Tamassa ulloq annaassivik!
’Ata, tamassa nalliuttoq nuannersoq; tamassa ulloq annaassivik.’ — 2 KORINTUMIUT 6:2.
1. Guutimit Kristusimillu iluarisaassagaanni suna pisariaqarpa?
JEHOVA ullormik inuit eqqartuunneqarfissaannik aalajangiisimavoq. (apustilit suliait 17:31) Tamanna uagutsinnut tassaassappat ulloq annaassivik, Jehovamut taassumalu eqqartuussisuutitaanut, Jesus Kristusimut, ajunngitsumik attaveqartariaqarpugut taakkunannga iluarisaasinnaaqqulluta. (Juánase 5:22) Tamatumani pisariaqarpoq Guutip oqaasianut naapertuuttumik pissuseqarnissarput, inunnillu allanik Jesusimut ilumoortumik ajoqersuganngornissaannik ikiuinissatsinnut kajumissisitsisumik uppissuseqarnissarput.
2. Sooq inuiaat silarsuaat Guutimut takornartaalersimava?
2 Ajorti kingornussaasoq pissutaalluni inuiaat Guutimut takornartanngorsimapput. (Rûmamiut 5:12; Evfisumiut 4:17, 18) Taamaattumik inuit oqaluussiffigisavut annassinnaassagunik Guutimit saammaanneqaqqaartariaqarput. Apustili Paulusip kristumiunut Korinthimiittunut allannermini tamanna erseqqissarpaa. Korintumiunut agdlagkat áipait 5:10–6:10 misissoriartigik takuniarlugu eqqartuussineq, Guutimit saammaanneqarneq annannissarlu pillugit Paulus qanoq oqaaseqarnersoq.
’Inuit ilataariniarpavut’
3. Paulusip qanoq iliorluni ’inuit ilataariniartarsimavai’, aamma sooq uagut ullumikkut aamma taamaaliortariaqarpugut?
3 Paulusip eqqartuussineq oqaluussinermut atassuserpaa ima allakkami: ’Tamatta Kristusip issiaviata eqqartuussiviata saanut saqqummissaagut, tamaasa timimikkut pissarsiaannik qanoq iliornerat naapertorlugu ajunngitsumilluunniit ajortumilluunniit pissarseqqullugit. Taava Naalakkap mianerineqarnissaa ilisimagatsigu inuit ilataariniarpavut.’ (2 Korintumiut 5:10, 11) Apustilip nutaarsiassamik nuannersumik oqaluussissutiginninnermigut ’inuit ilataariniartarsimavai’. Uaguttaaq taamaaliortarpugut? Pissutsit aaqqissuussaanerata ajortup matuma naggatissaa qanilliartorpoq, taamaattumillu sapinngisarput tamaat allat kajumissaartariaqarpavut Jesusimit ajunngitsumik eqqartuussaajumallutik Jehova Guutimillu, annatsitsisartumit, iluarisaalerumallutik pisariaqartunik iliuuseqaqqullugit.
4, 5. (a) Sooq Jehovamut kiffartornitsinni naammassisavut pingaakujuutigisariaqanngilavut? (b) ’Guuti pillugu’ Paulusip imminut nersualaartarsimanera qanoq paasisariaqarpa?
4 Guutilli suliarput pilluaqqusimappagu uagut pingaakujuutissarinngilarput. Korinthimiut ilaat imminnik allanilluunniit pingaakujuutiginnilersimapput taamaalillutillu ilagiinni avissaartuunneqartitsillutik. (1 Korintumiut 1:10-13; 3:3, 4) Pissutsit tamakku eqqarsaatigalugit Paulus ima allappoq: ’Immitsinnik nersoqqinnianngilagut ilissinnut, ilissili uatsinnik usorsitsaatissaqartinniarpassi, uummatiminnit pinnatik qaamikkut usorsitsaartunut akissutissaqaqqullusi. Silaqanngitsuuguttami Guuti pillugu taamaappugut, silaqartuuguttalu ilissi pillusi taamaappugut.’ (2 Korintumiut 5:12, 13) Makitasuut ilagiit ataasiussuseqarnissaannik anersaakkullu peqqissuunissaannik soqutigisaqanngillat. Qallikkut pissutsinik pingaakujuutiginnikkumanerupput uppeqatitik Guutip iluarisaanik uummateqarnissamik ineriartortitsinissaannik ikiorniarnagit. Taamaattumik Paulusip ilagiit naveerpai allakkaminilu kingusinnerusukkut ima allalluni: ’Usorsitsaarumasup Jehova usorsitsaatigiliuk.’ — 2 Korintumiut 10:17.
5 Paulusili imminut nersualaanngila? Apustiliussuseq pillugu allagai immaqa ilaasa taama paasivaat. Kisianni ’Guuti pillugu’ imminut ’usorsitsaatigivoq’, tassa imminut nersualaarpoq. Apustiliusinnaatitaanini pillugu imminut nersualaarpoq, Korinthimiut apustilioqqusersunit Jehovamit nigortinneqaqqunagit. (2 Korintumiut 11:16-21; 12:11, 12, 19-21; 13:10) Paulusilli naammassisimasani malugeqqusaarniutigiinnavinngilai. — Ussatit 21:4.
Kristusip asanninnerata pinngitsaalivaatigut?
6. Kristusip asanninnerata qanoq sunnertariaqarpaatigut?
6 Apustilitut ilumoortutut Paulusip allat Jesusip pilliutaanik utertitsissutaasumik ajoqersortarpai. Tamanna Paulusip inuunerani allanngorluinnartitsisimavoq, imami allappoq: ’Kristusip asanninnerata pinngitsaalivaatigut, isumaqaratta ataatsip tamaasa toqussutigimmagit tamaasa taava toqusimasoralugit; massalu tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut makittumullu.’ (2 Korintumiut 5:14, 15) Jesus inuunini pilluta tunniukkamiuk asanninnermik asseqanngitsumik ersersitsivoq. Asanninneq tamanna iliuuseqarnissamut ’pinngitsaalineqaatigisariaqarparput’. Jesusip pilluta inuunerminik tunissuteqarsimaneranik qujamasuutiginninnitta Jehovap ernini asasani aqqutigalugu annaassissutaa pillugu nutaarsiassamik nuannersumik ilungersuussilluta oqaluussissutiginninnissatsinnut killittariaqarpaatigut. (Juánase 3:16; naleqqiuguk Tussiaat 96:2.) Illit ’Kristusip asanninnerata’ ilungersuussillutit Guutip naalagaaffianik oqaluussissutiginninnissannik ajoqersuganngortitsinissannillu pinngitsaalivaatit? — Matîuse 28:19, 20.
7. ’Uinikkut inummik ilisimasaqannginneq’ qanoq paasisariaqarpa?
7 Tanitat Kristusip pillutik iliuuserisimasaanik qujamasuutiginninnertik ersersippaat ’imminnut pinnatik, taassumunngali inuullutik’ ersersitsisumik inuunerminnik atuinermikkut. Tamatumunnga atatillugu Paulus ima allappoq: ’Taamaattumik matuma kingornagut uinikkut inummik ilisimasaqanngilagut; Kristusiluunniit uinikkut ilisarigaluaratsigu maanna ilisariunnaarparput.’ (2 Korintumiut 5:16) Kristumiut inunnik allanik uinikkut naliliisussaanngillat, soorlu juutiunngitsut ajattorlugit juutit nakerisarsiorfigalugit imaluunniit piitsut ajattorlugit pisuut nakerisarsiorfigalugit. Tanitat ’inummik uinikkut ilisimasaqanngillat’, uppeqatiminnummi anersaakkut attaveqarnerat pingaarnerpaavoq. ’Kristusimik uinikkut ilisarisimannittut’ tassaannaanngillat Jesus nunarsuarmiikkallarmat taassuminnga takunnittut. Messiasimik neriugisallit ilaasa taanna inuttut nalilertarsimagunikku taamaaliorunnaartariaqarput. Timini utertitsissutissatut akiliutigereersimavaa anersaatullu inuunermik tunisisutut makititaareersimalluni. Allat qilammi inuunermut makititaasussat uinikkut timitik taamaatittussaassavaat Jesus Kristus uinikkut takusimanngisaannarlugu. — 1 Korintumiut 15:45, 50; 2 Korintumiut 5:1-5.
8. Ilaat qanoq ilillutik ’Kristusimiilersimappat’?
8 Suli tanitat saaffigalugit Paulus nangippoq: ’Taamaattumik kinaluunniit Kristusimiittoq pinngortitaavoq nutaaq; pisoqaq qaangiuppoq, ata, nutaanngorpoq.’ (2 Korintumiut 5:17) ’Kristusimiinneq’ tassaavoq taassuminnga ataasioqatiginninneq. (Juánase 17:21) Attaveqatigiinneq tamanna pilersinneqartarpoq Jehovap inummik ernerminut kajungersisitsineratigut anersaakkullu illernartukkut kinguaassiarititsineratigut. Guutimut ’qitornaasutut’, imaluunniit ernerusutut, anersaakkut kinguaassiarineqartutut ’pinngortitanngortarpoq nutaaq’ Kristusilu peqatigalugu naalagaaffimmut qilammiittumut peqataalernissaminik neriugisaqalersarluni. (Juánase 3:3-8; 6:44; Galâsiamiut 4:6, 7) Kristumiutut tanitat immikkut pisinnaatitaaffissuarmik tamatuminnga tunineqarsimapput.
’Guutimut saammaannarteqqugitsi’
9. Guutip inuit imminut saammaannartissinnaalernissaat qanoq ajornarunnaarsissimavaa?
9 Jehovap ’pinngortitaq nutaaq’ pitsaangaartumik iliorfigisimavaa. Paulusitut oqaatigalugu: ’Tamakku tamarmik Guutimit pipput, taassuma Kristusikkut imminut saammaannartippaatigut, saammaannartitaanerullu pianik kiffartuuteqartippaatigut. Guutimmi Kristusimi silamiut imminut saammaannartippai pinerlunnerinik isumakkeerfigalugit oqaaserlu saammaannartitaanerup pia uatsinniilersillugu.’ (2 Korintumiut 5:18, 19) Inuiaat Adam ajortuliormalli Guutimut takornartaalersimapput. Jehovalli asannilluni Jesusip pilliutaatigut saammaanneqarnissamut periarfissaq ammarsimavaa. — Rûmamiut 5:6-12.
10. Jehovap kikkut saammaannartitaanerup pianik kiffartuuteqalersissimavai, qanorlu ilillutik tamanna suliaraat?
10 Jehovap tanitat saammaannartitaanerup pianik kiffartuuteqalersissimammagit Paulus ima oqarsinnaasimavoq: ’Taamaattumik Kristus sinnerlugu oqariartortitaavugut, soorlu Guuti uatsigut oqaaqqissaarisoq; Kristus sinnerlugu qinuvugut: „Guutimut saammaannarteqqugitsi.“’ (2 Korintumiut 5:20) Itsaq ’oqariartortitat’, imaluunniit aallartitat, sorsunneq pinngitsoortinniarlugu aallartinneqartarsimapput. (Lúkarse 14:31, 32) Inuiaat silarsuaat ajortilik imminut takornartanngorsimammat Guutip aallartitani tanitat aallartissimavai imminut saammaannartissagaanni pisariaqartunik inuit nalunaarfigiartortillugit. Kristus sinnerlugu tanitat ima qinupput: ’Guutimut saammaannarteqqugitsi.’ Ilungersortumik unnersuussineq tamanna tassaavoq Guutimik eqqisseqateqarnermik ujartuinissamik annassummillu Kristus aqqutigalugu taassuma ajornarunnaarsissimasaanik ilassinninnissamik naakkinnilluni kajumissaarineq.
11. Kikkut pilliummut utertitsissutaasumut uppernermikkut naggataatigut naapertuilluartutut Guutimit isigineqalissappat?
11 Utertitsissummut uppertut tamarmik Guutimut saammaannartissinnaapput. (Juánase 3:36) Paulus oqarpoq: ’[Jesus] ajortimik siuneqanngitsoq uagut pilluta [Jehovap] ajortiutippaa, uagut taassumani iluarsusinngoqqulluta Guutip pia.’ (2 Korintumiut 5:21) Inuk naammalluinnartoq Jesus tassaalerpoq pilliut ajortaaruteqqussut Adamip kinguaavinut ajortimit kingornussaasumit aniguisinneqartunut tamanut. Jesus ikiortigalugu taakkua tassaalerput ’iluarsuseq Guutip pia’. Kristusip kingornusseqatai 144.000-iusut siulliullugit Guutip ’iluarsuseqarnerarpai’, imaluunniit naapertuilluartutut nalunaarutigai, taamaattumillu naapertuilluartutut isigineqarsinnaallutik. Naassaanngitsumik Ataataasup, Jesus Kristusip, ukiuni tuusintini naalakkersuinerani meerai nunarsuarmiut inuttut naammalluinnartutut naapertuilluartunngussapput. Tamakkiisumik naapertuilluassuseqalersissavai, Guutimut aalajaassinnaaqqullugit inuunermillu naassaanngitsumik tunissummik tunineqarsinnaaqqullugit. — Jesaja 9:6; sarĸúmersitat 14:1; 20:4-6, 11-15.
’Nalliuttoq nuannersoq’
12. Jehovap aallartitai taakkualu suleqataat pingaartumik sumik kiffartuuteqarpat?
12 Annatsitaajumagutta Paulusip oqaasii uku maleruartariaqarpavut: ’[Jehovamut] suleqataasutulli aamma oqaaqqissaarpassi Guutip saammaannera asuliinnaq pisareqqunasiuk, oqarmat: „Nalliuttumi nuannersumi tusarpakkit ullormilu annaassivimmi ikiorlutit.“ Ata, tamassa nalliuttoq nuannersoq; tamassa ulloq annaassivik.’ (2 Korintumiut 6:1, 2) Jehovap aallartitaasa tanitat taakkualu suleqataasa, ’savat allat’, Guutip ajunngissusianik pisassarinngisaraluaminnik pissarsisimanertik asuliinnaq pinngilaat. (Juánase 10:16) ’Nalliuttumi nuannersumi’ tamatumani eqqortumik pissuseqarnermikkut ilungersuussillutillu kiffartornermikkut Guutimit iluarisaanissartik ujartortarpaat inoqatitillu ilisimatittarlugit maanna tassaasoq ’ulloq annaassivik’.
13. Jesaja 49:8-mi eqqarsaat pingaarneq suua, allassimaffillu qanoq ililluni siullermik eqquuppa?
13 Paulusip Jesaja 49:8 issuarpaa, imaattoq: „Ima oqarpoq [Jehova]: ’Ullormi saammassiviusumi tusarpakkit, ullormi annaassiviusumi ikiorpakkit. Piliaraakkit inuiannullu angerutaatillutit nuna kingumut makiteqqullugu, nunaatissarsiarititat inueruttut kingumut agguaanneqaqqullugit.’“ Siulittuut tamanna siullermik eqquuppoq Israelikkut Babylonimi tigusaaqqanerminnit aniguisitaammata nunaminnullu inuerussimagaluartumut utermata. — Jesaja 49:3, 9.
14. Jesaja 49:8 qanoq ililluni Jesusimut eqquussimava?
14 Esajasip siulittuutaata eqquuteqqinneratut Jehovap ’kiffani’ Jesus ’Guutimik nalusunut qaammaqqutinngortippaa Guutip annaassinera nunarsuup isuinut annguteqqullugu’. (Jesaja 49:6, 8; naleqqiuguk Jesaja 42:1-4, 6, 7; Matîuse 12:18-21.) Jesusip nunarsuarmiinnera nalunanngitsumik tassaavoq ’ulloq saammassivik’, imaluunniit ’nalliuttoq nuannersoq’. Taanna qinuvoq, Guutillu ’tusarpaa’. Jesusimut tassaalerpoq ’ulloq annaassivik’, assuarnaassutsi tamakkiisumik attatiinnarmagu taamaalillunilu ’naalatsiminut tamanut annassimanermut naassaanngitsumut aallarniisuulerluni’. — Eprîarit 5:7, 9; Juánase 12:27, 28.
15. Anersaakkut Israelikkut Guutip ajunngissusianut pisassarinngisaraluatsinnut qinngaqqunnannginnissartik qangali ilungersuutigilersimavaat, sunalu siunertaralugu?
15 Paulusip Jesaja 49:8 kristumiunut tanitanut atorpaa ilungersorluni oqaaqqissaarlugit ’Guutip saammaannera asuliinnaq peqqunagu’, tassa ’nalliuttumi nuannersumi ullormilu annaassivimmi’ Guutip pilersitaani Guutimit iluarisaanissartik ujartunngitsoornaveersaaqqullugu. Paulus nangippoq: ’Ata, tamassa nalliuttoq nuannersoq; tamassa ulloq annaassivik.’ (2 Korintumiut 6:2) Ukiumi 33-mi piinsip ullua aallarnerfigalugu anersaakkut Israelikkut Guutip ajunngissusianut pisassarinngisaraluatsinnut qingaqqunnannginnissartik ilungersuutigiuarsimavaat ’nalliuttoq nuannersoq’ imminnut tassaalersinnaaqqullugu ’ulloq annaassivik’.
’Guutip kiffaasut malunnartinniarpugut’
16. Qanoq misilinneqarnermini Paulus Guutip kiffaatut malunnartinniartarsimava?
16 Ilagiinnut Korinthimiittunut ilaasut ilaat paasinarsisimapput Guutip ajunngissusianut pisassarinngisaraluatsinnut qinngaqqunnartut. Paulus mamarlertarpaat apustilitut oqartussaassusia aserorsaaraluarlugu, massa ’kimulluunniit naakkiussutaanaveersaartoq’. Tassami taanna Guutip kiffaatut ’malunnartinniartarpoq ilalaangaarluni, annikillisaraangami, ajorsaraangami, qussalasaraangami, unatarneqaraangami, parnaarussivimmiikkaangami, pikitsitsivigineqaraangami, qasunartorsioraangami, pigaartaraangami, iisinnginniartaraangami’. (2 Korintumiut 6:3-5) Kingusinnerusukkut Paulus tunngavilersuivoq oqarluni imminut akerlilersuisut Guutip kiffarippagit nammineq ’annermik taamaalluni’, tassa parnaarussaasarnermigut, unatarneqartarnermigut, navianartorsiortitaasarnermigut ujariagisaqartarnermigullu annermik misilinneqartarami. — 2 Korintumiut 11:23-27.
17. (a) Qanoq pissuseqarluta Guutip kiffaasut malunnartinniassaagut? (b) ’Sakkut iluarnerup pii’ suuppat?
17 Paulusitut taassumalu suleqataasut Guutimut kiffatut uaguttaaq malunnartinniarsinnaavugut. Qanoq ililluta? ’Pinngitsuulluta,’ tassa minguitsuulluta, Biibilimillu eqqorluartumik ilisimasaqarnerput naapertorlugu iliorluta. Malunnartinniarsinnaavugut ’kamajuilluta’, naapertuilluanngitsuliorfigineqarnivut kamassaarneqarnivullu naammagittarluta atorlugit, kiisalu ’avaaginnilluta’, tassa inussiarnerluta, allanik ikiuisarnitsinni. Aamma Guutip kiffaasut malunnartinniarsinnaavugut taassuma anersaavanut siulersortinnitsigut ’pisuusaarnerinnaanngitsumillu asanninnitsigut’, tassa eqqortumik oqaluttarluta kiffartuutittalu naammassiniarnerani Guutimut nukissanik aallertarnitsigut. Soqutiginarpoq Paulus Guutip kiffaatut malunnartinniartarsimammat aamma ’sakkut iluarnerup pii illuttut sakkugalugit’. Itsaq sorsunnermi pana talerpimmik tigummineqarajussimavoq eqqornaveeqqullu saamimmik. Paulusip ajoqersuisooqqusersunut anersaakkut sorsunnermini uinngup ajortillip sakkui atortanngilai, soorlu nakutitseriartarneq, sallu peqqusersusaarnerluunniit. (2 Korintumiut 6:6, 7; 11:12-14; Ussatit 3:32) ’Sakkut’ imaluunniit atortut naapertuilluartut pallorfiginninnermik ilumoortumik siuarsaanermini atortarpai. Uaguttaaq taamaaliortariaqarpugut.
18. Guutimut kiffaagutta qanoq pissusilersortariaqarpugut?
18 Guutip kiffarippatigut Paulusip kiffaqataasalu iliorsimanerattut pissuserissaartariaqarpugut. Kristumiutut pissuseqartariaqarpugut ataqqinninnermik ersersitsivigineqaraluarutta ersersitsivigineqanngikkaluaruttaluunniit. Uagutsinnik ajortumik eqqartuinerup oqaluussinerput unitsinnavianngilaa, akerlianilli aamma ajunngitsumik eqqartorneqarnerput pingaakujuutigissanngilarput. Ilumoortumik oqalussaagut immaqalu kristumiutut pissuseqarnerput pissutigalugu ataqqineqassalluta. Akeqqamit saassunneqarnitsinni inuunerput navianartorsiulissagaluarpat Jehova tatigissavarput. Qujamasullutalu perorsaatissinneqarnerput ilassissavarput. — 2 Korintumiut 6:8, 9.
19. Qanoq iliorluni anersaakkut ’amerlasuunik pisuunngortitsisoqarsinnaava’?
19 Saammaannartitaasutut kiffartornermik eqqartuinini naggaserlugu Paulus imminut eqqartorpoq suleqatinilu eqqartorpai ’aliasuttutut, naalli tipaatsuttuinnartutut; piitsutut, naalli amerlasuunik pisuunngortitsisutut; pigisaqanngitsutut, massalu tamanik pigisaqartutut’. (2 Korintumiut 6:10) Kiffat taakku annikilliortitaanerminnik aliasuutiginninnissaminnut pissutissaqaraluarlutik ilumikkut nuannaarnermik pigisaqarput. Timip piisigut piitsuugaluarlutik anersaakkut ’amerlasuunik pisuunngortitsisimapput’. Tassami ’tamanik pigisaqarput’ uppernermik anersaakkut pisuussutinik pigisaqartimmatik, ilaatigut qilammi Guutimut erniulernissaminnik neriugisaqarlutik. Kristumiutullu kiffatut pisuumik pilluarnartumillu inuupput. (apustilit suliait 20:35) Taakkunatut uagut ’amerlasuut pisuunngortissinnaavavut’ massakkut — ullormi annaassivimmi — saammaannartitaasutut kiffartornermut peqataanitsigut.
Jehovap annaassinissaa tatigiuk
20. (a) Paulusip suna qamuuna kissaatigaa, aamma sooq taamanikkut piffissaq asiutinneqartariaqanngila? (b) Ulloq annaassivik maanna inuuffigigipput suup takutippaa?
20 Paulusip ukiup 55-ip missaani Korinthimiunut aappassaanik allannerani juutit aaqqissuussaanerata atorunnaarsinneqarnissaanut ukiut 15-it missaannaanniilersimapput. Apustilip qamuuna kissaatigaa juutit juutiunngitsullu assigiimmik Kristus aqqutigalugu Guutimut saammaannartissasut. Taamani tassaavoq ulloq annaassivik, piffissarlu asiutinneqassanngilaq. Uagut 1914-imiilli pissutsit aaqqissuussaanerata naggatissaani assingusumi inuuvugut. Nunarsuaq tamakkerlugu Guutip naalagaaffianik oqaluussissutiginninnerup takutippaa ullormi annaassivimmi inuusugut.
21. (a) 1999-imut ukiumut allassimaffik suua? (b) Ullormi annaassivimmi matumani qanoq iliortariaqarpugut?
21 Inuit inuannit tamaneersut annassut Guutip Jesus Kristus aqqutigalugu pilersissimasaa tusassallugu pisariaqartippaat. Piffissaq sinneruttoq asiutinneqassanngilaq. Paulus allassimavoq: ’Tamassa ulloq annaassivik.’ Oqaatsit Korintumiunut agdlagkat áipait 6:2-miittut taakku Jehovap Nalunaajaasuisa 1999-imut ukiumut allassimaffigissavaat. Oqaatsit taakkua naleqquteqaat, Jerusalemimimmi naalaffianillu aseruinermit ajornerujussuaq nalliuteqqajaavoq! Pissutsit aaqqissuussaanerata matuma tamarmi naggatissaa ungasigunnaarpoq, nunarsuarmiittullu tamarmik tamatumannga attorneqassapput. Taamaattumik iliuuseqarnissamut piffissanngorpoq — aqaguunngitsoq, massakkut. Jehova annaassisuusoq upperigutsigu, asagutsigu naassaanngitsumillu inoorusukkutta Guutip ajunngissusia pisassarinngisaraluarput asuliinnaq pinavianngilarput. Aap, qamannga pisumik kissaatigissavarput Jehova ataqqinartissallugu kiisalu oqaatsikkut iliuutsikkullu ersersissallugu ilumoorluta ima oqartartugut: ’Tamassa ulloq annaassivik.’ (wE 15/12 98)
Qanoq akissavit?
□ Sooq Guutimut saammaannartinnissaq taama pingaartigaa?
□ Kikkut tassaappat aallartitat suleqataallu saammaannartitaanerup pianik kiffartuuteqartut?
□ Guutip kiffaasut qanoq ililluta malunnartinniarsinnaavugut?
□ Jehovap Nalunaajaasuisa 1999-imi ukiumut allassimaffiat ilinnut qanoq isumaqarpa?
[Qupp. 15-imi assiliartaq]
Paulusitut ilungersuussilluartigalutit oqaluussillutit allat Guutimut saammaannartinnissaannik ikiortarpigit?
USA
Frankrig
Nagguaatsup Tuugaavata Sineriaa
[Qupp. 16-imi assiliartaq]
Ullormi annaassivimmi matumani Jehova Guutimut saammaannartittorpassuarnut ilaavit?