Misilinneqartaraluarlunga Jehovamut kiffartorneq nuannaarutigisimavara

OQALUTTUARTOQ: GEORGE SCIPIO

1945-mi decembariugaa napparsimmavimmi uninngavunga. Assakka isikkakkalu timinni nukillaarsimanngitsutuaapput. Uanga nammineq qularinngilara iluarseqqissaqqaarlunga, allalli pisussinnaaleqqinnissara qularaat. Nukappissamut 17-inik ukiulimmut peruttulersumut tamanna akueriuminaaqaaq! Taamatut ilimasaarneqarnera akueriumanngilara. Pilersaaruterpassuaqarpungami. Assersuutigalugu, aappaaguani sulisitsisora ilagalugu Tuluit Nunaannut feeriartussaavunga.

NUKILLAARNERMIK nappaalanermit qeqertami najukkanni Sankt Helenami atugaasumit eqqugaasimavunga. Nappaat tamanna inuit aqqanillit toqqutigaat amerlasuullu iloqiannguutigalugu. Uninnganinni inuunerma sivikitsup siunissamalu eqqarsaatiginissaannut piffissaqarluarpunga. Taamani napparsimagaluarlunga paasilerpara nuannaarnissannut pissutissaqarlunga.

Meeraanera

1933-mi tallimanik ukioqartunga ataataga, Tom, politiiullunilu baptistit oqaluffianni palasimut ikiortaasoq, Jehovap nalunaajaasuinit marlunnit atuagarpaalunnik qeratasuumik qalilinnik pissarsisimavoq. Nalunaajaasut taakkua piffissaq tamaat oqaluussisartuupput, imaluunniit pioneeriupput, sivikitsumillu qeqertamiillutik.

Atuakkat ilaat Guds Harpe-mik (Guutip kukkilattariaa) taaguuteqarpoq. Soqutiginnittorpaaluit ilagalugit ataatama ilaqutariittut Biibilimik atuaqqissaaqatigigaangamisigut atuagaq taanna atortarpaa. Atuakkap imarisai oqimaatsuupput, paasisaqarpiarnerlu ajorpunga. Eqqaamavarali allassimaffiit eqqartukkavut tamaasa biibilinni ataasigut titartarlugit. Sivitsunngitsoq ataatama paasivaa atuartakkavut ilumoortut baptistillu oqaluffianni oqaluussissutigisartakkaminit allaanerusut. Ilikkakkani allanut oqaluttuarisalerpai, oqaluffimmilu oqaluttarfimmit oqaluussinermini oqaatigalugu ataasiullunilu pingasuussutsimik, anniarfimmik tarnermillu toqujuitsumik ajoqersuutit Biibilimeersuunngitsut. Tamanna oqaluffeqarfimmi aalassaataaqaaq.

Assortuunneq unitsinniarlugu oqaluffeqarfik ataatsimiigiaqqusivoq. Ima aperisoqarpoq: „Kikkut baptistinik tapersersuippat?“ Amerlanerit tapersersuinerarput. Taava ima aperisoqarpoq: „Kikkut Jehovamik tapersersuippat?“ Inuit qulit aqqaneq-marlullu akornanniittut tapersersuinerarput, taakkulu oqaluffimmit qimaguteqquneqarput.

Taamaalilluni upperisarsiortut nutaat Sankt Helenami pilerput. Ataatama Napasuliaq Alapernaarsuiffiup Peqatigiiffiata qullersaqarfia USA-miittoq attaveqarfigaa qinnuigalugulu oqaluttartumik nasseqqulluni, nuutit oqalugiaatinik Biibilimut tunngasunik imallit inunnut tusartittarniassagamigit. Ilisimatinneqarpoq oqaluttartoq angivallaarami Sankt Helenamut nassiunneqarsinnaanngitsoq. Oqaluttartumilli minnerusumik nassinneqarpoq, kingornalu qatanngutit allanik marlunnik inniminniipput. Tusarliussaq inunnut oqaluussissutigiartorlugu qeqertaq tamaat pisuinnaq siutituullu atorlugit angalaffigisarpaat.

Tusarliussaq siaruarnerujartortillugu akerlilersuineq annertusiartorpoq. Atuarfimmi meeraqatikka ima erinarsortarput: „Taa, meeqqanaa! Taa, meeqqanaa! Scipiop oqaluttartuutaa!“ Tamanna nukappiaqqamut atuartumut kammalaatinit akuerineqarusuttumut uattut ittumut artornaqaaq. Nikallujuinnissannut suna iluaqutigaara?

Uagut ilaqutariit arfinillinik meerartallit Biibili aalajangersimasumik atuaqqissaartarparput. Aammattaaq ullut tamaasa ullaakkorsiunnginnitsinni Biibili atuaqatigiissutigisarparput. Tamanna ilaqutariit ukiorpassuarni sallusuissummi aalajaattuarnissaminnut qularnanngitsumik iluaqutigaat. Suli nukangallunga Biibili nuannarilluinnalerpara, ukiullu ingerlaneranni Biibilimik atuartarnera aalajangersimalluinnartuuvoq. (Tussiaat 1:1-3) 14-inik ukioqarlunga atuarfimmit anininni sallusuissut aalajangiulluinnarsimavara uummatikkullu Jehova mianerilluinnarlugu. Tamatuma kingunerisaanik misilinneqartaraluarlunga Jehovamut kiffartornera nuannaarutigiuarpara.

Misilinneqarnerit nuannaarutissallu amerlanerusut

Napparsimallunga uninnganinni tamakku tamaasa siunissaralu eqqarsaatigisarpakka. Biibilimik atuaqqissaartarninnit nalunngilara napparsimanera tassaanngitsoq Guutip misiliinera imaluunniit pillaanera. (Jâko 1:12, 13) Taamaakkaluartorli nukillaarnermik eqqorneqarneq ajortorujussuuvoq, nappaallu inuunerma sinnera tamaat ajoqutissarsiffigisussaavara.

Iluarsiartortillunga pisunnissara ilinniaqqittariaqalerpara. Tallima nukiisa ilaat aamma atorsinnaajunnaarsimapput. Ullut tamaasa orlusaqattaartaqaanga. Qujanartumilli qamannga pisumik qinusarnikka ilungersortuarnikkalu iluaqutigalugit 1947-mi ajaappisserlunga pisussinnaalerpunga.

Taamaalinerani niviarsissamut Jehovap nalunaajaasuisa ilaannut, Dorisimut, asannilerpunga. Katinnissarput eqqarsaatigissallugu inuusuppaallarpugut, tamannali suli pisulluarsinnaanerulernissama anguniarnissaanut kajumississutigaara. Aammattaaq suliffinnit soraarpunga, akissarsiakka nuliamik pilersuilernissamut naammanngimmata. Ukiuni tulliuttuni marlunni nammineq kigutilerivimmik ingerlatsivunga. 1950-imi katippugut. Taamaalinerani ima akissarsiorsimatigaanga biilimut anginngitsumut akissaqalersimallunga. Taamaalillunga qatanngutinik ataatsimiigiarnermi oqaluussinermilu ilaasoqarsinnaalerpunga.

Qeqertami teokratiip siumukarnera

1951-imi Napasuliaq Alapernaarsuiffiup Peqatigiiffia siullermeerluni qeqertamut aallartitsivoq. Aallartitaa tassaavoq Jacobus van Staden Afrika-kujallermeersoq. Illumut angisuumut nutseqqammerpugut, taamaattumillu taanna ukiumi ataatsimi inisimasoraarput. Namminersortuunera iluaqutigalugu piffissaq annertooq oqaluussinermut atortarparput, qatanngutillu angutip taassuma sorpassuarnik naleqangaartunik ilinniartippaanga.

Jacobus, imaluunniit Koos, taamatummi taasaratsigu, ilagiit ataatsimiinnerinik aalajangersimasumik aaqqissuussisarpoq najuuffigissallugit tamatta nuannareqisatsinnik. Angalaniarneq assut ajornartorsiutaavoq, soqutiginnittorpassuit ilaat marluinnaat biileqarmata. Nuna aqqulluttuuvoq qattunersarasaarlunilu, taamanikkullu pitsaasunik ikittuinnarnik aqqusineqarpoq. Taamaattumik soqutiginnittut tamaasa ataatsimiinnernut ingerlannissaat ilungersunartuuvoq. Ilaat ullaannguakkut pisullutik aallartarput. Uanga pingasut biilinnik mikisunik aasarpakka. Sivisungaatsiaamik ingerlatereeraangakkit niusarpakka, sinneranilu pisuttarput. Taava utertarpunga aamma pingasut aallugit, taamatuttaarlu taakku sinnerani pisuttarput. Tamarmik ataatsimiiffissamut apuunnissaat tikillugu taamaaliortarpunga. Ataatsimiinnerup kingorna tamarmik angerlamut apuussinnaaqqullugit periaaseq tamanna atoqqittarparput.

Matumit matumut tusarliussamik tusarliussinermut aamma Koosip pikkorissarpaatigut. Nuannersorpassuarnik nuanniitsorpaalunnillu misigisaqartarpugut. Oqaluussisarnitsinnilli nuannarinninnitta misilinneqaatit suliatsinnik akerlilersuisut pilersittagaat tamaasa matusarpai. Ilaanni ullaap’tungaa Koos oqaluussiartoqatigaara. Illu qanilligatsigu taqqamannga nipi tusaalerparput. Tassaana angut Biibilimik nipituumik atuarpaluttoq. Oqaatsit ilisimaneqarluartut Jesaja, kapitali 2-meersut, atuarpalukkai tusaalluarsinnaavarput. Versi 4 tikikkaalu matukkut kasuttorpugut. Angutip utoqqasaap inussiarnersup iseqquaatigut, Jesaja 2:4-lu atorlugu Guutip naalagaaffianik nutaarsiassamik nuannersumik nassuiaapparput. Tikikkuminaaqisumi najugaqaraluartoq Biibilimik atuaqqissaaqatigisalerparput. Pulaaraangatsigu qattunikkut ammukariarluta, ujaqqat allorarfigalugit kuuk ikaariarlugu, qattunikkut allakkut qummukariarluta naggataatigut aterluta illuanut apuuttarpugut. Kisianni ilungersulussinnanngilagut. Angut maniguuttoq taanna sallusuissummik ilassinnippoq kuisillunilu. Ataatsimiigiaraangami marlunnik ajaappisserluni sumiiffimmut isumaqatigiissutigisatsinnukartarpoq, tamaangalu uanga biilerlunga aasarpara. Kingorna Jehovap nalunaajaasuatut aalajaalluni toquvoq.

Qeqertami politiinspektøri suliatsinnik akerlilersuisuuvoq, Koosillu aallartitaanissaa sioorasaarutigiuartarpaa. Koos qaammammut ataasiarluni killisiorneqartarpoq. Koosip politiinspektøri tamatigut toqqaannartumik Biibilimeersumik akisarpaa, tamannalu politiip suli kamannerulissutigisarpaa. Tamatigut Koos oqaluussiunnaaqqullugu sioorasaartarpaa, tamatigulli Koosip nalunaajaaffigisarpaa. Kingorna Koos Sankt Helenamit aallareeraluarmalluunniit politiinspektøri suliatsinnut akerlilersuiuarsinnarpoq. Politiinspektøri angutikullassuuvoq nukittooq, ullulli ilaanni napparsimalerpoq assullu sanigorluni. Suna ajoqutigineraa nakorsat paasisinnaanngilaat, taamaattumillu qeqertamit aallartariaqalerpoq.

Kuisinneq siumukartuarnerlu

Koos qaammatini pingasuni qeqertameereerami isumaqalerpoq kuisinissamut piffissanngortoq. Kuisivissamilli pitsaasumik nassaarnissaq ajornakusoorpoq. Aalajangerpugut angisuumik itersalioriarluta cementiteriarlugu imermik immerniarlugu. Kuisittoqarnissaanut aqaguttoq unnuakkut siallerpoq, nuannaarutigeqisatsinnillu itersaq ullaakkut imermik ulikkaarsimavoq.

Sapaammi ullaap’tungaa Koos kuisinneq pillugu oqalugiarpoq. Kuisittussat nikueqqummagit 26-ulluta nikuippugut apeqqutillu marluk akillugit. Qeqertami nalunaajaasut kuisittut siullersaraatigut, tamannalu immikkut pisinnaatitaaffittut isigaarput. Ulloq tamanna inuuninni pilluarnarnersaavoq, sulimi kuisinngitsunga Harmagedonip nalliunnissaa annilaanngatigiuaannarsimavara.

Piffissap ingerlanerani ilagiit marluk pilersinneqarput, ataatsit Levelwoodimi ataatsillu Jamestownimi. Arfininngornerit tamaasa pingasuulluta sisamaallutaluunniit ilagiinni saniliusuni unnukkut Teokratiimik Atuarfik kiffartornerlu pillugu ataatsimiinneq aqukkiartorlugit kilometerit 13-it angallavigisarpavut. Sapaammi ullaap’tungaa oqaluussiartoreeraangatta angerlartarpugut, ualikkullu unnukkullu ataatsimiissutissat taakkorpiaat kiisalu Napasuliaq Alapernaarsuiffik-mik atuaqqissaarneq ingerlallugit. Taamaattumik sapaatit-akunnerisa naanerini teokratiimut tunngasunik ulapputeqartaqaagut. Pioneeriorusuttorujussuugaluarpunga, pilersugassannilli ilaqutaqarpunga. Taamaattumik 1952-imi kigutilerisutut ulloq tamaat sulilerpunga.

1955-imi Napasuliaq Alapernaarsuiffiup Peqatigiiffiata aallartitai angalasartut, aamma nakkutilliisunik angalasartunik taaneqartartut, ukiut tamaasa qeqertamut tikeraartalerput, pulaarnermillu ilaani uagutsinni najugaqartarput. Ilaqutariinnut uagutsinnut taakkua ajunngitsumik sunniuteqarput. Piffissami tamatumissaaq immikkut pisinnaatitaaffittut isigisannik uanga qeqertami angalavunga Peqatigiiffiup filmiutai pingasut isiginnaartikkiartorlugit.

Ataatsimeersuarneq pissanganartoq ’Guutip piumasaa’

Ataatsimeersuarneq nunanit tamalaanit peqataaffigineqartoq ’Guutip piumasaa’ peqataaffigisinnaajumallugu suliffiga taamaateqqittariaqalerpara. Ataatsimeersuarneq tamanna inuuninni pingaarnerpaat ilagaat — Jehovamik nuannaarutiginninnerulernissannut periarfissaq. Qeqertamut aalajangersimasumik ilaasartaateqanngimmat qaammatini tallimani affarmilu peqanngittariaqarpugut. Ataatsimeersuarneq ullunik arfineq-pingasunik sivisussuseqarpoq, ullaakkullu qulingiluanit unnukkut qulingiluap tungaanut ingerlasarpoq. Qasulinngilanga, ullulli tamaasa qilanaartarlunga. Minutsini marlunni Sankt Helena pillugu oqaluttuartitaanera immikkut pisinnaatitaaffittut isigaara. Yankee Stadiumimi Polo Groundsimilu tusarnaartorpassuarnut oqalunneq sajukulaarnaqaaq.

Ataatsimeersuarnerup pioneerinngorniarlunga aalajangersimanera nakussatsippaa. Oqalugiaat tamanut ammasoq ’Guutip naalagaaffia aqutsivoq — silarsuup naggatissaa qanilliva?’ assorsuaq qiimmaallannarpoq. Ataatsimeersuarnerup kingorna Napasuliaq Alapernaarsuiffiup Peqatigiiffiata qullersaqarfia Brooklynimiittoq pulaarparput naqiterivianilu takornariartinneqarluta. Qatanngut Knorr, Napasuliaq Alapernaarsuiffiup Peqatigiiffiata taamanikkut præsidentia, Sankt Helenami siumukarneq pillugu oqaloqatigaara. Oqarpoq ullut arlaanni qeqertamut tikeraarnissani assut kissaatigalugu. Angerlamut uteratta ataatsimeersuarnermi oqalugiaatinik immiussat filmiliallu ilaquttatsinnut ikinngutitsinnullu nassarpavut.

Pioneerinngornissannik anguniagara anguara

Angerlamut apuukkama qeqertami allamik kigutilerisoqannginnera pillugu suliffikora uannut neqeroorutigineqarpoq. Piffissarali tamaat oqaluussisartunngorniarninnik nassuiaappakka. Sivisuumik oqaloqatigeereerluta sapaatip-akunneranut ulluni pingasuni sulisalernissara akueraara, sapaatip-akunneranut ulluni arfinilinni sulisarallarninnit akissarsiaqarnerullunga. Jesusip oqaasiisa ukua ilumuussusiat uppernarsarneqarpoq: ’Guutip naalagaaffia iluarnerlu taassuma pia piniaqqaarsigik, taava tamakku tamaasa ilanngullugit piumaarpasi.’ (Matîuse 6:33) Niukka sanngiimmata qeqertap qattunersarasaartortaani angalaneq uannut oqitsuinnaaneq ajorpoq. Taamaakkaluartorli ukiuni 14-ini pioneeriuvunga nuannaarutigeqisannillu qeqertarmiut ilarpassui Biibilimik ilinniartillugit.

1961-imi kommunip kajumissaarpaanga Fijip Qeqertaani ukiuni marlunni akeqanngitsumik kigutit nakorsaattut ilinniariartussasunga. Allaat ilaquttama ilaginissaannik neqeroorfigaanga. Neqeroorut assut ussernartorsiornaraluarpoq, isumaliutigilluareerluguli qujaannarpunga. Taama sivisutigisumik qatanngutit qimassimarusunngilakka taakkuninngalu kiffartoqateqarnermik immikkut pisinnaatitaaffik taamaatikkusunnagu. Tamanna nakorsat qullersaata angalanissamik aaqqissuussisimasup, narrujuummissutigeqaa, imalu oqarfigalunga: „Isumaqaraluarlutilluunniit naggatissaq qanittuararsuusoq, nalliutinnginnerani aningaasarsiornissat pisariaqartippat.“ Nakkaannanngilangali.

Aappaaguani Afrika-kujallermi Guutip Naalagaaffiata Kiffartornermik Atuarfianut, ilagiinni nakkutilliisut qaammammi ataatsimi pikkorissarneqarnerannut, peqataanissannik neqeroorfigineqarpunga. Ilagiinni suliassatsinnut pikkorinnerulersinnaaqqulluta pitsaasumik ilinniartinneqarpugut. Atuarfimmeereerama nakkutilliisoq angalasartoq suleqatigalugu ilinniartinneqaqqippunga. Ukiuni tulliuttuni qulini nakkutilliisoq angalasartoq akornutissarsigaangat Sankt Helenami ilagiinnik marlunnik kiffartuussinerani taarsertarpara. Piffissap ingerlanerani qatanngutit angutit amerlanerusut suliassamut piukkunnarsimmata suliassamut tamatumunnga sinnerseraattoqartalerpoq.

Tamatuma nalaani Jamestownimit Levelwoodimut, oqaluussisartunik pisariaqartitsiffiunerusumut, nuuppugut ukiunilu qulini tamaaniilluta. Ukiuni tamakkunani sulisorujussuuvunga. Pioneeriuvunga, sapaatip-akunneranut ulluni pingasuni oqartussat suliffiutaanni sulisarlunga kiisalu pisiniarfeeqqamik ingerlatsillunga. Tamakkua saniatigut ilagiinni suliassakka nakkutigisassaraakka, nuliaralu peqatigalugu meeqqavut sisamat alliartortut isumagisassaralugit. Naggataatigut allatut ajornartumik kigutilerisutut suliunnaartariaqalerpunga pisiniarfiutigalu tunisariaqalerlugu, taavalu ilaquttakkalu tamatta qaammatini pingasuni Cape Townimut Afrika-kujallermiittumut feeriarluta. Tamatuma kingorna qeqertamut Ascensionimut nuuppugut ukiorlu ataaseq tamaani najugaqarluta. Piffissami tamatumani inuppassuit Biibilimik eqqorluartumik ilisimasaqalernissaannik ikiorpavut.

Sankt Helenamut uteratta Jamestownimut najugassippugut. Illu naalagaaffilersaarfimmut atasoq iluarsaapparput. Timip piisigut pissaqarumalluta erneralu John biili usisaat Fordiusoq sikuerniarfiliaraarput, ukiunilu tulliuttuni tallimani sikuerniarneq inuussutissarsiutigalugu. Sikuernianngoqqammerluta biili usisaat ajutoorutigaara. Uppimmat niukka kiggigunneqarput. Tamatuma kingunerisaanik sianiutima kanaama ataanniittut ilaat aserorput, qaammatinilu pingasuni nakorteqqinniarsaraanga.

Pilluaqqusaasimanerit pilluaqqusaanissallu naammangaartut

Ukiut ingerlaneranni pilluaqqusaasarsimaqaagut nuannaarnitsinnik attassiinnarnissatsinnut iluaqutaasunik. Pilluaqqusaanerit tamakkua ilagaat 1985-imi Afrika-kujallermut angalanerput. Taamani ataatsimeersuarnermut najuuppugut Betelilu sananeqaleruttortoq takornariarlugu. Pilluaqqusaaneq alla tassaavoq erneralu John Jamestownip eqqaani kusanartumik ataatsimeersuartarfiliornermut peqataalaarsimanerput. Nuannaarutitta ilagaattaaq ernitta ilaasa pingasut utoqqaanertatut kiffartornerat, ernuttattalu ataatsip Betelimi Afrika-kujallermiittumi sulinera. Aammattaaq inuppassuarnik Biibilimik eqqorluartumik ilinniartitsisinnaasimanerput nuannaarutigalugulu nalerisimaarutigeqaarput.

Oqaluussiffigisartakkatsinni inuit 5000-iinnaat najugaqarput. Oqaluussisarfimmili ataasiinnarmi oqaluussiuarnerput ajunngitsunik angusaqarfiuvoq. Ikittuinnaat soqqusaaffigisarpaatigut. Sankt Helenamiut inussiarnissutsimikkut tusaamasaapput, inuillu aqqusinikkut pisukkaluaraanni biileraluaraanniluunniit ilassisarput. Paasisimavara inuit ilisarisimanerujartortillugit oqaluussiffiginissaat ajornannginnerujartortartoq. Ullumikkut oqaluussisartut 150-iuvugut, naak amerlasuut nunavimmut nuussimagaluartut.

Maanna meeqqavut tamarmik inersimasunngorlutik namminneq angerlarsimaffeqaleriarmata nuliaralu katinnitsinnit ukiut 47-nngortullu kisimiileqqippugut. Nuliama Dorisip asanninnera annertoqqusersuineralu ukiut ingerlaneranni misilinneqartaraluarlunga nuannaarlunga Jehovamut kiffartornissannut iluaqutigisimavara. Timikkut nukissavut ikiliartoraluartut anersaakkut nukissavut ullut tamaasa nutaanngortuarput. (2 Korintumiut 4:16) Ilaquttakka ikinngutikkalu ilagalugit qilanaaraara siunissaq nuannerunangaartoq 17-inik ukioqarlunga timikkut peqqissutsinnit peqqinnerulerfissara. Kissaatiginerpaasara tassaavoq sutigut tamatigut naammalluinnartunngornissara, tamanillu pingaarnermik, Guutitsinnut asannittumut isumassuisumullu, Jehovamut, taassumalu Kunngiutitaanut, Jesus Kristusimut, naassaanngitsumik kiffartornissara. — Nehemja 8:10.

[Qupp. 28-mi assiliartaq]

George Scipio ernerisalu ilaat pingasut utoqqaanertatut kiffartortut

[Qupp. 29-mi assiliartaq]

George Scipio nulialu, Doris