Guutimut kiffartorneq nakorsaatigaa!

Pionerit marluk Kenyami illumut iseqquneqaramik angut mikisunnguaq siniffimmi nalasoq takugamikku tupaallapput. Kiatikillunilu talikitsuararsuuvoq. Oqaluttuummanni Guuti neriorsuisimasoq ‘tusiattoq tuttorsuartut pissigarumaartoq’ qungujorujussuarpoq. — Es 35:6.

Pionerit paasivaat Onesmusip, maanna 40-t pallillugit ukiullip, saarngit napianerannik nappaat (osteogenesis imperfecta) inunnguuserisimagaa. Saarngi qajannangaaramik naqinneqalaaginnarlutik napisinnaapput. Nappaatigiuartussaagamiuk sunniuteqarluartumillu katsorsaatissaqannginnami Onesmusip naatsorsuutigaa inuunermi sinnera anniartussaalluni issiavillu assakaasulik isumalluutissatuaralugu.

Onesmus Biibilimik atuaqqissaaqatigineqarnissaminut akuersivoq. Arnaatali kristumiut ataatsimiinnerinut najuuttarnissaanut nangartarpaa isumaqarami ajoqutigalugu anniarnerulissutigissagaa. Taamaattumik qatanngutit ataatsimiinnerit immiuttarpaat, Onesmusillu angerlarsimaffimmini tusarnaartarpai. Onesmus qaammatini tallimani atuaqqissaartareerluni aalajangerpoq ajoqutigisinnaagaluarlugu ataatsimiigiartarniarluni.

Onesmusip ataatsimiittarnini anniarnerulissutigaa? Naamik, akerlianik pisoqarpoq. Ima oqarpoq: “Anniartuaannarnera ataatsimiinnerni nipaalliimisungasarpoq.” Namminerlu isumaqarpoq neriuuteqalernini pissutigalugu ajunnginnerusutut misigaluni. Isumalluarnerulersoq arnaata malugalugu tamanna nuannaarutigingaaramiuk Biibilimik atuaqqissaaqatigineqarnissaminut akuersivoq. Ima oqartarpoq: “Guutimut kiffartorneq ernerma nakorsaatigaa.”

Sivitsunngitsoq Onesmus oqaluussisartunngorpoq kuisimanngitsoq. Kingusinnerusukkut kuisippoq maannalu ilagiinni kiffartortuulluni. Nissuni tallimilu aappaa atorsinnaanngikkaluarlugit Jehovamut kiffartornermi sapinngisani tamaat iliuuseqarusuppoq. Ikiorti-pionerinngorusukkaluarluni qinnuteqarnissaminut tunuarsimaarpoq. Sooq? Nalunnginnamiuk issiavimmi assakaasulimmiilluni nikissaguni ajattarneqartariaqarluni. Isumakuluutini kristumioqatiminut annimmagit taakku neriorsuipput tapersersorumallugu. Taamaaliorpullumi Onesmus ikiorti-pioneriusinnaalersillugu.

Onesmus pioneritut nalinginnaasutut kiffartorusulerami taamatut isumakuluuteqaqqippoq. Ullulli ilaanni ullormut allassimaffik Tussiaat 34:9 kajumississutigaa: “Ussersiuk takusiullu Naalagaq ajunngitsuusoq.” Allassimaffik taanna eqqarsaatigeqqissaareerlugu aalajangerpoq pionerinngorniarluni. Maanna sapaatip-akunneranut ulluni sisamani oqaluussisarpoq arlalinnillu anersaakkut siumukarluartunik Biibilimik atuaqqissaaqateqartarluni. 2010-mi Pionerinut Ilinniarfik peqataaffigaa. Nuannaarutigingaarpaalu qatanngutit imminik naapitseqqaartut aappaa ilinniartitsisorigamiuk.

Onesmusip angajoqqaavi toqoreerput, ullormulli pisariaqartitai qatanngutinit ilagiinniittunit isumagineqartarput. Maannakkut pilluaqqussutisiarpassuani qujamasuutigai siulittuutillu matuma eqquunnissaa qilanaaralugu: “Innuttaasoq kinaluunniit oqassanngilaq: ‘Napparsimavunga!’” — Es 33:24.