersaakkut erlinnartuutit qanoq nassaarisin­naavigit? Maluginiaruk Timuutiusimut allakkat aappaat 3:16, 17-milu qanoq allassimasoqartoq. Allassimavoq “Allakkat Illernartut tamarmik” (1) ilinniar­titsinermut, (2) oqaaqqis­saarinermut, (3) naqqiinermut aamma (4) perorsaatis­siinermut iluaqutaasut. Allaat Biibilimi allakkanut atuarpiar­tanngisannut tunngatillugu taakku sisamat iluaqutigisin­naavatit. Oqaluttuaq misissoq­qissaaruk paasiniarlugu Jehova, siunertaa Biibilimilu najoqqutassiat pillugit sunik ilinniar­titsinersoq. Aamma oqaaqqis­saarinermut qanoq iluaqutaatiginersoq eqqarsaatigiuk. Eqqunngitsulioq­qajaanerit eqqunngitsumillu isiginnit­taatsit itigartis­sinnaanias­sagakkit Jehovamullu aalajaat­tuarsin­naaqqullutit versit atuakkatit qanoq iluaqutigisin­naanerlugit maluginiartaruk. Atuakkatit eqqunngitsumik isummernermik, immaqa oqaluus­sitillutit arlaata eqqaasaanik, naqqiinermut qanoq atorneqarsin­naanersut eqqarsaatigisaruk. Aamma Jehovap isiginnit­taaseqar­neratut isiginnit­taaseqaq­qullutit versini atuakkanni perorsaatis­siinerit maluginiartakkit. Iluaqutissat taakku sisamat eqqumaf­figiuarukkit anersaakkut erlinnartunik nassaarsin­naavutit Biibilimillu atuarnerit pissarsiaqarfigil­luarlugu. w23.02 11 § 11

Danielimik allakkani siulittuummi allassimavoq Jiisusi piffissarititat arfineq-marluk naappata Kunngeqarfimmi naalakkersuilissasoq. Jiisusi qanga kunngin­ngortoq paasineqarsinnaava? (Dan 4:7-14) ‘Piffissarititat arfineq-marluk’ ukiunut 2.520-nut assersuutaapput. Piffissaq taanna 607-imi Kr.in.si. Babylonnimiut kunngi kingulleq Jehovap Jerusalemmimi issiavis­saarsuanit peersimmassuk aallartippoq. 1914-imi Kr.in.king. Jehovap kunngeqarfimmini Jiisusi kunngin­ngortimmagu naavoq. (Ez 21:30-32) Siulittuut qanoq iluaqutigisin­naavarput? ‘Piffissarititat arfineq-marluk’ pillugit siulittuut paasigatsigu Jehovap neriorsuutiminik piffissaq eqqorlugu eqquutsitsiuaan­narnera qulariun­naarparput. Soorlu Jehovap kunngeqarfini qaqugorpiaq naalakkersuilissasoq aalajangeraa, taamatuttaaq siulittuutit allat tamaasa piffissaliussani naapertorlugu eqquutitissavai. Aap, Jehovap ullussaa ‘piviusun­ngorumaarpoq’! – Hab 2:3. w22.07 3 § 3-5