Jehova naassaanngilluinnartumik kunngiusoq pallorfigisigu

1, 2. (a) “Naassaanngilluinnartumik kunngiusoq” kinaava, aamma sooq taaguut tamanna tulluarpa? (Allaaserisap aallaqqaataani assiliaq takuuk). (b) Sooq Jehova kunngigiumavarput?

SWAZILANDIMI kunngi Sobhuza II ukiuni 61-ingajanni kunngiusimavoq. Inuup taama sivisutigisumik kunngiusinnaanera tupinnaraluartoq allamik kunngeqarpoq inummit sivisunerungaartumik naalakkersuisinnaasumik. Biibilimi ima allassimavoq: “Taanna naassaanngilluinnartumik kunngiusoq.” (1 Tim 1:17) Tussiaasiortut ilaasa Kisimi Oqartussaasup taassuma aqqanik paasitippaatigut ima allakkami: ‘Jehova Kunngiuttuinnarpoq.’ — Tuss 10:16, Niels Wolfip nutsigaa 1824-meersoq.

² Guutip kunngiunerata sivisussusia inuit naalakkersuinerisa sivisussusianit allaalluinnarpoq. Jehovalli naalakkersueriaasia taassumunnga kajungilissutigaarput. Itsaq Israelimi ukiuni 40-ni kunngiusimasup Guuti ima unnersiutigaa: “Naalagaq naakkinnillunilu saammaasuuvoq, kamajaatsuullunilu ilumoorsusermillu peqangaarluni. Naalakkap issiavissaarsuani qilammi aalajaatsumik inissippaa, kunngisullu tamaasa naalagaaffigai.” (Tuss 103:8, 19) Jehova Kunngigiinnarnagu aammali Ataatagaarput qilammiusoq asannittoq. Jehovali qanoq ataataasutut ittuusimava? Edenimi pikitsitsinermiilli Jehovap naassaanngilluinnartumik kunngiunini qanoq ersersippaa? Apeqqutinut tamakkununnga akissutit Jehovamut qanillissutigalugit taassuminngalu tatiginninnerulissutigissavavut.

NAASSAANNGILLUINNARTUMIK KUNNGIUSOQ ILAQUTARIISSUARNIK PILERSITSIVOQ

3. Jehovap ilaqutariissortaanut ilaasoq siulleq kinaava, kikkullu aamma Guutip ‘ernerisut’ pinngortinneqarpat?

³ Qularnanngitsumik Jehova ernituani pinngortikkamiuk nuannaangaarsimassaaq! Guutip ernituani innuttaasutut naleqanngitsutut pineq ajorpaa. Ernertut asallugu suliamillu nuannaarutaasumik, inngilerpassuarnik millionilikkuutaanik pinngortitsinissamik, ikiortiseraa. (Kol 1:15-17) Inngilit taakkua Biibilimi ‘kiffatut piumasaanik naammassisitsisartutut’ allaatigineqartut nuannaarlutik Jehova kiffartorfigaat. Jehovap taakku ‘ernermisut’ taagamigit ataqqinninnini ersersippaa. Taakku Jehovap ilaqutariissortaanut ilaapput. — Tuss 103:20-22; Job 38:7.

4. Inuit Jehovap ilaqutariissortaanut qanoq ilannguppat?

⁴ Jehovap qilaat nunarsuarlu pinngortereeramigit ilaqutariissortani amerlisippai. Qanoq? Nunarsuaq angerlarsimaffissatut kusanartutut piareersareeramiuk inuk siulleq, Adami, imminut assililluni pinngortippaa. (1 Mos 1:26-28) Jehovap Adami pinngortitarigamiuk naalannissaa piumasaraa. Ataatatut Jehovap Adami asannillunilu inussiarnerluni siunnersorpaa. Siunnersuutaali Adamip kiffaanngissusianik pisariaqanngitsumik killilersuinngillat. — 1 Mosesi 2:15-17 atuakkit.

5. Nunarsuaq inunnik qanoq tamakkerneqartussaagaluarpa?

⁵ Inuit kunngiusut assiginagit Jehovap innuttani ilaquttamisut pisarpai. Ima tatigitigai allaat kajumilluni amerlasuunik akisussaaffilersillugit suliaminnillu naammassinninnissaannut oqartussaassusilersillugit. Assersuutigalugu Adami nuannaarutaasumik, uumasut atsernissaannik, suliassippaa. (1 Mos 1:26; 2:19, 20) Guutip inuit nunarsuarmi inuusussat tamaasa pinngortinngilai. Arnarli naammalluinnartoq, Eva, Adamimut nuliaasutut pinngortippaa. (1 Mos 2:21, 22) Taava nunarsuaq tamakkerlugu kinguaassiornissaannut periarfissippai. Pissutsini ajunngilluinnartuni Adamip Evallu ukiut ingerlaneranni nunarsuaq tamaat paratiisinngortissinnaagaluarpaat. Taava inuit inngilillu tamakkerlutik ilaqutariissuartut Jehova naassaanngitsumik pallorfigisinnaassagaluarpaat. Adamip Evallu taamatut nuannersumik siunissaqalersinneratigut Jehovap ataatatut asanningaarnini ersersippaa.

ERNERIT PIKITSITSIUMATUUT GUUTI KUNNGIMISSUT ITIGARTIPPAAT

6. (a) Guutip ilaqutariissortaani pikitsitsineq qanoq aallartippa? (b) Qanoq nalunngissinnaavarput Jehova suli aqutsisinnaassuseqartoq?

⁶ Ajoraluartumik Adamip Evallu Jehova naalakkersuisumittut akueriumanngilaat. Saatanimi, inngili Guutimut pikitsitsisimasoq, malikkumallugu aalajangerput. (1 Mos 3:1-6) Tamanna imminnut meeraannullu aliasunnermik, naalliunnermik toqumillu kinguneqarpoq. (1 Mos 3:16-19; Rom 5:12) Tamatumalu kingunerisaanik Guuti nunarsuarmi naalattunik innuttaqarunnaarpoq. Tamannali paasisariaqarpa Guutip aqutsisinnaajunnaarlunilu nunarsuarmut kisimi oqartussaassutsini taamaatikkaa? Naamerluinnaq! Jehovap Adami Evalu Naatsiivimmit Edenimit anisippai, uteqqinnginniassammatalu kerubit marluk naatsiiviup isaariaani inissippai. (1 Mos 3:23, 24) Taamaaliornermini aamma ataatatut asanningaarnini ersersippaa. Neriorsuivoq inngilinik inunnillu aalajaatsunik suli ilaqutariissortaqassalluni. Aamma siulittuivoq Adamip kinguaavisa ilaata Saatani suujunnaarsissallugulu Adamip ajortuliaata kingunipilui atuukkunnaarsissagai. — 1 Mosesi 3:15, NW atuaruk.a

7, 8. (a) Noap nalaani nunarsuarmi pissutsit qanoq ajortigaat? (b) Jehova nunarsuaq ajussuseqarunnaarsinniarlugu inuiaallu illersorniarlugit qanoq iliorpa?

⁷ Ukiuni hundredelikkuutaani tulliuttuni inuit ilaat, assersuutigalugu Abeli Enokilu, Jehova ilumoorfigiumallugu aalajangerput. Inuilli amerlanerit Jehova Ataatamissut Kunngimissullu akueriumanngilaat. Noap nalaani nunarsuaq ‘nakuusernernik ulikkaarpoq’. (1 Mos 6:11) Tamanna paasisariaqarpa Jehova nunarsuarmi aqutsisinnaajunnaartoq? Biibilimi qanoq allassimasoqarpa?

⁸ Noamik oqaluttuaq eqqarsaatigeriaruk. Jehovap Noa umiarsuarujussualiornissamik ilaqutaasalu aniguissutigisinnaasaannik sukumiisumik ilitsersorpaa. Aamma Guutip Noa ‘iluarnermik nalunaariartortitanngortikkamiuk’ inunnik asanninnini ersersippaa. (2 Petr 2:5) Ilimanarluinnarpoq Noap inuit peqqissiminissaannut kajumissaarlugillu piuneerussaanissarsuaq pillugu mianersoqqusimagai. Tusarumasoqanngilarli. Ukiorpassuarni Noa ilaqutaalu silarsuarmi nakuuserfiungaartumi kinguaassiuutitigullu inuunerluffiungaartumi inuupput. Jehovap ataataasutut asannittutut inuit aalajaatsut arfineq-pingasut taakku illersorlugillu siulersorpai. Jehovap ulersuaqalersikkamiuk inunnut pikitsitsiumatuunut inngilipilunnullu pissaaneqangaarnini atorpaa. Aap, Jehovap nunarsuarmi aqutsisuunini ersersippaa! — 1 Mos 7:17-24.

ULERSUUP KINGORNA JEHOVAP KUNNGIUNERA

9. Ulersuup kingorna Jehovap inuiaat qanoq periarfissippai?

⁹ Noap ilaqutaasalu umiarsuarmit anigamik Jehovap isumassuinera illersuineralu qujamasuutigingaarsimassavaat. Jehova pallorfiginiarlugu Noa ingerlaannaq pilliiviliorlunilu pilliuteqarpoq. Guutip Noa ilaqutaalu pilluaqquai imalu oqarfigalugit: “Kinguaassiorlusi amerliartoritsi nunarsuaq tamakkerlugu.” (1 Mos 8:20–9:1) Inuiaat ataasiussuseqarlutik Jehovamik pallorfiginninnissaminnut nunarsuullu inunnik ulikkaarnissaanut periarfissinneqaqqipput.

10. (a) Ulersuup kingorna sumi aamma qanoq inuit Jehovamut pikitsitsilerpat? (b) Jehova piumasami naammassinissaa qulakkeerniarlugu qanoq iliorpa?

¹⁰ Ulersuup kingorna inuit suli naammalluinnanngitsuupput. Sulilu Saatanimit anersaapilunnillu malunnanngitsumik ajortumillu sunnerneqartarput. Sivitsunngitsoq inuit Jehovap asannittumik naalakkersuineranut pikitsitseqqilerput. Inuit Jehovamut akeqqersimaartut ilaat tassaavoq Noap ernutaqqiutaa, Nimrodi. Taanna pinerrarissorsuuvoq “Jehovamik akerlilersuisoq” (NW). Arlalinnik illoqarfissualiortitsivoq, assersuutigalugu Babeli, ‘nunamilu Sinearimi’ kunnginngortilluni. (1 Mos 10:8-12) Naassaanngilluinnartumik kunngiusup kunngi pikitsitsiumatooq taanna Guutillu piumasaanut akerliuniarnera qanoq iliuuseqarfigaa? Guutip inuit oqaasii paatsiveerutitippai taamaalillunilu Nimrodip innuttai ‘nunarsuarmut tamarmut siammartillugit’. Taakkua upperisarsiornerat eqqunngitsoq naalakkersueriaasiallu aamma siammarput. — 1 Mos 11:1-9.

11. Jehovap ikinngutiminik Aaperaamik ilumoorfiginninnini qanoq ersersippaa?

¹¹ Ulersuup kingorna guutipilussiortorpassuaqarpoq, taamaakkaluartorli inuit ilaat aalajaallutik Jehovamik pallorfiginnittuarput. Taakkua Aaperaat ilagaat. Illoqarfimmi Urimi ilorrisimaarnartumik angerlarsimaffeqaraluarluni Jehova naalallugu illoqarfigisani qimappaa ukiorpassuarnilu tuperni najugaqarluni. (1 Mos 11:31; Hebr 11:8, 9) Aaperaap tuperni inuutilluni saniliisa ilaat kunngiupput illoqarfinni qarmanik ungalulerneqartuni najugallit. Jehovalli Aaperaat ilaqutaalu illersorpai. Tussiaasiortoq Jehovap ataataasutut illersuisarnera pillugu ima allappoq: “[Guutip] kimit qunutinneqaqqunngilai, taakkulu pillugit kunngit pillartarpai.” (Tuss 105:13, 14) Jehovap ikinngutini Aaperaat ilumoorfigigamiuk ima neriorsorpaa: ‘Kunngit nagguigiumaarpaatsit.’ — 1 Mos 17:6; Jaak 2:23.

12. Jehovap Egyptenimut oqartussaassuseqarnini qanoq ersersippaa, innuttaasalu tamanna qanoq iluaqutigaat?

¹² Guutip Aaperaap ernera, Iisaaq, ernutaalu, Jaaku, pilluaqqujumaarlugit neriorsorpai. Pilluaqqussutaanut aamma ilaavoq taakkua kinguaavisa ilaat kunnginngorumaartut. (1 Mos 26:3-5; 35:11) Jaakulli kinguaavi kunnginngunnginnerminni Egyptenimi inussiaataalerput. Tamannali paasisariaqarpa Jehovap neriorsuutini eqqortinngikkaa nunarsuarmiluunniit kisimi oqartussaassutsini taamaatikkaa? Naamerluinnaq! Jehovap piffissarititani nalliummat pissaanini Faraomillu uteriitsumit oqartussaassuseqarnerungaarnini ersersippai. Israelikkut Jehova tatigaat, Jehovallu tupinnartuliornikkut Immakkut Aappalaartukkut aniguisippai. Erserpoq Jehova suli qilammi nunamilu Kisimi Oqartussaasuusoq, Jehovallu ataataasutut isumassuisutut innuttani illersorniarlugit pissaaneqangaarnini atoraa. — 2 Mosesi 14:13, 14 atuakkit.

JEHOVA ISRAELIKKUNNUT KUNNGINNGORPOQ

13, 14. (a) Israelikkut Jehovap kunngiunera erinalimmik qanoq unnersiutigaat? (b) Guutip Daavi qanoq neriorsorpaa?

¹³ Israelikkut Egyptenimit aniguisitaaqqammerlutik erinalimmik Mosesimik allakkat aappaanni kapitali 15-imi allassimasumik Jehova unnersiutigaat. Versi 18-imi ima allassimavoq: “Naalagaq kunngiuvoq naassaanngitsumik.” Aap, Jehova inuiaqatigiinnut nutaanut Israelikkunnut kunnginngorpoq. (5 Mos 33:5) Israelikkulli Jehova Naalagarisartik takussaanngitsoq naammaginngilaat. Ukiut 400-it missaat Egyptenimit aniguisinneqareernermik kingorna Guuti qinnuigaat inuiaat allat Guutimik nalusut kunngeqarnerattut inummik kunnginngortoqassasoq. (1 Sam 8:5) Taamaakkaluartoq Daavi kunngiutillugu erseqqissarneqarpoq Jehova suli Kunngiusoq.

¹⁴ Daavip angerutsip illerfia Jerusalemimukaappaa. Ullormi nuannersumi tassani Levikkut Jehova unnersiutigalugu erinarsorput pingaarutilillu una oqaatigalugu: “Jehova kunngiulereerpoq!” (1 Nal 16:31, NW) Jehovali naassaanngilluinnartumik kunngiugami taava taamani kunngiulernera qanoq paasisariaqarpa? Jehova kunnginngortarpoq piffissami pisumiluunniit aalajangersimasumi oqartussaassutsini atoraangamiuk imminulluunniit sinniisunngortitsigaangami. Jehovap qanoq kunnginngortarneranik paasinninnissarput pingaaruteqangaarpoq. Daavip toqunnginnerani Jehovap taanna neriorsorpaa kunngeqarfia ataavarumaartoq ima oqarfigigamiuk: “Kinguaavit ilaat ... ilinnut kingoraartigitikkumaarpara, kunngeqarfialu aalajaallisikkumaarpara.” (2 Sam 7:12,13) Ukiut 1000-it sinnerlugit matuma kingorna neriorsuut tamanna eqquutitinneqarpoq Daavip ‘kinguaava’ takkummat. Kinaava, qangalu kunnginngorpa?

JEHOVAP KUNNGI NUTAAQ IVERTIPPAA

15, 16. Qanga Jiisusi kunngiusussatut taninneqarpa, Jiisusilu nunarsuarmiitilluni naalagaaffini piareersarniarlugu qanoq iliorpa?

¹⁵ Ukiumi 29-mi Johannesip Kuisisup ‘Qilaap Naalagaaffiata qanillinera’ oqaluussissutigilerpaa. (Matt 3:2) Jiisusi Johannesimit imermut morsutsinneqarmat Jehovap Jiisusi Missiarsitut naalagaaffimminilu kunngiusussatut tanippaa. Jehovap Jiisusimut ataataasutut asanninnini ersersippaa ima oqarluni: “Tassa ernera asasara, nuannarisara.” — Matt 3:17.

¹⁶ Jiisusip kiffartornermini Ataatani naalannarsisippaa. (Joh 17:4) Taamaaliorpoq Guutip naalagaaffia pillugu oqaluussinermigut. (Luk 4:43) Aamma ajoqersukkani ilinniartippai Guutip naalagaaffiata tikiunnissaa qinnutigeqqullugu. (Matt 6:10) Jiisusip Kunngiusussatut imminut akerliusut ima oqarfigisinnaasimavai: “[Guutip] naalagaaffia akornassinniippoq.” (Luk 17:21) Kingusinnerusukkut Jiisusip unnukkut toqunissani aqaguttoq apustilini ima oqarfigai: “[Angerfigeqatigaassi], soorlu Ataatama uanga angerfigeqatigigaanga, naalagaaffik pillugu.” (NW) Tamanna paasisariaqarpoq Jiisusip ajoqersugaasa ilaasa aalajaatsut Guutip naalagaaffiani Jiisusi naalakkersueqatigissagaat. — Luk 22:28-30.

17. Kristumiut siulliit nalaanni Jiisusi qanoq naalagaalerpa, sunalu utaqqisariaqarpaa?

¹⁷ Qanga Jiisusi Guutip naalagaaffiani kunngitut naalakkersuilerpa? Ingerlaannaq naalakkersuilinngilaq. Aqaguanimi ualikkut Jiisusi toqutaavoq, ajoqersugaalu qimaapput. (Joh 16:32) Jehovali suli aqutsisuuvoq. Ullut pingajuanni Jehovap Erni toqusunit makitippaa, piinsillu ulluani Jiisusi kristumiut ilagiivinut naalagaalerpoq. (Kol 1:13) Jiisusilli Daavip kinguaassaata neriorsuutigisap nunarsuaq tamakkerlugu kunngitut pissaaneqalernissani utaqqisariaqarpaa. Taamaattumik Jehovap Erni ima oqarfigaa: “Talerpimma tungaanut inginniarit akeqqatit uannit tummarfiliunneqarserlugit illit isikkannut!” — Tuss 110:1.

NAASSAANNGILLUINNARTUMIK KUNNGIUSOQ PALLORFIGISIGU

18, 19. Sunissamut kajumissisinneqarpugut, allaaserisamilu tulliuttumi suut sammissavavut?

¹⁸ Ukiuni tuusintini arlalinni inngilit inuillu Jehovap naalakkersuineranut pikitsitsisimapput. Jehovalli aqutsisuujuaannarlunilu kisimi oqartussaassutsini taamaatinngisaannarpaa. Ataataasutut asannittutut innuttani ilumoorfiginnittut, assersuutigalugu Noa, Aaperaat Daavilu illersorlugillu isumassorpai. Tamanna Kunngitsinnut qanillinissatsinnut naalannissatsinnullu kajumississutigingaarparput, ilaa?

¹⁹ Ukuli apeqqutaalerput: Nalitsinni Jehova qanoq kunnginngorpa? Jehovap naalagaaffiani ilumoorfiginnilluta innuttaanerput qanoq ersersissinnaavarput? Jehovallu ilaqutariissortaani qanoq qitornanngorsinnaavugut naammalluinnartut? Guutip naalagaaffiata tikiunnissaanik qinnutiginnittarnerput qanoq paasisariaqarpa? Apeqqutit taakku allaaserisami tulliuttumi akineqassapput.